Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JUNE 2013

 KPEP NDITỌ FO

Nso ke Ikeme Ndikpep Nto Abiatibet?

Nso ke Ikeme Ndikpep Nto Abiatibet?

Imekeme ndikpep n̄kpọ nto abiatibet emi Jesus etịn̄de ikọ ọnọ mi ke ndise emi. Enye atua n̄kpọfiọk aban̄a mme idiọkn̄kpọ oro enye akanamde. Ekem enye ọdọhọ Jesus ete: “Ti mi ke ini afo odụkde obio ubọn̄ fo.” Ndien nte osụk okụtde ke ndise emi, Jesus ke etịn̄ ikọ ye enye. Ndi ọmọfiọk se Jesus ọdọhọde enye? * Jesus ọdọhọ enye ete: “Ke akpanikọ ke ndọhọ fi mfịn emi, Afo oyodu ye ami ke Paradise.”

Afo ekere ke Paradise oro editie didie?— Man idiọn̄ọ emi, ọfọn ndikere mban̄a nte Paradise emi Abasi ekesịnde Adam ye Eve eketiede. Paradise oro okodu ke m̀mọ̀n̄? Ndi okodu ke heaven, m̀mê okodu ke isọn̄?

Okodu ke isọn̄. Ntre, emi owụt ke abiatibet oro edidu ke isọn̄ emi ẹdinamde edi Paradise. Paradise oro editie didie?— Yak ise.

Ke Jehovah Abasi ama okobot Adam ye Eve ama, Bible ọdọhọ ke enye ama emen mmọ edisịn ke paradise mi ke isọn̄. Ẹkekot enye ‘In̄wan̄ Eden.’ Ndi ọmọfiọk nte in̄wan̄ oro eketiede?— Ke akpanikọ enye ama eye akan ebiet ekededi emi akanam owo ndomokiet okụtde!

Afo ekere didie? Ndi Jesus edidu mi ke isọn̄ ye abiatibet oro?— Ihih, enye editie ke heaven akara isọn̄ oro ẹnamde edi Paradise. Ntem, Jesus edidu ye abiatibet oro ke ndinam enye eset nnyụn̄ nnam ẹse ẹban̄a enye ke Paradise isọn̄. Ntak emi Jesus ediyakde owo emi ekedide abiatibet odụn̄ ke Paradise?— Yak ineme iban̄a emi ndien.

Edi akpanikọ nte ke ete oro ama anam ediwak ndiọi n̄kpọ. Ediwak biliọn owo ẹnyụn̄ ẹnam  ndiọi n̄kpọ ntre ke ererimbot emi. Edi ata ediwak mmọ ẹnam emi sia akanam owo mîkpepke mmọ n̄kpọ iban̄a Jehovah ye se enye oyomde mmọ ẹnam.

Ẹyenam utọ mbon emi ẹset ẹdidu uwem ke Paradise isọn̄, ẹnyụn̄ ẹnam abiatibet oro Jesus eketịn̄de ikọ ọnọ eset n̄ko. Ẹyekpep mmọ nte Abasi oyomde ẹdu uwem. Mmọ ẹyekeme ndien ndiwụt m̀mê mmimọ imama Jehovah.

Ndi ọmọfiọk nte mmọ ẹkemede ndiwụt m̀mê imama Abasi?— Ke mmọ ndinam se Abasi ọdọhọde mmọ ẹnam. Ke akpanikọ, eyenem etieti ndidụn̄ ke Paradise ye mbon oro ẹmade Jehovah ẹnyụn̄ ẹmade ekemmọ owo!

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke akpana ebet onyụn̄ ayak enye ọbọrọ mbụme oro.