Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JUNE 2013

Ndi Ikpọbọn̄ Akam Inọ Ndisana Owo?

Ndi Ikpọbọn̄ Akam Inọ Ndisana Owo?

ANIE akanam mînyeneke mfịna tutu enye oyom owo edin̄wam imọ? Nnyịn isima ndika mbịne owo emi esikopde owo mbọm onyụn̄ enen̄erede ọdiọn̄ọ mfịna emi isobode. Utọ owo emi ke mme owo ẹsiwak ndinam ufan.

Ndusụk owo ẹsinam ntre ke ini ẹyomde ndibọn̄ akam. Utu ke ndibọn̄ nnọ Abasi emi mmọ ẹkerede ke okon̄ onyụn̄ enyene uten̄e akaha ndikpan̄ utọn̄ nnọ mmimọ, mmọ ẹma ndibọn̄ nnọ ndisana owo. Mmọ ẹsidọhọ ke ndisana owo ẹma ẹsisobo idomo ye mme mfịna emi mmimọ isobode, ke emi ayanam mmọ ẹtua mmimọ mbọm. Ke uwụtn̄kpọ, mbon emi ata akpan n̄kpọ mmọ ọbọhọde mmọ osop ẹsibọn̄ akam ẹnọ Saint Anthony emi ẹdọhọde ke esidiọn̄ọ mme n̄kpọ emi ẹsopde. Edieke ufene owo ọdọn̄ọde, mmọ ẹsibọn̄ akam ẹnọ Saint Francis, edi edieke esịt ọduọde mmọ, mmọ ẹbọn̄ ẹnọ Saint Jude Thaddeus.

Nnyịn isan̄a didie ifiọk m̀mê N̄wed Abasi enyịme nnyịn ibọn̄ akam inọ ndisana owo? Sia isibọn̄de inọ Abasi, oyom ibụp idem nnyịn mbụme emi: Ndi Abasi esikop akam nnyịn? Enye ada didie akam emi ẹbọn̄de ẹnọ ndisana owo?

SE BIBLE ETỊN̄DE ABAN̄A EDIBỌN̄ AKAM NNỌ NDISANA OWO

Mme owo ẹsibọn̄ akam ẹnọ ndisana owo sia Ufọkabasi Catholic ẹkpepde ke ndisana owo emi ẹsimen akam mme owo ẹbịne Abasi. Catechism Ufok Abasi Catholic ọdọhọ ete: “Nnyịn ibọn̄ akam inọ mme ndisana owo ndikpono mmọ nte mme ufan Abasi, ndinyụn̄ mben̄e un̄wam mmọ. . . . Nnyịn iben̄e mme ndisana owo ndikpe Abasi ubọk nnọ nnyịn.” Ntem, owo emi ọbọn̄de akam ọnọ ndisana owo ekere ke sia ndisana owo ẹdide ufan Abasi, ke emi ayanam Abasi atua imọ mbọm.

Ndi Bible osụk ekpep utọ n̄kpọ oro? Ndusụk owo ẹdọhọ ke apostle Paul ekebem iso etịn̄ aban̄a edibọn̄ akam nnọ ndisana owo. Mmọ ẹsitịn̄ ẹban̄a se enye ekewetde ọnọ mme Christian ke Rome ete: “Mmada enyịn̄ Ọbọn̄ nnyịn Jesus Christ ye ima spirit n̄kpe mbufo ubọk, nditọete, nte, mbufo ẹtiene mi ẹsịn idem ẹbọn̄ akam ẹnọ Abasi ẹban̄a mi.” (Rome 15:30) Nso ke itie Bible emi owụt? Paul ikọbọn̄ke akam inọ mme Christian emi ite ẹmen eben̄e imọ ẹbịne Abasi. Edieke edide Abasi enyịme esinam emi, mmọ ẹkpekam ẹbọn̄ akam ẹnọ Paul sia enye ekedi apostle Christ. Paul okowụt ke idiọkke ndidọhọ Christian  nte nnyịn esịn nnyịn ke akam. Emi idịghe ukem nte ndibọn̄ akam nnọ owo emi nnyịn ikerede ke odu ke heaven man enye emen eben̄e nnyịn ebịne Abasi. Ntak idọhọde ntre?

Jesus ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Afiak ọdọhọ ke ‘Ete ọyọnọ mme mbet se ededi oro mmọ ẹdiben̄ede Ete ke enyịn̄ imọ.’ (John 15:16) Jesus ikọdọhọke ibọn̄ akam inọ imọ ndien ke imọ iyetịn̄ se nnyịn iben̄ede inọ Abasi. Utu ke oro, edieke iyomde Abasi okop akam nnyịn, ana ibọn̄ inọ Abasi ke enyịn̄ Jesus idịghe ke enyịn̄ owo en̄wen ekededi.

Ke ini mme mbet Jesus ẹkedọhọde enye ekpep mmimọ ndibọn̄ akam, enye ọkọbọrọ ete: “Ini ekededi eke mbufo ẹbọn̄de akam, ẹdọhọ ẹte, ‘Ete, yak ẹnam enyịn̄ fo asana.’” (Luke 11:2) “Ini ekededi” emi ibọn̄de akam, ana ibọn̄ inọ Abasi ke idemesie, idịghe ndibọn̄ nnọ Jesus m̀mê owo en̄wen ekededi. Ndi se Jesus ekekpepde emi inen̄ekede iwụt ke ana ibọn̄ akam nnyịn inọ Abasi ikpọn̄-ikpọn̄ ke enyịn̄ Jesus Christ utu ke ndibọn̄ nnọ owo en̄wen m̀mê “ndisana owo”?

Akam edi utuakibuot, ndien Bible idọhọke ituak ibuot inọ owo en̄wen ke ebede Abasi. (John 4:23, 24; Ediyarade 19:9, 10) Ntak edi oro anade isibọn̄ akam inọ Abasi ikpọn̄-ikpọn̄.

NDI AKPANA EFEHE NDIBỌN̄ AKAM NNỌ ABASI?

Ke ini Jesus ọkọkwọrọde ikọ ke Obot, enye ama ọnọ uwụtn̄kpọ aban̄a eyen emi eben̄ede ete esie udia. Ndi ata ete ọkpọnọ eyen esie itiat ke ini eyen eben̄ede enye uyo? Ewe ete ọkpọnọ eyen esie urụkikọt utu ke ndinọ iyak? (Matthew 7:9, 10) Idụhe ete ndomokiet emi akpanamde utọ n̄kpọ emi!

Abasi oyom nnyịn ineme nneme ye imọ kpa nte ete esiyomde eyen eneme nneme ye imọ

Yak idọhọ ke afo emenyene eyen. Ndien enyene akpan n̄kpọ emi enye oyomde ndiben̄e fi. Afo emenen̄ede ama eyen emi, emesinyụn̄ eneme nneme ye enye. Edi ndịk iyakke enye edi ke idemesie ediben̄e fi se enye oyomde. Ekpetie fi didie ke idem edieke enye akade ọkọdọhọ owo efen ediben̄e fi n̄kpọ oro ọnọ imọ? Ndi esịt ekpenem fi edieke eyen fo emi akade iso anam emi ini ekededi emi enye oyomde fi anam n̄kpọ ọnọ imọ? Imọfiọk ke esịt ikpenemke fi. Mme ete ye eka ẹsiyom nditọ mmọ ẹdi ke idemmọ ẹditịn̄ se ededi oro mmọ ẹyomde ẹnọ mmimọ.

Ke Jesus ama ọkọnọ uwụtn̄kpo eyen emi oyomde ete ọnọ imọ udia mi ama, enye ama ọdọhọ ete: “Ke ntre, edieke mbufo, okposụkedi emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo emi odude ke heaven edinọ mbon oro ẹben̄ede enye nti n̄kpọ!” (Matthew 7:11) Ke akpanikọ, esidọn̄ mme ete ye eka ndinọ nditọ mmọ nti n̄kpọ, edi esinen̄ede ọdọn̄ Ete nnyịn eke heaven ndikop akam nnyịn.

Abasi oyom ibọn̄ akam inọ enye, idem ọkpọkọm idiọkn̄kpọ oro ikanamde ke osụk afafịna nnyịn. Enye idọhọke mbon en̄wen ẹyere akam nnyịn. Bible ọdọhọ nnyịn ete: “Top mbiomo fo nọ Jehovah, ndien enye ọyọsọn̄ọ fi idem.” (Psalm 55:22) Ntre, akpana isibọn̄ akam inọ Jehovah Abasi ikpọn̄-ikpọn̄ utu ke ndibọn̄ nnọ ndisana owo m̀mê owo en̄wen ekededi.

Ete nnyin eke heaven esikere aban̄a nnyịn owo kiet kiet. Enye oyom ndin̄wam nnyịn, ntre enye ọdọhọ nnyịn isan̄a ikpere imọ. (James 4:8) Esịt enem nnyịn didie ntem ndikeme ndisan̄a n̄kpere Ete nnyịn eke heaven emi edide “Andikop akam”!—Psalm 65:2.