Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MAY 2013

Ndi Abasi Ndisobo Mme Idiọkowo Edi Ibak?

Ndi Abasi Ndisobo Mme Idiọkowo Edi Ibak?

MAN ibọrọ mbụme emi, ẹyak ise nsobo iba emi Abasi okosobode mme idiọkowo ke eyo Bible—ukwọ eyo Noah ye mbon Canaan.

UKWỌ EYO NOAH

SE MME OWO ẸTỊN̄DE: “Ndi idịghe ibak ndida mmọn̄ ukwọ nsobo ofụri ererimbot ke mîbọhọke Noah ye ubon esie kpọt?”

SE BIBLE ETỊN̄DE: Abasi ọdọhọ ete: “Ami ndatke esịt ke n̄kpa idiọkowo, edi ndat esịt ke idiọkowo ndiwọn̄ọde n̄kpọn̄ usụn̄ esie nnyụn̄ ndu uwem.” (Ezekiel 33:11) Ntem, ikenemke-nem Abasi ndisobo mme idiọkowo ke eyo Noah. Edi ntak emi enye okosobode mmọ?

Bible ọdọhọ ke ini Abasi okosobode mme idiọkowo ke eset, enye ekenịm “uwụtn̄kpọ ọnọ mbon emi mîten̄eke Abasi kaban̄a mme n̄kpọ emi ẹdidide.” (2 Peter 2:5, 6) Nso uwụtn̄kpọ ke Abasi ekenịm?

Akpa kan̄a, Abasi okowụt nte ke kpa ye oro mîsinemke imọ ndisobo mme idiọkowo, ke imọ imesikụt mbon ibak oro ẹnamde mbon en̄wen ẹbọ ufen, ke iyonyụn̄ isobo mmọ ke ntak ibak mmọ. Enye eyetre kpukpru ufen ye ndutụhọ.

Ọyọhọ iba, Abasi owụt ke mbemiso isobode mme idiọkowo, ke imesikpe mmọ ubọk ite ẹkabade esịt. Noah ekedi ọkwọrọ edinen ido, edi ediwak owo ikamaha ndikop ukwọrọikọ esie. Bible ọdọhọ ete: “Mmọ inyụn̄ ifiọkke [m̀mê idọn̄ke enyịn] tutu ukwọ edi edikpọri mmọ kpukpru efep.”—Matthew 24:39.

Ndi Abasi ke osụk ananam n̄kpọ ntre? Ih, ke anam. Ke uwụtn̄kpọ, enye ama ọdọhọ nditọ Israel ete ke edieke mmọ ẹnamde idiọkn̄kpọ nte mme idụt oro ẹkekande mmọ ẹkụk ẹnamde, ke imọ iyayak mme asua ẹdụk obio mmọ, ẹsobo Jerusalem ibuot obio mmọ, ẹnyụn̄ ẹtan̄ mmọ ẹka idụt en̄wen. Nditọ Israel ẹma ẹnam idiọkn̄kpọ tutu ẹwa nditọ mmọ ẹnọ ndem. Ndi Jehovah ama anam se enye eketịn̄de? Ih, edi enye akanam emi ke enye ama ọkọdọn̄ ediwak prọfet ẹkekwọrọ ikọ ẹnọ mmọ man mmọ ẹkabade esịt. Abasi ama akam ọdọhọ ete: “Jehovah Akakan Ọbọn̄ Andikara idinamke baba n̄kpọ kiet ibọhọke enye ayarade ndịben̄kpọ esie ọnọ mme asan̄autom esie, mme prọfet.”—Amos 3:7.

 SE ANADE IFIỌK: Se Jehovah akanamde mme idiọkowo ke eset anam nnyịn ifiọk se enye edinamde. Nnyịn imenịm ke enye iditreke ndisobo kpukpru mbon ibak oro ẹnamde nnyịn ibọ ufen. Bible ọdọhọ ete: “Ẹyesịbe mme anamidiọk ẹfep . . . Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.” (Psalm 37:9-11) Afo ekpekere didie aban̄a ubiereikpe emi anamde mme owo ẹbọhọ ufen? Ndi utọ ubiereikpe oro ekpedi ibak, m̀mê akpakam edi editua mme owo mbọm?

NSOBO MBON CANAAN

SE MME OWO ẸTỊN̄DE: “Abasi ndikosobo mbon Canaan okonyụn̄ ọdiọk nte nsobo emi mbon ibak ẹsisobode ofụri ekpụk.”

SE BIBLE ETỊN̄DE: ‘Kpukpru usụn̄ Abasi ẹnenen. Enye edi Abasi akpanikọ, emi mîkpehe ukwan̄ikpe.’ (Deuteronomy 32:4) Owo ikemeke-keme ndimen ikpe emi Abasi ekebierede ndomo ye ekọn̄ oro mme owo ẹn̄wanade. Ntak-a? Sia Abasi itiehe nte owo, enye esifiọk se owo ekerede.

Ke uwụtn̄kpọ, ke ini Abasi ekebierede ndisobo Sodom ye Gomorrah, n̄kpọ emi ama afịna Abraham tutu enye obụp m̀mê Abasi oyosụk osobo kpukpru owo ntre. Enye ikekereke ke Abasi emi amade se inende ekeme ndisobo “ndinen owo ọkọrọ ye mme idiọkowo.” Abasi ama enyene ime ọbọrọ enye kpukpru mbụme esie onyụn̄ anam enye ọfiọk ke ọkpọkọm ndinen owo duop kpọt ẹdu ke Sodom, ke imọ idisoboke obio oro ke ntak mmọ. (Genesis 18:20-33) Ke akpanikọ, Abasi ama ọdiọn̄ọ esịt mbon Sodom ye Gomorrah onyụn̄ okụt ke mmọ ẹdiọk ẹbe nde.—1 Chronicle 28:9.

Ntre n̄ko ke Abasi akanam ye mbon Canaan. Abasi ama okụt nte mmọ ẹdiọkde ẹketre; ntak edi oro enye okosobode mmọ. Mmọ ẹma ẹsibak ibak etieti, ẹfọp nditọ mmọ ke ikan̄ nte uwa ẹnọ ndem. * (2 Ndidem 16:3) Mbon Canaan ẹma ẹdiọn̄ọ ke Jehovah ọdọhọ nditọ Israel ẹda ofụri isọn̄ Canaan ẹnyene. Ntre, mbon oro ẹkesọn̄ọde ẹtie do ẹnyụn̄ ẹtọn̄ọ en̄wan ye nditọ Israel ẹken̄wana ye Jehovah Abasi, emi okowụtde ke imọ do ye ikọt imọ.

Ke adianade do, Abasi ama atua ndusụk mbon Canaan mbọm, mbon emi ẹkekabarede esịt ẹnyụn̄ ẹnyịme ndidu eti uwem nte Jehovah eketemede. Ke uwụtn̄kpọ, owo ikosoboke Rahab, n̄wan akpara oro ekedide eyen Canaan, owo ikonyụn̄ isoboke mbonufọk mmọ. N̄ko, ke ini mbon Canaan emi ẹkedụn̄de ke Gibeon ẹkeyomde ẹtua mmimọ mbọm, owo ikosoboke mmọ ye nditọ mmọ ndomokiet.—Joshua 6:25; 9:3, 24-26.

SE ANADE IFIỌK: Imenyene ekese ndikpep ke se Abasi akanamde ye mbon Canaan emi. “Usen emi ẹdisobode mmọ eke mîten̄eke Abasi,” emi Bible etịn̄de aban̄a, enen̄ede ekpere etieti. (2 Peter 3:7) Edieke imade Jehovah, enye idisoboke nnyịn ke ini enye edisobode kpukpru mbon oro mîsụkke ibuot inọ ukara esie, inyụn̄ itre kpukpru ufen emi ibọde mi.

Mbon Canaan ẹkedi ata mbon ibak ẹnyụn̄ ẹkokoi ẹbiọn̄ọ Abasi ye ikọt esie

Jehovah anam nnyịn ifiọk n̄ko ke se mme ete ye eka ẹnamde ẹkeme ndibehe nditọ mmọ. Bible ọdọhọ ete: “Mek uwem man afo ye nditọ fo ẹkpedu uwem, ebe ke ndima Jehovah Abasi fo, ke ndikop uyo esie, ye ke ndiyịre ye enye.” (Deuteronomy 30:19, 20) Ndi Abasi ibak ekpetịn̄ utọ ikọ emi, ndi ikam idịghe Abasi emi amade mme owo onyụn̄ oyomde n̄kpọ ọfọn ye mmọ ekpetịn̄?

^ ikp. eki. 15 Mme ọdọkisọn̄ nyom n̄kpọeset ẹma ẹkụt n̄kpọ emi owụtde ke mbon Canaan ẹma ẹsiwa nseknditọ mmọ ẹnọ ndem.