Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MARCH 2013

 KPEP NDITỌ FO

Peter ye Ananias Ẹma Ẹsu Nsu—Nso ke Emi Ekpep Nnyịn?

Peter ye Ananias Ẹma Ẹsu Nsu—Nso ke Emi Ekpep Nnyịn?

Ndisu nsu edi nditịn̄ n̄kpọ emi afo ọdiọn̄ọde ke idịghe akpanikọ. Ndi akanam omosu nsu? * Idem ndusụk ikpọ owo emi ẹmade Abasi ẹma ẹsu nsu. Ekeme ndidi ọmọdiọn̄ọ owo emi okosude nsu ke Bible. Enye ekekere Peter, kiet ke otu apostle Jesus 12. Nso ikanam enye osu nsu?

Ẹmụm Jesus ẹmen ẹka ufọk akwa oku. Eyo ọmọn̄ esesiere. Peter ebe odụk okụre akwa oku ndien owo ndomokiet idiọn̄ọke enye. Ofụn an̄wan emi akayakde Peter ebe odụk esịt okụre okụt enye ke ikan̄ onyụn̄ ọdiọn̄ọ enye. Enye ọdọhọ Peter ete: “Afo, nde, okodu ye Jesus.” Ndịk anam Peter ọdọhọ ke imọ ikodụhe ye Jesus.

Bible ọdọhọ ke “eyenan̄wan efen okụt” Peter, onyụn̄ ọdọhọ ete: “Owo emi okodu ye Jesus.” Peter afiak akan̄. Ke esisịt ini ama ekebe, mbon en̄wen ẹdidọhọ Peter ẹte: “Ke akpanikọ afo edi kiet ke otu mmọ.”

Idem enyek Peter. Enye osu nsu ọyọhọ utịm ikata ete: “Mfiọkke owo emi!” Ekikọ ọkpọk. Jesus ọwọn̄ọde enyịn ese Peter, Peter onyụn̄ eti ke Jesus ama ọdọdọhọ imọ ete: “Mbemiso ekikọ ọkpọk, afo ayakan̄ mi utịm ikata.” Peter ọduọk eyet. Enye enen̄ede atua n̄kpọfiọk!

Ndi utọ n̄kpọ emi ekeme nditịbe nnọ fi?— Nditọ ufọkn̄wed mbufo ẹkeme nditọn̄ọ nditịn̄ n̄kpọ mban̄a Mme Ntiense Jehovah. Owo kiet ekeme ndidọhọ ete: “Mmọ isitieneke ikwọ National Anthem.” Owo efen ọdọhọ: “Mmọ isin̄wanake ekọn̄ obio mmọ.” Enye eken adian n̄ko ete: “Mmọ idịghe Christian sia mmọ mîsitieneke idia Christmas.” Ekem owo mmọ kiet obụp fi ete, “N̄kọ afo etiene edi Ntiense Jehovah?” Afo ọkpọbọrọ didie?

 Ana afo etie ekere se ọkpọbọrọde mbemiso utọ n̄kpọ oro etịbe. Peter iketiehe ikere. Ntak edi oro enye okosude nsu ke ini ẹkebụpde enye mbụme. Edi enye ama atua n̄kpọfiọk onyụn̄ akabade esịt ke se enye akanamde emi, ndien Abasi efen ọnọ enye.

Mbet Jesus en̄wen emi okosude nsu ekere Ananias. Edi Abasi ikefenke inọ enye inyụn̄ ifenke inọ Sapphira an̄wan esie. Enye ama etie ye ebe esie ebiere ndisu nsu. Yak ise ntak emi Abasi mîkefenke inọ Ananias ye Sapphira.

Usen duop ke Jesus ama ọkọkpọn̄ mme apostle esie ọnyọn̄ ebịne Abasi ke heaven, n̄kpọ nte owo 3,000 ẹma ẹna baptism ke Jerusalem. Ediwak mmọ ẹketo anyan ebiet ẹdi Usọrọ Pentecost. Ke mmọ ẹma ẹkena baptism ẹnyụn̄ ẹkabade ẹdi mbet Jesus, mmọ ẹkeyom ndimana ntie ke Jerusalem n̄kpep n̄kpọ mban̄a Jesus. Ntre ndusụk mbet Jesus ẹda okụk mmọ ẹse ẹban̄a mbufa mbet emi.

Ananias ye n̄wan esie ẹnyam isọn̄ mmọ man ẹnyene okụk ẹdinọ ẹtiene ẹda ẹse ẹban̄a mbufa mbet emi. Ke ini enye adade okụk mmọ ọsọk mme apostle, enye ọdọhọ ke kpukpru se mmimọ ikanyamde isọn̄ edi oro. Edi enye okososu! Idịghe kpukpru okụk ke enye ekemen edi. Abasi ama ayarade emi ọnọ Peter, emi anam Peter ọdọhọ Ananias ete: “Usụhu nsu unọ owo, osu ọnọ Abasi.” Ananias ọduọ ke isọn̄ akpa. Ke n̄kpọ nte hour ita ama ekebe, n̄wan esie odụk edi, edi ifiọkke se itịbede inọ ebe esie. Enye n̄ko osu nsu, onyụn̄ ọduọ akpa.

Emi ekpep nnyịn ata akpan n̄kpọ. Ana kpukpru nnyịn isitịn̄ akpanikọ! Edi kpukpru nnyịn imesinam ndudue akpan akpan ke ini idide nditọwọn̄. Ndi esịt inemke fi ndifiọk nte ke Jehovah ama fi, ke oyonyụn̄ efen ọnọ fi nte enye ekefende ọnọ Peter?— Edi kûfre ke ana isitịn̄ akpanikọ. Nsu edi akwa idiọkn̄kpọ. Ntre, edieke inamde ndudue isu nsu, ikpenyene ndikpe Abasi ubọk ite efen ọnọ nnyịn. Se Peter akanamde edi oro, ntre Abasi ama onyụn̄ efen ọnọ enye. Edieke inen̄erede isịn ukeme man ikûsu nsu aba, Abasi eyefen ọnọ nnyịn n̄ko!

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke akpana ebet onyụn̄ ayak enye ọbọrọ mbụme oro.