Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MAY 2013

 SAN̄A KPERE ABASI

Ndi Jehovah Abasi Enen̄ede Ekere Aban̄a Fi?

Ndi Jehovah Abasi Enen̄ede Ekere Aban̄a Fi?

Mma kiet ọdọhọ ete: “Etie nte akakan mfịna mi edi ndikere ke n̄wọrọke n̄kpọ, edi ke n̄n̄wana nditre ndisikere n̄kpọ ntem.” Mma emi ekekere ke Jehovah ikemeke-keme ndikere mban̄a utọ owo nte imọ. Ndi esitie fi ntre n̄ko ke idem? Edieke edide esitie, oro ekeme ndinam ekere m̀mê Jehovah enen̄ede ekere aban̄a owo kiet kiet ke otu ikọt esie. Imọdiọn̄ọ ke enye ekere! Se Jesus eketịn̄de anam idiọn̄ọ emi.—Kot John 6:44.

Nso ke Jesus, emi enen̄erede ọfiọk Jehovah akan owo ekededi, eketịn̄ aban̄a Jehovah? (Luke 10:22) Enye ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” Emi ọwọrọ ke nnyịn ikemeke nditiene Christ m̀mê ndituak ibuot nnọ Ete nnyịn eke heaven edieke enye Jehovah ke idemesie mîkpodụrike nnyịn ida. (2 Thessalonica 2:13) Edieke ikọ Jesus emi an̄wan̄ade nnyịn, iyokụt ke Jehovah enen̄ede ama onyụn̄ ekere aban̄a nnyịn.

Jesus ọdọhọ ke Jehovah esidụri nnyịn. Nso ke oro ọwọrọ? Ikọ Greek emi ẹkabarede nte “odụri” edi ukem ye edidụri iyịre emi iyak ọdọn̄ọde. (John 21:6, 11) Ndi oro ọwọrọ ke Jehovah odụri nnyịn, edide nnyịn imama m̀mê imaha, ete inam n̄kpọ esie? Ihih. Enye ọnọ nnyịn ifụre ndinam se iyomde, inyịkke-nyịk nnyịn ndinam n̄kpọ esie. (Deuteronomy 30:19, 20) Ataifiọk kiet ọdọhọ ete: “Esịt owo itiehe nte usụn̄ emi enyenede ubọk ke an̄wa, akam enyene ke esịt esịt. Ẹsisịne ke esịtufọk ẹberede utọ usụn̄ emi.” Jehovah esidụn̄ọde esịt ediwak biliọn owo ke ererimbot emi oyom mbon oro ẹmade ndiberede esịt mmọ nnọ enye nnyụn̄ nnam n̄kpọ esie. (1 Chronicle 28:9) Ke ini enye okụtde utọ owo oro, esịt esinem enye tutu enye anam n̄kpọ aban̄a emi. Nso ke enye esinam?

Esidi Jehovah ama okụt owo emi “enyenede eti esịt,” enye odụri enye ada sụn̄sụn̄. (Utom 13:48) Jehovah esida n̄kpọ iba anam emi—kiet edi eti mbụk emi odude ke Bible, emi enye anamde owo kiet kiet okop. Ọyọhọ iba edi edisana spirit esie. Ke ini Jehovah okụtde owo emi amade akpanikọ emi Bible ekpepde, enye esida spirit esie anam Ikọ Abasi an̄wan̄a owo oro, onyụn̄ an̄wam enye ekeme ndinam se enye ekpepde. (1 Corinth 2:11, 12) Omokụt do ke Abasi mîkpan̄wamke nnyịn, ke idụhe owo nnyịn ndomokiet emi ekpetienede Jesus ke idemesie onyụn̄ atuak ibuot ọnọ Jehovah.

“Esịt owo itiehe nte usụn̄ emi enyenede ubọk ke an̄wa, akam enyene ke esịt esịt. Ẹsisịne ke esịtufọk ẹberede utọ usụn̄ emi”

Nso ndien ke ikọ Jesus emi ẹwetde ke John 6:44 ekpep nnyịn aban̄a Jehovah Abasi? Ekpep nnyịn ke Jehovah odụri mme owo ada sia enye okụtde eti n̄kpọ ke esịt mmọ onyụn̄ amade m̀mê ekerede aban̄a mmọ owo kiet kiet. Ndifiọk emi ama enen̄ede ọdọn̄ mma oro ikadade itọn̄ọ nneme emi esịt. Enye ọdọhọ ete: “Ndinam n̄kpọ Jehovah edi akakan n̄kpọ emi owo ekededi ekemede ndinam. Ndien edieke Jehovah ekemekde mi ete nditiene nnam n̄kpọ esie, ọwọrọ ke enye ada mi ke n̄kpọ.” Afo ndien-e? Sia ama ọkọdiọn̄ọ ke Jehovah ekere aban̄a onyụn̄ enen̄ede ama nnyịn owo kiet kiet, ndi oro ikpanamke fi asan̄a ekpere enye onyụn̄ ama enye ke ofụri esịt?

Itie Bible emi okpokotde ke May

Luke 22-24John 1-16