Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME OCTOBER 2013

Afo Esida Didie Nsio Nsio Uduot?

Afo Esida Didie Nsio Nsio Uduot?

Esinam didie ọfiọk ke mfri adat? Esinam didie ọfiọk ke edịm ididepke mfịn? Anam didie okụt se osụk okotde emi? Nsio nsio uduot emi mmọ ẹnyenede ye nte mmọ ẹtiede ẹnam.

Ke uwụtn̄kpọ, nte mfri etiede anam fi ọfiọk m̀mê enye adat m̀mê idatke. Nte enyọn̄ etiede anam fi ọfiọk m̀mê edịm eyedep m̀mê ididepke. Ekpedi ẹkeda afia mmọn̄n̄wed ẹwet se osụk okotde emi, ukpukwe se ẹwetde sia n̄wed emi ke idemesie edi afia. Omokụt ufọn nsio nsio uduot do. Ndi ọmọdiọn̄ọ n̄ko ke enyene uduot emi ekemede ndinam idem enem fi onyụn̄ enyene uduot emi ekemede ndinam idem enyek fi?

NTE NSIO NSIO UDUOT ẸSITIEDE OWO KE IDEM

Ama odụk ufọkurua, oyokụt ndiye n̄kpọ ke uduot ke uduot. Mme asuanetop n̄kpọurua ẹsitịn̄ enyịn ẹnam n̄kpọurua mmọ edi ke uduot ke uduot man ama okokụt, ọdọn̄ fi ndidep. Mmọ ẹdiọn̄ọ uduot emi iban ẹmade, enye emi irenowo ẹmade, enye emi ikpọ owo ẹmade, ye enye emi nditọwọn̄ ẹdimade. Mme anam ọfọn̄, mme ewet ndise, ye mbon oro ẹsibanade ufọk ẹdiọn̄ọ n̄ko uduot emi mme owo ẹdimade.

Enyene nte idụt kiet kiet ẹdade nsio nsio uduot. Ke uwụtn̄kpọ, owo mbakara ekeme ndidi ama okokụt ndatndat n̄kpọ, enye ada emi nte mfọnọn̄kpọ, edi obubịt owo edida nte ibọk. Inamke n̄kpọ m̀mê owo oto m̀mọ̀n̄, enyene ndusụk uduot emi kpukpru owo ẹdade ukem ukem. Yak isiak ita ke otu uduot emi ye nte esitiede nnyịn ke idem ke ini ikụtde mmọ.

NDATNDAT n̄kpọ esinen̄ede odụk owo enyịn. Ediwak owo ẹsida ndatndat n̄kpọ nte idiọn̄ọ n̄kpa, n̄kpọ emi ofiopde-fiop, etiede afai afai, m̀mê ekọn̄ ekọn̄. Esidi owo ama okokụt ndatndat n̄kpọ, idem enyek enye. Emi ekeme ndinam udia ọsọp ataha enye ke idịbi, anam oti etịm enye onyụn̄ anam iyịp esie ọdọk.

Ke Bible, ẹda ikọ Hebrew oro ẹkabarede “ndatndat” ẹto iyịp. Bible etịn̄ aban̄a akwa akpara emi esịnede ọfọn̄ uduot mmọn̄ibọn̄ ye ididuot ọfọn̄, “oro etiede ke enyọn̄ ididuot idiọk unam . . . emi enyịn̄ oro osụn̄ide Abasi ẹyọhọde enye idem.”—Ediyarade 17:1-6.

AWAWA itiehe nte ndatndat, edi esifụre owo ke idem, iyakke udia ọsọp ataha owo ke idem. Sia awawa esifụrede owo ke idem, enye esiwak ndida mban̄a ifụre. Ntak edi oro esinemde owo ndisụhọde nna ke awawa mbiet. Esitie fi didie ke idem ke ini okụtde ebiet emi awawa mbiet ọyọhọde? Ndi isinemke fi ke idem? N̄wed Genesis ọdọhọ ke Abasi ọkọnọ nnyịn kpukpru awawa ikọn̄ ye eto.—Genesis 1:11, 12, 30.

AFIA esiwak ndida mban̄a un̄wana, n̄kpọ emi asanade onyụn̄ ananade ndudue. Ntak edi oro mme owo ẹsiwakde ndidọhọ, “Ubọk mi afia-o” ndiwụt ke inyeneke se mmimọ iduede owo. Afia n̄ko ada aban̄a eti ido. Uduot emi Bible asiakde awak akan edi afia. Mme owo ye mme angel emi ẹkekụtde ke n̄kukụt ẹkesịne mfia ọfọn̄idem emi adade aban̄a edinen ye edisana ido. (John 20:12; Ediyarade 3:4; 7: 9, 13, 14) Afia enan̄-mbakara ye mme andiwat emi ẹsịnede mfia ndisana linen ẹda ẹban̄a edisana ekọn̄ Abasi. (Ediyarade 19:14) Abasi ada afia owụt nte imọ imade ndifen idiọkn̄kpọ nnyịn. Ke uwụtn̄kpọ, Abasi ọdọhọ ke Isaiah 1:18 ete: “Mme idiọkn̄kpọ mbufo ẹkpetie nte iduot, ẹyenam mmọ ẹfia nte snow.”

NSIO NSIO UDUOT ẸSINAM OWO ETI N̄KPỌ

Nte Bible etịn̄de aban̄a nsio nsio uduot owụt ke Abasi ọfiọk nte mme uduot emi ẹsitiede nnyịn ke idem ke ima ikụt mmọ. Ke uwụtn̄kpọ, n̄wed Ediyarade ama etịn̄ se iwọrọde nnyịn idahaemi, oro edi, akan̄, ekọn̄, ye nte udọn̄ọ ye biọn̄ owotde owo. Abasi okowụt John mme enan̄-mbakara emi ẹdide ke uduot ke uduot ke n̄kukụt. Uduot emi kiet kiet anam nnyịn iti se mme enan̄-mbakara emi ẹdade ẹban̄a.

Akpa ekedi afia enan̄-mbakara emi adade aban̄a edinen ekọn̄ emi Christ Jesus edin̄wanade. Ọyọhọ iba ekedi ididuot enan̄-mbakara emi adade aban̄a ekọn̄ ererimbot emi. Obubịt enan̄-mbakara etiene enye emi ke edem, ndien enye oro ada aban̄a akan̄. Akpatre edi “ntọn̄ntọn̄ enan̄-mbakara; ndien andidoro enye ke edem ekere N̄kpa.” (Ediyarade 6:1-8) Uduot enan̄-mbakara emi kiet kiet ekekem ye se mmọ ẹdade ẹban̄a onyụn̄ ekeme ndinam idem enyek owo mîdịghe anam esịt enem owo. Nnyịn imesisọp iti se mme enan̄-mbakara emi ẹdade ẹban̄a ke ntak uduot mmọ.

Bible awak ndida nsio nsio uduot n̄kpep owo n̄kpọ. Abasi emi okobotde un̄wana, nsio nsio uduot, ye enyịn emi idade ikụt mme uduot emi ada nsio nsio uduot ekpep nnyịn n̄kpọ. Emi esinen̄ede an̄wan̄a nnyịn, inyụn̄ iyakke isọp ifre se ikpepde. Omokụt do ke nsio nsio uduot ẹsikpep nnyịn ediwak n̄kpọ, enem nnyịn ke idem mîdịghe enyek nnyịn idem. Uduot esinyụn̄ anam nnyịn isọp iti n̄kpọ. Nsio nsio uduot ẹdi enọ Abasi.