Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME APRIL 2013

Jesus Ama Okop Inem Uwem

Jesus Ama Okop Inem Uwem

NDI Jesus ama okop inem uwem? Etie nte ete ye eka esie ikenyeneke n̄kpọ, enye n̄ko ikenyeneke. Enye ikakam “inyeneke ebiet eke enịmde ibuot esie.” (Luke 9:57, 58) Ke adianade do, ẹma ẹsua enye, ẹdori enye ikọ, ẹnyụn̄ ẹwot enye.

Afo emekeme ndikere m̀mê nso utọ uwem idi oro, ke utọ owo oro ikemeke-keme ndikop inem uwem. Edi Jesus ama enen̄ede okop inem uwem. Yak ise n̄kpọ inan̄ emi ẹkenamde enye okop inem uwem.

1. JESUS AMA ESỊN IDEM ANAM UDUAK ABASI.

“Udia mi edi ndinam uduak enye emi ọkọdọn̄de mi.”—John 4:34.

Jesus akanam uduak Ete esie eke heaven, Jehovah. * Esịt akakam enenem enye ndinam uduak Abasi. Itien̄wed oro ẹsiakde ke enyọn̄ emi owụt ke enye akada emi nte udia. Yak ineme se iketịbede mbemiso Jesus etịn̄de ikọ emi.

Jesus eketịn̄ ikọ emi ufọt uwemeyo iba. (John 4:6) Enye ama asan̄a akanade Samaria emi etiede obot obot ofụri usenubọk oro, biọn̄ onyụn̄ ọdọn̄ enye. Ntre, mme mbet esie ẹma ẹdi ẹdidọhọ enye ẹte: “Rabbi, dia n̄kpọ.” (John 4:31) Se Jesus ọkọbọrọde okowụt ke utom Abasi ekenen̄ede enem imọ onyụn̄ ọnọ imọ odudu. Ndi emi iwụtke ke uwem ama enem enye?

2. JESUS AMA ENEN̄EDE AMA ETE ESIE.

“Mmama Ete.”—John 14:31.

Jesus ama enen̄ede ama Ete esie eke heaven. Ọkpọsọn̄ ima emi enye akamade Ete esie akanam enye anam mme owo ẹdiọn̄ọ enyịn̄ Ete esie, se Ete aduakde, ye nti edu Ete esie. Nte Jesus ekesinamde n̄kpọ onyụn̄ odude uwem ama owụt ke enye ekenen̄ede ebiet Ete esie tutu edidi ima ikot mbụk Jesus, onyụn̄ etie nte ikot iban̄a Ete esie. Ntak edi oro ini Philip ọdọhọde Jesus ete ‘owụt mmimọ Ete,’ Jesus ọbọrọ enye ete: “Owo eke okụtde mi okụt Ete n̄ko.”—John 14:8, 9.

Jesus ama enen̄ede ama Ete esie, onyụn̄ enyịme ndikop uyo esie tutu esịm n̄kpa. (Philippi 2:7, 8; 1 John 5:3) Utọ ima emi akanam enye okop inem uwem.

 3. JESUS AMA AMA MME OWO.

“Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.”—John 15:13.

Sia idide mme anamidiọk, nnyịn ikpenyeneke idotenyịn ndikop inem uwem ke ini iso. Bible ọdọhọ ete: “Nte idiọkn̄kpọ okotode owo kiet [Adam] odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Nnyịn ikpekemeke ndinyan̄a idem nnyịn m̀mê ndibọhọ utịp idiọkn̄kpọ emi edide n̄kpa.—Rome 6:23.

Imọkọm Jehovah ke enye ndikọnọ nnyịn Andinyan̄a ke ntak ima. Enye ama ayak Jesus Eyen esie emi edide mfọnmma owo ọbọ ufen akpa man afak nnyịn osio ke ufụn idiọkn̄kpọ ye n̄kpa. Ima emi Jesus akamade Ete esie ye ubonowo ama anam enye enyịme ndinọ mfọnmma uwem esie ke ibuot nnyịn. (Rome 5:6-8) Utọ ima emi akanam Jesus okop inem uwem. *

4. JESUS AMA ỌFIỌK KE ETE IMỌ AMA, ONYỤN̄ ENYỊME SE IMỌ INAMDE.

“Emi edi edima Eyen mi, emi ami nnyịmede.”—Matthew 3:17.

Jehovah eketie ke heaven etịn̄ ikọ emi ke ini Jesus akanade baptism. Jehovah ama etịn̄ ke imama Jesus inyụn̄ inyịme se enye anamde. Ntak edi oro Jesus ọkọdọhọde ke ‘Ete ama imọ.’ (John 10:17) Ndifiọk ke Ete ama, onyụn̄ enyịme se inamde akanam Jesus ọyọ afanikọn̄ ye kpukpru ikọ emi ẹketịn̄de ẹdian enye. Emi okonyụn̄ anam enye ọsọn̄ọ ada tutu esịm n̄kpa. (John 10:18) Jesus ndikọdiọn̄ọ ke Ete ama, onyụn̄ enyịme se inamde ama anam enye enen̄ede okop inem uwem.

Omokụt do ke Jesus ama okop inem uwem. Ke akpanikọ, Jesus ekeme ndikpep nnyịn ekese mban̄a nte ikpokopde inem uwem. Ibuotikọ oro etienede eyetịn̄ nte Jesus ọkọdọhọde mme mbet esie ẹdu uwem.

^ ikp. eki. 6 Bible ọdọhọ ke Abasi ekere Jehovah.

^ ikp. eki. 15 Edieke oyomde ndifiọk ekese mban̄a nte n̄kpa Jesus afakde ubonowo, mbọk kot ibuot 5 ke n̄wed Mme Ntiense Jehovah emi, Nso ke Bible Enen̄ede Ekpep?