Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME SEPTEMBER 2013

Ufen Ọmọn̄ Etetre!

Ufen Ọmọn̄ Etetre!

Kere nte okpodude ke ererimbot emi owo mîbọhọ ufen ndomokiet—owo inamke ibak, in̄wanake ekọn̄, owo idọn̄ọke, mme oto-obot afanikọn̄ inyụn̄ itịbeke aba. Kere nte edemerede kpukpru usenubọk ufịnake idem m̀mê ididia nso, idisịne nso, unyụn̄ utịmekede esịt ke ntak asari m̀mê ufịk. Ndi emekere ke emi ekeme nditịbe? Imọdiọn̄ọ ke idụhe owo m̀mê ukara ndomokiet emi ekemede ndinam emi. Edi Abasi ọn̄wọn̄ọ nditre kpukpru ufen emi ibọde mi, ye mme n̄kpọ oro ikenemede ke ibuotikọ emi ekebemde iso. Se mme n̄kpọ emi Abasi ọn̄wọn̄ọde ke Bible mi:

ETI UKARA

“Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”—Daniel 2:44.

Obio Ubọn̄ Abasi edi ukara Abasi emi odude ke heaven. Abasi emek Jesus Christ nte Andikara ke Obio Ubọn̄ oro, ndien Obio Ubọn̄ emi ayada itie kpukpru ukara owo onyụn̄ anam ẹnam uduak Abasi ke isọn̄ emi nte ẹnamde ke heaven. (Matthew 6:9, 10) Ukara ndomokiet ididaha itie ukara Abasi, sia enye edide “nsinsi obio ubọn̄ Ọbọn̄ ye Andinyan̄a nnyịn Jesus Christ.” Emem oyodu ke nsinsi ini oro.—2 Peter 1:11.

NSUNSU IDO UKPONO IDIDỤHE ABA

“Satan ke idemesie ke oforo angel un̄wana. Ntre idịghe akwa n̄kpọ edieke mme asan̄autom esie n̄ko ẹforode mme asan̄autom edinen ido. Edi utịt mmọ eyekem ye mme utom mmọ.”—2 Corinth 11:14, 15.

Mme owo ẹyekụt ke nsunsu ido ukpono edi ubọkutom Devil, ẹyenyụn̄ ẹsobo mmọ ke nsinsi. Kpukpru usua, ibak, ye afai emi ẹnamde ke enyịn̄ ido ukpono ẹyetre. Emi ayanam kpukpru mbon emi ẹmade “odu-uwem ye ata Abasi” ẹdiana kiet ẹtuak ibuot ẹnọ enye ke “spirit ye ke akpanikọ.”—1 Thessalonica 1:9; Ephesus 4:5; John 4:23.

MME OWO ẸYEFỌN ẸMA

“Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4.

Jehovah Abasi edida Jesus Eyen esie, emi akakpade ọnọ nnyịn, inam emi. (John 3:16) Jesus  ayanam mme owo ẹfọn ẹma. Mme owo idibọhọ ufen aba, sia ‘Abasi ke idemesie oyodu ye nnyịn, onyụn̄ ọkwọhọde kpukpru mmọn̄eyet ke enyịn nnyịn efep.’ Nte ima iketetịn̄, mme owo ẹyefọn ẹma idinyụn̄ ibọhọ ufen aba. “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

SATAN YE MME DEMON IDIDỤHE ABA

“Enye [Jesus Christ] omụm dragon oro, kpa akani urụkikọt, emi edide Devil ye Satan, onyụn̄ ọkọbi enye ke isua tọsịn kiet. Enye onyụn̄ otop [Satan] esịn ke editụn̄ọ ukpe onyụn̄ ekịbi ukpe oro abaha enye onyụn̄ efịk ufịkn̄kpọ, man enye okûtụn mme idụt usụn̄ aba.” —Ediyarade 20:2, 3.

Ofụri ufen emi Satan ọnọde nnyịn mi ẹyetre ẹma ẹkọbi enye ye mme demon esie ke “editụn̄ọ ukpe.” Oro ọwọrọ ke ẹyebọ kpukpru mmọ odudu. Mmọ idikemeke aba ndinam owo ndomokiet n̄kpọ. Eyenen̄ede enem ndidu ke ererimbot oro Satan ye mme demon mîdụhe aba.

“MME AKPATRE USEN” EMI ẸYEBE ẸFEP

“Akwa ukụt” emi Jesus eketịn̄de aban̄a edida “mme akpatre usen” emi ikesịm utịt. Jesus ọkọdọhọ ete: “Adan̄aoro akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” —Matthew 24:21.

Emi edidi ata akwa ukụt, sia se iditịbede ini oro itịbeke akanam. Ekọn̄ Abasi emi Bible okotde Armageddon ayada kpukpru emi ekesịm utịt.—Ediyarade 16:14, 16.

Kpukpru mbon oro ẹmade Abasi ke ẹbet ini emi idiọk ererimbot emi edibede ifep. Yak ineme edidiọn̄ ifan̄ emi idibọde ke ini emi Abasi edikarade isọn̄ emi.

MME N̄KPỌ EN̄WEN EMI ABASI EDINAMDE

“Akwa otuowo” ẹyebe ẹdụk obufa ererimbot ẹnyụn̄ ẹdu ke emem: Bible ọdọhọ ke “akwa otuowo emi baba owo kiet mîkemeke ndibat” ẹyebọhọ “akwa ukụt” ẹdụk obufa ererimbot. (Ediyarade 7:9, 10, 14; 2 Peter 3:13) Mmọ ẹyediọn̄ọ ke Jesus Christ, kpa “Eyenerọn̄ Abasi oro emende idiọkn̄kpọ ererimbot efep” anam mmimọ ibọhọ.—John 1:29.

Ukpep emi Abasi edinọde ọyọfọn ye nnyịn: “Ifiọk Jehovah ọyọyọhọ isọn̄” ke obufa ererimbot. (Isaiah 11:9) Abasi eyekpep nnyịn nte ikpodude ke emem ye kpukpru owo ye nte ikpakamade isọn̄ emi. Kop se Abasi etịn̄de mi: “Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade.”—Isaiah 48:17.

Abasi ayanam mbon nnyịn oro ẹkekpan̄ade ẹset: Ke ini Jesus okodude ke isọn̄, enye ama anam Lazarus ufan esie eset. (John 11:1, 5, 38-44) Enye okowụt ke iyanam se ikande oro ke Obio Ubọn̄ Abasi.—John 5:28, 29.

Kpukpru owo ẹdidu ke emem sia idiọkn̄kpọ ididụhe aba: Idiọkn̄kpọ ididụhe aba ke ini ukara Christ. Nnyịn isan̄a didie ifiọk? Edi koro Jesus ọdiọn̄ọ se owo kiet kiet ekerede. Enye ọfiọk kpukpru mbon oro ẹnamde eti ye idiọk. Ntre enye idiyakke mbon oro mîmaha ndikabade esịt nnam se ifọnde ẹdu ke obufa ererimbot Abasi oro.—Psalm 37:9, 10; Isaiah 11:3, 4; 65:20; Matthew 9:4.

Bible owụt ke se Abasi edinamde inọ nnyịn ini oro akam akan se inemede emi. Emem oyodu ke ofụri isọn̄ ke nsinsi nsinsi ke ini Abasi edikarade isọn̄ emi. (Psalm 37:11, 29) Abasi eyetre kpukpru se isinamde nnyịn ibọ ufen. Kop se Abasi ke idemesie ọn̄wọn̄ọde mi: “Sese! Mmanam kpukpru n̄kpọ ẹdi mbufa. . . . Ikọ emi edi akpanikọ ye se ẹkemede ndibuọt idem.”—Ediyarade 21:5.