Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME SEPTEMBER 2013

 SAN̄A KPERE ABASI

“Abasi Amama Owo Eke Ọnọde ke Idatesịt”

“Abasi Amama Owo Eke Ọnọde ke Idatesịt”

Nso utọ owo ke afo esima ọnọ fi n̄kpọ? Ediwak nnyịn isima owo emi ọnọde nnyịn n̄kpọ ke imaesịt, idịghe owo emi ọnọde nnyịn n̄kpọ mbak ẹdidọhọ. Abasi n̄ko ama owo emi ọnọde owo n̄kpọ ke imaesịt. Yak ise se Abasi ọkọdọhọde apostle Paul ewet ke 2 Corinth 9:7.

Ntak emi Paul ekewetde ikọ emi? N̄kpọ ama ọsọn̄ etieti ye mme Christian ke Judea, ntre Paul okoyom nditọete ke Corinth ẹn̄wam mmọ. Ndi enye ekenyenyịk mme Christian oro ndinọ enọ? Ihih, utu ke oro, enye ekewet ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” Ẹyak itịm ise se ikọ Paul emi ọwọrọde.

“Kpa nte enye ebierede ke esịt esie.” Paul ọdọhọ ke ata Christian esinọ owo n̄kpọ sia enye ekebierede “ke esịt esie” ndinọ. Ntem, Christian esinen̄ede ekere nte n̄kpọ etiede ye nditọete esie. Enye esitie ekere se inanade nditọete esie onyụn̄ ekere se imọ ikpanamde man in̄wam mmọ.—1 John 3:17.

“Okûnam mmen̄e mmen̄e m̀mê ke edinyenyịk.” Ikọ Paul emi owụt ke mme Christian isinọhọ enọ mmen̄e mmen̄e, isinyụn̄ inọhọ ke edinyenyịk. Ikọ Greek oro ẹkabarede “mmen̄e mmen̄e” ekeme ndiwọrọ “mfụhọ mfụhọ.” N̄wed kiet ọdọhọ ke owo emi ọnọde owo n̄kpọ mmen̄e mmen̄e “esikere ke n̄kpọ ọmọn̄ atak imọ.” Owo emi ẹnyịkde-nyịk isinọhọ owo n̄kpọ ke imaesịt. Anie ke otu nnyịn akpama ndibọ utọ owo oro n̄kpọ?

“Abasi amama owo eke ọnọde ke idatesịt.” Ikọ emi ọwọrọ ke edieke Christian oyomde ndinọ enọ, ke ọfọn enye ọnọ ke idatesịt. Ke akpanikọ, enọ emi ẹnọde ke idatesịt esinem owo ndibọ onyụn̄ enem andinọ. (Utom 20:35) Mme owo ẹsikụt nte esịt enemde owo emi ọnọde enọ ntem. Nte enye anamde n̄kpọ esiwụt ke esịt enem enye ndinọ owo n̄kpọ. Utọ owo emi esinam esịt enem owo onyụn̄ anam enem Abasi n̄ko. Bible en̄wen esịn 2 Corinth 9:7 ntem: “Abasi ama mbon emi ẹmade ndinọ owo n̄kpọ.”—Contemporary English Version.

“Abasi ama mbon emi ẹmade ndinọ owo n̄kpọ”

Se Abasi ọkọdọhọde apostle Paul ewet mi owụt nte mme Christian ẹkpesinọde enọ. Mmọdo, se ededi oro inọde m̀mê inamde inọ owo, ẹyak inam ke imaesịt. Utọ enọ emi esinọ owo inemesịt akpan akpan edieke inọde mbon oro mînyeneke n̄kpọ. Ih, “Abasi amama owo eke ọnọde [owo n̄kpọ] ke idatesịt.”

Itie Bible emi okpokotde ke September

1 ye 2 Corinth