Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  July 2013

Ndi Amama nte Ndusụk Ufọkabasi Ẹsinamde N̄kpọ ke Ini Ekọn̄?

Ndi Amama nte Ndusụk Ufọkabasi Ẹsinamde N̄kpọ ke Ini Ekọn̄?

Alberto ama an̄wana ekọn̄ ke n̄kpọ nte isua duop. Enye ọdọhọ ete: “Etubom ufọkabasi nnyịn ama esibọn̄ akam ọnọ nnyịn ete, ‘Ọbọn̄ odu ye mbufo.’ Ami mma nsikere ntak emi n̄kade ndin̄wana ekọn̄ n̄wot owo ke ini Bible ọdọhọde ‘kûwot owo.’”

Ray ekesin̄wana ekọn̄ mmọn̄ ke ini ọyọhọ Ekọn̄ Ererimbot II. Enye ama obụp ọkwọrọikọ ufọkabasi mmọ ini kiet ete: “Etubom, afo emesidi edibọn̄ akam ọnọ nnyịn ete ikan ke ekọn̄. Ndi mbon oro ikade ndin̄wana ye mmọ isitieneke ibọn̄ ukem akam emi?” Ọkwọrọikọ oro ọkọdọhọ ke owo ifiọkke n̄kpọ Abasi.

Ndi utọ ibọrọ oro enyene se ọwọrọde? Inyeneke.

NSO KE BIBLE EKPEP?

Jesus ọkọdọhọ ke kiet ke otu n̄kponn̄kan ibet Abasi edi owo ‘ndima mbọhọidụn̄ esie nte idemesie.’ (Mark 12:31) Ndi Jesus ọkọdọhọ ima mbon idụt nnyịn kpọt? Ihih. Enye ọkọdọhọ mbet esie ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Mmọ ẹkenyene ndima kiet eken tutu mme owo ẹda emi ẹdiọn̄ọ ke mmọ ẹdi mbet Christ. Mmọ ẹkpenyene ndikpa nnọ kiet eken utu ke ndiwot kiet eken.

Mme Christian eyo mme apostle ẹma ẹnam item Jesus emi. N̄wed kiet ọdọhọ ete: “Ikpọ owo ufọkabasi nte Tertullian ye Origen ẹdọhọ ke ẹma ẹwụk mme Christian ẹte ẹkûwot owo, ndien ke emi akanam mmọ ẹkûdụk ekọn̄.”—The Encyclopedia of Religion.

NDI MME NTIENSE JEHOVAH ẸNAM SE BIBLE EKPEPDE?

Sia Mme Ntiense Jehovah ẹdude ke kpukpru idụt, ke ini ekọn̄ asiahade, mmọ isitieneke in̄wana. Mmọ ẹsinam se ẹkekeme ndiwụt ke imama kiet eken kpukpru ini.

Ndi mme ọkwọrọikọ ufọkabasi ẹkpep mme owo ndinyene ima nte Christ eketemede?

Ke uwụtn̄kpọ, ke ini ekọn̄ akasiahade ke Rwanda ke 1994, mbon Hutu ye mbon Tutsi ẹma ẹwot kiet eken, edi Mme Ntiense Jehovah do iketieneke iwot owo ndomokiet. Mme Ntiense ẹma ẹsimen ikọt mmọ emi ẹtode ekpụk en̄wen ẹdịp, ndien emi ama esida mmọ ibuot ediwak ini. Ke ini ẹkemụmde Ntiense iba emi ẹkedịpde ikọt mmọ emi ẹdide mbon Tutsi, mbon Hutu ẹma ẹdọhọ mmọ ẹte: “Ẹmọn̄ ẹkpa mfịn emi sia ẹnamde mbon Tutsi oro ẹfen̄e.” Mmọ ẹma ẹnyụn̄ ẹwot Ntiense iba oro.—John 15:13.

Afo ekere didie? Ndi idịghe utọ ima emi Mme Ntiense Jehovah ẹnyenede mi ke Jesus ọkọdọhọ mme mbet esie ẹnyene?