Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  March 2013

 MBỤK EYOUWEM

“Mma N̄kụt, Edi In̄wan̄ake Mi”

“Mma N̄kụt, Edi In̄wan̄ake Mi”

N̄kamana ke 1973, ndien ke 1975, eka mi ama ọtọn̄ọ ndikere ke enyene se inamde mi. Usen kiet enye okosụk akama mi ke ubọk ke ini mma kiet akayakde n̄kpọ ọtọ ke isọn̄ anam uyom nte obuma, edi n̄kedịgheke. Ke ini nsịmde isua ita, n̄kosụk n̄kemeke nditịn̄ ikọ. Ekem mbiausọbọ emi ẹkesede mi idem ẹma ẹdọhọ eka mi ẹte ke ndi inan. Idem ama esịp nnyịn nte ubom!

Ete ye eka mi ẹkedian̄ade ndọ ke ini n̄kedide nsek. Ntre eka mi akada ikpọn̄ ọbọk kpukpru nnyịn mbinan̄. Ini oro, owo ikesinọhọ nditọwọn̄ emi ẹdide inan ke France ukpep nte ẹnọde idahaemi. Nte ẹkesikpepde mmọ n̄kpọ ama esikpon ufen etieti ndusụk ini. Edi toto ke nsek, ama odu n̄kpọ emi n̄kenyenede emi ediwak inan eken mîkenyeneke. Yak ntịn̄ ntak emi ndọhọde ntre.

Ini n̄kedide n̄kpọ nte isua ition

Ini oro, ediwak mme andikpep ẹkekere ke nditọwọn̄ emi ẹdide inan ẹkpenyene ndise owo inua mfiọk se enye etịn̄de nnyụn̄ ntiene ntịn̄. Ke nditịm ntịn̄, ekedi mbet ndisem usem idiọn̄ọ ke ufọkn̄wed ke edem nnyịn. Ẹma ẹsikam ẹbọp ndusụk nditọwọn̄ emi ẹdide inan ubọk ẹdian ke edem mbak mmọ idida ubọk inam idiọn̄ọ.

Ke ini n̄kedide ekpri, eka mi ama esida mi kpukpru urua ebịne abiausọbọ emi esikpepde mme inan nte ẹsitịn̄de ikọ, ndien mma nsidu ye enye mbịghi. Enye ama esifịk mi ọkpọ mban̄ mîdịghe omụm mi ibuot man nsioro uyo kpa ye oro mmen̄kekemeke ndikop uyo oro nsiorode. N̄kekemeke ndinyene nneme ye nditọwọn̄ eken. Uwem ikememke inọ mi ini oro.

Ẹma ẹda mi ẹka ufọkn̄wed nditọ inan ke ini n̄kedide isua itiokiet. Akpa ini emi n̄kosobode ye nditọwọn̄ en̄wen emi ẹdide inan ekedi emi. Owo ikonyụn̄ iyakke ẹsem usem idiọn̄ọ ke ufọkn̄wed emi. Edieke idade ubọk inam idiọn̄ọ, andikpep ama esikpọi nnyịn edem ubọk mîdịghe odụri nnyịn idet. Edi ima isidịbe ineme nneme ke ubọk. Esịt ama enem mi ndien ndikeme ndineme nneme ye nditọwọn̄ eken ke ofụri isua inan̄ oro ẹketienede.

Edi ke ini n̄kedide isua duop, ẹma ẹsio mi ẹka ufọkn̄wed primari emi nditọwọn̄ emi ẹkopde ikọ ẹkekade. Esịt ama obụn̄ọ mi! N̄kekere ke kpukpru nditọwọn̄ eken oro ẹkedide inan ẹkpan̄a ẹma ẹkpọn̄ mi ikpọn̄. Mbiausọbọ ẹma ẹdọhọ mbonufọk nnyịn ke edieke mmọ ẹkpepde usem idiọn̄ọ ẹnyụn̄ ẹtọn̄ọ ndida enye nneme nneme ye ami, ke ami ndikpepke aba nditịn̄ ikọ. Owo ikonyụn̄ iyakke mi ndụk ndụk ye nditọwọn̄ eken oro ẹkedide inan. Ke nteti ini oro n̄kakade ndikụt abiausọbọ emi ẹsikpepde inan nditịn̄ ikọ, mma n̄kụt n̄wed usem idiọn̄ọ ke enyọn̄ okpokoro esie. Ke ini n̄kokụtde ndise edem n̄wed oro, mma nnyan ubọk  nnam idiọn̄ọ nte, “Mbọk nọ mi n̄wed oro.” Abiausọbọ oro ama ọsọsọp emen n̄wed oro edịp. *

MMỌTỌN̄Ọ NDIKPEP BIBLE

Eka mi ama ekpep nnyịn mbinan̄ ndidu uwem nte Bible etemede. Enye ama esimen nnyịn aka mbono esop Mme Ntiense Jehovah ke Mérignac ke mbọhọ Bordeaux. Ke ini n̄kedide eyenọwọn̄, n̄kpọ ndomokiet ikan̄wan̄ake mi ke mme mbono esop oro. Edi nsio nsio owo ẹma ẹsitie ye ami kpukpru usen man ẹwet se ẹtịn̄de ẹnọ mi. Nte mmọ ẹkemade mi ama enen̄ede otụk mi. Eka mi ama esikpep mi Bible ke ufọk, edi se enye ekekpepde ikan̄wan̄ake mi. N̄ketie nte prọfet Daniel emi ekedide angel etịn̄ ikọ ọnọ enye ama, enye ọdọhọ ete: “Ndien ami n̄kop, edi mfiọkke.” (Daniel 12:8) Edi okịm ekedi ke “mma n̄kụt, edi in̄wan̄ake mi.”

Edi mma n̄ka iso n̄kpep Bible sụn̄sụn̄. Mma mmụm se ikan̄wan̄ade mi ndọn̄ ke ibuot nnyụn̄ nda mmọ ndu uwem. Mma nnyụn̄ n̄kpep n̄kpọ nto nte Mme Ntiense eken ẹkedude uwem. Ke uwụtn̄kpọ, Bible ọdọhọ nnyịn ime ime. (James 5:7, 8) N̄kọfiọkke se oro ọwọrọde. Edi ke ini n̄kụtde nte Mme Ntiense eken ẹmede ime, mma ndifiọk ndien se ndime ime ọwọrọde. Ke akpanikọ, Mme Ntiense Jehovah ẹma ẹnen̄ede ẹn̄wam mi.

IDUỌESỊT YE INEMESỊT

Stéphane akanam mi nnen̄ede mfiọk Bible

Usen kiet ke ini n̄kosụk ndide eyenọwọn̄, mma n̄kụt mme uyen eken emi ẹdide inan ke efak nte ẹnamde idiọn̄ọ. Mma ntọn̄ọ ndidụk ndụk ye mmọ ke ndịbe nnyụn̄ ntọn̄ọ ndikpep Usem Idiọn̄ọ Mbon France. Mma nnyụn̄ n̄ka iso ndidụk mbono esop Mme Ntiense Jehovah. Do ke n̄kosobo ye akparawa emi ekekerede Stéphane. Enye ama enen̄ede ama mi onyụn̄ ebiere ndin̄wam mi. Mma nnen̄ede mma enye n̄ko. Edi n̄kpọ ọmọn̄ etịbe oro edinamde esịt ọduọ mi. Ẹma ẹmụm Stéphane ẹkesịn ke ufọk-n̄kpọkọbi sia enye mîkenyịmeke ndidụk ekọn̄. Esịt ama ọduọ mi. Idem ama enen̄ede emem mi tutu ntọn̄ọ nditre mbono esop Mme Ntiense.

Ẹma ẹsio Stéphane ke ufọk-n̄kpọkọbi ke ọfiọn̄ 11 ama ekebe. Kere nte esịt ekenemde mi ke ini enye akadade usem idiọn̄ọ ọtọn̄ọ ndineme nneme ye ami! Eketie nte n̄kpọ ndap. Nso iketịbe? Stéphane ọdọhọ ke ikekpep usem idiọn̄ọ emi ke ufọk-n̄kpọkọbi. Nte n̄kesede enye iso ke ini enye enemede nneme ye ami, esịt ama enem mi sia kpukpru se enye etịn̄de enen̄ede an̄wan̄a mi ndien.

AKPANIKỌ BIBLE EDIN̄WAN̄A MI NDIEN

Stéphane ama ọtọn̄ọ ndikpep mi Bible. Ini emi ndien ke kpukpru se n̄kekpepde ke Bible ọkọtọn̄ọ ndin̄wan̄a mi. Ke ini n̄kedide eyenọwọn̄, mma nsima ndise ndiye ndise ke mme n̄wed nnyịn. Mma nsimen ndise kiet ndomo ye en̄wen man n̄kpeti se ndise oro ẹban̄ade. Mma mfiọk Abraham, “mfri” esie, ye “akwa otuowo,” edi mme n̄kpọ emi ẹkenen̄ede an̄wan̄a mi ke ini Stéphane akadade usem idiọn̄ọ ekpep mi Bible. (Genesis 22:15-18; Ediyarade 7:9) Mma ndikụt ke ata usem mi edi emi.

Esịt ama enen̄ede enem mi ndifiọk se ẹsikpepde ke mme mbono esop, ama onyụn̄ enen̄ede ọdọn̄ mi ndikpep ekese. Stéphane ama an̄wam mi nnen̄ede mfiọk Bible, ntre ke 1992, mma nyak idem nnọ Jehovah Abasi nnyụn̄ nna baptism. Kpa ye oro n̄kanamde kpukpru emi, bụt ikayakke n̄keme ndisọp mmehe ye mme owo sia mmen̄kekemeke ndinyene nneme ye mme owo ke ini eyenọwọn̄.

NDITRE NDIKOP BỤT

Ẹma ẹmen ekpri otu mbon inan oro n̄kodude ẹdian ye esop kiet ke Pessac ke Bordeaux. Emi ama anam n̄keme ndimehe ye mme owo nnyụn̄  ndọdiọn̄ n̄kọri ke ifiọk Abasi. Okposụkedi emi mmen̄kosụk n̄kemeke nditịn̄ ikọ, mme ufan mi emi mîdịghe inan ẹma ẹsinyene nneme ye ami ke usụn̄ oro editịmde in̄wan̄a mi. Gilles ye Elodie an̄wan esie ẹma ẹnen̄ede ẹkpep nte ẹkpenemede nneme ye ami. Mmọ ẹma ẹsiwak ndikot mi ufọk ke mbono esop ama akasuana. Ima ikabade ita ye aban̄. Ekedi ata n̄kpọ inemesịt ndidu ke otu mbon oro ẹmade ima nte Abasi.

Ke nnọ utịn̄ikọ ke Usem Idiọn̄ọ Mbon France

Ke esop emi ke n̄kosobo ata ediye n̄kaiferi emi ekerede Vanessa. Mma nnen̄ede mma nte enye esikerede aban̄a owo onyụn̄ amade se inende. Enye ikekereke ke imọ idikemeke ndisineme nneme ye ami, edi akakam enenem enye ndidọ mi man enye ekpekpep ndineme nneme ye ami. Mma mma enye etieti, ntre nnyịn ima idọ ndọ ke 2005. Okposụkedi emi mmentịmke mfọn ke nneme, n̄wan mi an̄wam mi ntre ndikop bụt nnyụn̄ n̄keme ndineme nneme ye mme owo. Mmọkọm enye etieti ke kpukpru un̄wam oro enye an̄wamde mi nnam utom Abasi mi.

JEHOVAH AFIAK ỌDIỌN̄ MI

Ke 2005 oro ikanamde ndọ, n̄kọk itieutom Mme Ntiense Jehovah ke Lourviers mi ke France ẹma ẹkot mi ndinam utom ọfiọn̄ kiet ke itie ukabade n̄wed. Ke isua ifan̄ emi ẹbede, n̄kọk itieutom emi enen̄ede esịn ifịk ndision̄o mme n̄kpọ ke DVD Usem Idiọn̄ọ Mbon France. Edi ekese okosụk ododu ndinam, ndien ẹma ẹyom ediwak owo ẹdin̄wam ke itieutom emi.

Vanessa an̄wan mi enen̄ede an̄wam mi

Okposụkedi emi idem ekenyekde nnyịn ini ẹkekotde nnyịn, ami ye Venessa an̄wan mi ida nte ke ndinam utom ke n̄kọk itieutom Mme Ntiense Jehovah mi ke France edi akwa edidiọn̄ Jehovah Abasi. Edi ima ikere m̀mê nso iditịbe inọ ekpri otu mbon inan oro ikadahade ikpọn̄. Ufọk nnyịn ndien-e? Ndi Vanessa oyokụt utom do anam? Jehovah ama ese aban̄a kpukpru emi. Mma n̄kụt ke Jehovah enen̄ede ama nnyịn ye mme inan eken.

IKỌT ABASI ẸDIANA KIET ẸN̄WAM MI

Ndinam utom ke itie ukabade n̄wed anam mfiọk kpukpru se ẹnamde man mme inan ẹdiọn̄ọ Abasi. Esịt esinen̄ede enem mi ke ini ediwak nditọete ẹdomode ndineme nneme ye ami. Ekpri usem idiọn̄ọ emi mmọ ẹkpepde ẹnyụn̄ ẹdade ẹneme nneme ye ami esinem mi etieti. Nte ẹnamde n̄kpọ ye ami iyakke bụt anam mi. Kpukpru ima emi ẹmade mi enen̄ede owụt nte ikọt Jehovah ẹdianade kiet.—Psalm 133:1.

Ke nnam utom ke Itieutom Ukabade N̄wed

Mmọkọm Jehovah nte enye adade mme owo ke esop esie an̄wam mi toto ke ekpri. Mmonyụn̄ n̄kọm enye ke ekpri se ntịpde nsịn ndin̄wam mme inan eken ẹdiọn̄ọ edima Abasi emi okobotde nnyịn, ẹnyụn̄ ẹsan̄a ẹkpere enye. Ke mbet ini emi kpukpru owo ẹdikopde ikọ inyụn̄ ikeme ndisem “edisana usem,”—oro edi, ndinen̄ede mfiọk Jehovah Abasi, mfiọk mme uduak esie, nnyụn̄ ndiana kiet nte ubon nnam n̄kpọ esie.—Zephaniah 3:9.

^ ikp. eki. 9 Ke 1991 ke ukara France ẹkenyịme ẹsida usem idiọn̄ọ ẹkpep nditọwọn̄ emi ẹdide inan n̄kpọ ke ufọkn̄wed.