Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  June 2013

 SAN̄A KPERE ABASI

Jehovah “Inamke Asari”

Jehovah “Inamke Asari”

Ndi akananam ẹsari fi asari? Ndi owo etre ndinọ fi se oyomde, esịn ndinam n̄kpọ nnọ fi, mîdịghe anam n̄kpọ ye afo nte mîfọnke ke ntak edide obubịt owo, ke ntak ebiet emi otode, ke ntak emi mûkaha n̄wed nte enye, m̀mê ke ntak n̄kpọ ntre? Idịghe afo ikpọn̄ ke emi etịbe ọnọ. Edi iyom ndinam fi ọfiọk ke utọ n̄kpọ oro idụhe ke heaven. Apostle Peter ọkọdọhọ ke “Abasi inamke asari.”—Kot Utom 10:34, 35.

Peter eketịn̄ ikọ emi ke ufọk Cornelius owo Gentile emi enye mîkpakamaha ndidụk. Peter ekedi eyen Jew, ndien ini oro, mme Jew ẹkeda mme Gentile nte mbon emi ẹdehede, emi owo mîkpasan̄ake ikpere. Ntre, nso ikada Peter ika ufọk Cornelius? Jehovah Abasi ọkọdọhọ enye aka. Abasi ama ọdọhọ enye ke n̄kukụt ete: “Tre ndikot n̄kpọ emi Abasi ama akanam asana edidehe.” Peter ikọfiọkke ke Cornelius ama ebebem iso okụt n̄kukụt, ye nte ke angel Abasi ọkọdọhọ enye ete ọdọn̄ ẹkekot Peter. (Utom 10:1-15) Ke ini Peter ọfiọkde ke Jehovah anam emi, enye ikekemeke ndidop uyo aba.

Peter ama ọdọhọ ete: “Ke akpanikọ mmokụt nte Abasi inamke asari.” (Utom 10:34) Ikọ Greek emi ẹkabarede “asari” ke itie emi ọwọrọ “ndise owo iso.” Ataifiọk kiet ọdọhọ ke ikọ emi “aban̄a ayaraiwat emi esede owo iso ebiere ikpe, utu ke ndida se iketịbede mbiere.” Abasi isinamke utọ n̄kpọ emi, enye isarike oro ndomokiet ke ntak ebiet emi enye otode ye mme n̄kpọ ntre.

Utu ke oro, Jehovah ese se isịnede nnyịn ke esịt. (1 Samuel 16:7; Mme N̄ke 21:2) Ekem Peter ọdọhọ ete: “Ke kpukpru idụt enye enyenyịme owo eke abakde enye onyụn̄ anamde edinen ido.” (Utom 10:35) Ndibak Abasi ọwọrọ nditen̄e, n̄kpono, mbuọt idem ke enye nnyụn̄ ntre ndinam n̄kpọ ndomokiet oro ediyatde enye esịt. Ndinam edinen ido edi ndisịn ifịk nnam se inende ke enyịn Abasi. Esịt esinem Jehovah ndikụt owo emi abakde enye onyụn̄ esịnde idem anam se inende.—Deuteronomy 10:12, 13.

Jehovah ada kpukpru nnyịn nte ubon kiet, oro edi, ubonowo

Edieke akanam ẹsaride fi asari, se Peter eketịn̄de aban̄a Abasi ekeme ndidọn̄ fi esịt. Jehovah enyenyịme kpukpru orụk owo ke idụt ekededi ẹtuak ibuot ẹnọ imọ. (John 6:44; Utom 17:26, 27) Enye esikpan̄ utọn̄ okop akam kpukpru ikọt esie, inamke n̄kpọ m̀mê mmọ ẹto m̀mọ̀n̄. (1 Ndidem 8:41-43) Esịt enem nnyịn ndifiọk nte ke Jehovah ada kpukpru nnyịn nte ubon kiet, oro edi, ubonowo. Nte idọn̄ke fi ndikpep ekese mban̄a Abasi emi mînamke asari mi?

Itie Bible emi okpokotde ke June

John 17-21Utom 1-10