Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME SEPTEMBER 2013

Ntak Emi Ibọde Ufen Ntem-e?

Ntak Emi Ibọde Ufen Ntem-e?

Man ifiọk ntak emi ibọde ufen ntem ye ntak emi mme owo mîkemeke nditre ufen, ana idiọn̄ọ kan̄a se idade kpukpru ufen emi isọk nnyịn. Nsio nsio n̄kpọ ẹsinam ibọ ufen, ndien ediwak owo ifiọkke ntak emi ibọde ufen ntem. Edi n̄kpọ inemesịt ndidiọn̄ọ ke Bible etịn̄ ntak emi ibọde ofụri ufen emi. Imọn̄ ineme akpan ntak ition ke ibuotikọ emi, oro anamde ibọ ufen ntem ke ererimbot emi. Mbọk kot se Bible etịn̄de. Emi ayanam enen̄ede okụt ntak emi ibọde ufen ntem.—2 Timothy 3:16.

IDIỌK UKARA

Bible ọdọhọ ete: “Ke ini idiọkowo akarade, mbio obio ẹseme.”—Mme N̄ke 29:2.

Toto ke eset, n̄kpọsọn̄ owo emi ẹkarade mme owo ke ọkpọsọn̄ ubọk ẹsinam mme owo ẹbọ ufen. Edi akpanikọ nte ke idịghe kpukpru mme andikara ẹsinam emi. Ndusụk owo ẹsiduak ndin̄wam mbon oro mmọ ẹdikarade, edi ke ndondo oro mmọ ẹtọn̄ọde ndikara, mme idiọkowo emi ẹtienede mmọ ẹkara isiyakke mmọ ẹnam se mmọ ẹkeduakde. N̄kpọ en̄wen edi ke ndusụk mme andikara ẹsida ini oro mmọ ẹkarade ẹyom ufọn idem mmọ, ndien emi esinam mbon emi mmọ ẹkarade ẹbọ ufen. Akwaowo ukara United States emi ekerede Henry Kissinger ọkọdọhọ ete: “Toto ke eset, mme andikara isikemeke ndin̄wam mme owo nte mmọ ẹkeduakde, m̀mê ndinam se mmọ ẹken̄wọn̄ọde.”

Bible ọdọhọ n̄ko ete: “Ikam isịneke ke ubọk owo eke asan̄ade ndinen̄ede ikpatisan̄ esiemmọ.” (Jeremiah 10:23) Sia mme owo mîfọnke ima, mmọ inyeneke ọniọn̄ ye ikike ikem ndida nnen̄ede ikpatisan̄ mmọ. Ndien, edieke owo mîkemeke ndinen̄ede ikpatisan̄ esiemmọ, ndi enye eyekeme ndinen̄ede eke ofụri idụt emi enye akarade? Idịghe omokụt ntak emi mme andikara nnyịn mîkemeke nditre ufen emi ibọde mi? Ke nditịm ntịn̄, idiọk ukara etiene anam ibọ ufen ntem!

NSUNSU IDO UKPONO

Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” —John 13:35.

Mme etubom nsio nsio ufọkabasi ẹsikwọrọ ima ye edidianakiet. Edi mmọ ikpepke mbon ufọkabasi mmọ ndinyene utọ ima emi ekemede ndinam mme owo ẹtre asari. Utu ke oro, mmọ ẹkam ẹnanam mme owo ẹsua kiet eken, inyụn̄ iyakke mme idụt ẹdiana kiet. Hans Küng emi esikpepde n̄kpọ aban̄a ido ukpono ọkọdọhọ ete: “Ido ukpono ẹbak ibak ẹkan ke ererimbot emi. Mmọ ẹkere  ke se inamde emi idiọkke, ke inam inọ Abasi.”—Christianity and the World Religions.

N̄kpọ efen edi nte ke mme etubom ediwak ufọkabasi ẹnyịme mbon emi mîdọhọ ndọ ẹnam use, ẹnyịme mbon emi ẹdọde ndọ ẹsịn efịbe, ẹnyụn̄ ẹnyịme erenowo adan̄ ye erenowo, n̄wan onyụn̄ adan̄ ye n̄wan. Utọ n̄kpọ emi anam mme owo ẹmen udọn̄ọ ye idịbi ntịme ntịme, abiat ndọ, onyụn̄ ada akpakịp afanikọn̄ ye ufen ọsọk mme owo.

OWO IFỌNKE IMA

“Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ emi oyomode, aman idiọkn̄kpọ.”—James 1:14, 15.

Kpukpru nnyịn ikadada idiọkn̄kpọ imana. Emi esinam ọdọn̄ nnyịn ndinam idiọkn̄kpọ, enye esinyụn̄ anam in̄wan̄wana man itre “mme n̄kpọ oro obụkidem ye ekikere nnyịn ẹduakde.” (Ephesus 2:3) Isimemke owo ndimụm idem n̄kama ke ini enye enyenede ufan̄ ndinam n̄kpọ emi enen̄erede ọdọn̄ enye. Ima idedei inam idiọkn̄kpọ emi ọdọn̄de nnyịn, emi ekeme ndida nnyịn n̄kesịn ke fehesan̄!

Ete kiet emi ekerede P. D. Mehta ekewet ete: “Ofụri ufen oro ibọde mi edi ke ntak akpakịp idiọkn̄kpọ oro ẹsidọn̄de nnyịn, ke ntak emi nnyịn mîkemeke ndifara ke idem, ye ke ntak idiọkitọn̄ ye uyom ikpọ n̄kpọ.” Akpakịp idiọkn̄kpọ emi ẹsịne owo ndin̄wọn̄ ọkpọsọn̄ mmịn mbe ubọk, ndida n̄kpọsọn̄ ibọk, ndibre mbre mfọniso, use, efịbe, ye mme n̄kpọ ntre. Mme n̄kpọ emi ẹbiat ediwak nti owo ẹnyụn̄ ẹnam ufọk mmọ, mme ufan, ye mbon en̄wen ẹbọ ufen. Kpukpru nnyịn imenen̄ede ikụt nte mme owo ẹbọde ufen kpa nte Bible eketịn̄de.—Rome 8:22.

SATAN YE MME DEMON

Bible ọdọhọ ke Satan edi “abasi editịm n̄kpọ emi” ye nte ke mme demon emi ẹnyụn̄ ẹkopde odudu n̄ko ẹtiene enye ẹkara ererimbot emi.—2 Corinth 4:4; Ediyarade 12:9.

Mme demon emi ẹnyụn̄ ẹtụn mme owo usụn̄ nte Satan eteufọk mmọ. Apostle Paul ama ọsọn̄ọ emi ete: “Nnyịn imenyene en̄wan ndin̄wana, idịghe ye obụk ye iyịp, edi in̄wana ye mme ukara, ye mme odudu, ye mme andikara ekịm ererimbot emi, ye odudu ndiọi spirit ke enyọn̄.”—Ephesus 6:12.

Okposụkedi emi mme demon ẹsikopde inemesịt ndimia mme owo ufen, se mmọ ẹsinen̄erede ẹyom edi ndinam mme owo ẹwọn̄ọde ẹkpọn̄ Jehovah. (Psalm 83:18) Mmọ ke ẹda mme n̄kpọ nte edisiak ntantaọfiọn̄, mfọni, ibọk, ye ubre idiọn̄ ẹbian̄a ẹnyụn̄ ẹtap mme owo. Ntak edi oro Jehovah anamde nnyịn idiọn̄ọ emi man nnyịn ididuọ idụk ubọk Satan ye mme demon esie.—James 4:7.

NNYỊN IDU UWEM KE “MME AKPATRE USEN”

Bible ama etịn̄ ke n̄kpọ nte tọsịn isua iba emi ẹkebede ete ke “ndiọkeyo emi ọsọn̄de ndiyọ oyodu ke mme akpatre usen.”

Bible ama onyụn̄ etịn̄ se idinamde eyo nnyịn ọdiọk ete: “Koro mme owo ẹyedi mme ama idem, mme ama okụk, ẹkohode idem, ẹseri iseri, . . . inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi.” Ke akpanikọ, akpan ntak emi nnyịn ibọde ufen ntem edi sia nnyịn idude uwem ke “mme akpatre usen.”—2 Timothy 3:1-4.

Ke ima ikeneme mme n̄kpọ emi, ndi ukwe ndien ntak emi owo mîkemeke nditre ofụri ufen emi ibọde mi idem ọkpọkọm enen̄ede ọdọn̄ mmọ ndinam emi? Anie ndien ikeme nditre? Abasi kpọt ekeme nditre. Enye ọn̄wọn̄ọ ‘ndibiat utom Devil’ ye eke ikọt esie. (1 John 3:8) Ibuotikọ oro etienede eyeneme se Abasi edinamde man etre ofụri ufen emi ibọde mi.