Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  July 2013

 EDINYENE NNEME YE MBỌHỌIDỤN̄

Ndi Abasi Okụt Ofụri Ufen Emi Ibọde Mi?

Ndi Abasi Okụt Ofụri Ufen Emi Ibọde Mi?

Se itienede emi edi nte nneme oro Mme Ntiense Jehovah ẹsinyenede ye mme mbọhọidụn̄ mmọ esitiede. Ẹyak ida ke Ntiense emi ekerede Michelle aka ufọk mme Sophia.

ABASI AKPASAN̄A DIDIE AYAK EMI ETỊBE?

Michelle: Tract emi ke inọ mme owo ke efak emi. Enye ekere Nte Akpama Ndifiọk Akpanikọ? Se okwo mi.

Sophia: Okûdi n̄kpọ ufọkabasi ke ada edi oro?

Michelle: Ih. Se mbụme itiokiet emi ẹbụpde ke edem tract emi. Ewe ke—

Sophia: Kûkpa-kpa ndibiat idem ini. Ndikopke.

Michelle: Mbọk edi didie?

Sophia: N̄kereke ke Abasi do.

Michelle: Mmesima ndikụt owo etịn̄de akpanikọ ntem. Mbọk yak mbụp fi ise, Ndi ọkọtọn̄ọ ke ekpri ekere ke Abasi idụhe?

Sophia: Ihih, mma nsika ufọkabasi. Edi ebịghi n̄ketre.

Michelle: Kûyat esịt ke n̄ketịghi nsiak enyịn̄ mi nnọ fi. N̄kere Michelle.

Sophia: Ami n̄kere Sophia.

Michelle: Enyịn̄ fo akam enem mi.

Sophia: Okwo enem n̄ko.

Michelle: Idịghe nte nyom ndinam fi okpụhọde ekikere. Edi ndi enyene se inamde fi ekere ke Abasi idụhe?

Sophia: Ih. Moto ọkọtọ eka mi n̄kpọ nte isua 17 emi ekebede.

Michelle: Hau! N̄kọ n̄kpọ ikanamke enye?

Sophia: Eka mi ikemeke ndisan̄a aba tọn̄ọ oro.

Michelle: Oh, mbọm-o! Utọ n̄kpọ oro ekeme ndinam ibuot ebe owo.

Sophia: Nne imemke utom. Ekpedi Abasi do, n̄kereke ke enye akpayak utọ n̄kpọ emi ọwọrọ mi. Afo ese didie? Ntak emi Abasi ayakde nnyịn ibọ ufen ntem-e?

NDI ỌDIỌK NDIBỤP ABASI NTAK?

Michelle: Idiọkke ndibụp ntak emi Abasi ayakde ibọ ufen. Ọmọdiọn̄ọ ke ata ikọt Abasi ke Bible ẹma ẹsibụp Abasi utọ mbụme emi.

Sophia: Etịn̄ akpanikọ?

Michelle: Ih, yak n̄wụt fi ke Bible.

Sophia: Ọfọn, wụt mi ise.

Michelle: Se se ata prọfet Abasi okobụpde Abasi mi ke Habakkuk ibuot 1, ufan̄ikọ 2 ye 3. Itie oro ọdọhọ ete: “O Jehovah, adan̄a didie ke nditua nyom un̄wam, ndien afo ukopke? Adan̄a didie ke ndiseme n̄kot fi nyom un̄wam man mbọhọ afai, ndien afo unyan̄ake? Ntak emi afo anamde mi n̄kụt se idiọkde?” Ndi idịghe se onyụn̄ obụpde edi oro?

Sophia: Enye!

Michelle: Abasi ikamiaha Habakkuk ufen ke ndibụp mbụme emi, ikonyụn̄ idọhọke ke enye inyeneke mbuọtidem.

Sophia: Akpa ndikop utọ n̄kpọ emi edi emi.

INEMKE JEHOVAH NTE NNYỊN IBỌDE UFEN

Michelle: Bible ọdọhọ ke Abasi ke okụt ufen emi ibọde, ndien ke emi esifịna enye.

Sophia: Etịn̄ akpanikọ?

Michelle: Ih, yak n̄wụt fi ke Bible. Odu ke Exodus 3:7. Mbọk kot ise.

Sophia: Ọfọn. Itie oro okot ete: “Jehovah onyụn̄ ọdọhọ ete: ‘Ke akpanikọ, mmokụt ukụt ikọt mi emi ẹdude ke Egypt, mmonyụn̄ n̄kop eseme emi mmọ ẹsemede ke ntak mbon oro ẹnyịkde mmọ ẹnam utom; koro mmetịm mfiọk ubiak mmọ.’”

 Michelle: Sọsọn̄ọ etieti. Ndi itie Bible oro iwụtke ke Abasi okụt ofụri ufen emi ibọde mi?

Sophia: Etie nte owụt.

Michelle: Idịghe nte ke enye onyụn̄ esese ntre amia utọn̄ osio, fiak se akpatre udịmikọ oro ise. Abasi ọdọhọ ete: “Mmetịm mfiọk ubiak mmọ.” Ndi owo emi mîkereke iban̄a owo ekpetịn̄ utọ ikọ emi?

Sophia: Ikpetịn̄ke.

Michelle: Itie Bible oro owụt ke se iwọrọde nnyịn esifịna Abasi.

Sophia: Mmokụt ntre.

Michelle: Yak ikot itie Bible en̄wen emi onyụn̄ owụtde ke se iwọrọde ikọt Abasi esifịna enye. Itie oro edi Isaiah 63:9. Akpa udịmikọ ke itie Bible oro ọdọhọ ete: “Ke ofụri ini emi mmọ ẹkedude ke nnanenyịn emi ama abiak enye.” Ndi emi iwụtke ke esifịna Abasi ke ini ikọt esie ẹbọde ufen?

Sophia: Owụt.

Michelle: Nnenne eyeneka, Abasi enen̄ede ama nnyịn, enye iyomke-yom ndikụt nte nnyịn ibọde ufen. Ke nditịm ntịn̄, esibabiak enye ndikụt nte nnyịn ibọde ufen.

NTAK EMI ENYE MÎTREKE UFEN EMI NDIEN-E?

Michelle: Mbemiso nnyọn̄, enyene n̄kpọ en̄wen emi n̄kpamade ndiwụt fi.

Sophia: Wụt mi ise.

Michelle: Se se Bible etịn̄de aban̄a odudu Abasi mi ke Jeremiah 10:12. Mbọk kot itie oro ise.

Sophia: Ọfọn, okot ete: “Enye edi Andinam isọn̄ ke odudu esie, Enye emi adade ọniọn̄ esie ọsọn̄ọ owụk isọn̄, ye Enye emi adade ifiọk esie anyanade ikpaenyọn̄ enịm.”

Michelle: Amanam etieti. Yak ifiak ikere se itie Bible oro etịn̄de ise. Kpukpru se Abasi obotde ke ekondo ẹwụt ke enye enen̄ede enyene odudu, idịghe ntre?

Sophia: Ntre.

Michelle: Edieke Abasi enyenede odudu ndibot utọ akaka ekondo emi, ndi ukereke ke enye enyene odudu ndikpeme se enye okobotde mbak n̄kpọ idinam mmọ?

Sophia: Enyene.

Michelle: Mbọk yak mbụp fi ise, Nso inam afịna fi ndikụt eka fo ọbọde ufen?

Sophia: Eka mi ke edi nan̄a. Mmama enye etieti.

Michelle: Ndien edieke ekpenyenede odudu ndinam enye afiak adaha ada asan̄a, ndi ukpunamke?

Sophia: N̄kpanam.

Michelle: Ọfọn kere ise. Bible ọdọhọ ke Abasi okụt kpukpru ufen emi ibọde, ke esinyụn̄ abiak enye ndikụt nte nnyịn ibọde ufen. Bible ọdọhọ n̄ko ke Abasi enyene odudu etieti. Ndi enye nditre ndinam n̄kpọ kpa ye oro abiakde enye ndikụt nte ibọde ufen iwụtke ke Abasi enen̄ede omụm idem akama?

Sophia: Akanam n̄kereke-kere n̄kpọ n̄ka n̄kan̄ oro.

Michelle: Ndi ukereke ke enyene se inamde Abasi omụm idem akama utu ke nditre kpukpru ufen emi ibọde mi idahaemi? *

Sophia: Mmekere.

Michelle: Etie nte fon fo anam oro. Mma ndi usen en̄wen, iyafiak ineme n̄kpọ emi.

Sophia: Mbọk amanam etieti. Nyebet fi. *

Ndi enyene n̄kpọ emi mîn̄wan̄ake fi ke Bible? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, bụp mmọ ke ini osobode ye mmọ. Mmọ ẹyema ndineme n̄kpọ emi ye afo.

^ ikp. eki. 61 Edieke oyomde ndifiọk n̄kpọ en̄wen mban̄a emi, mbọk kot ibuot 11 ke n̄wed Mme Ntiense Jehovah emi, Nso ke Bible Enen̄ede Ekpep?

^ ikp. eki. 64 Ibuotikọ emi idinemede ini en̄wen edi ntak emi Abasi ayakde ibọ ufen.

Kpep N̄kpọ En̄wen

ENYỌN̄-UKPEME

Ntak Emi Abasi Ayakde Ibọ Ufen-e?

Genesis etịn̄ ntak emi Abasi ayakde nsio nsio n̄kpọ etịbe kpa ye oro enye enyenede odudu nditre mmọ.