Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  March 2013

 SAN̄A KPERE ABASI

“Ewe Edi Ebeiso ke Otu Kpukpru Ewụhọ?”

“Ewe Edi Ebeiso ke Otu Kpukpru Ewụhọ?”

Nso ke ikpanam man inem Abasi esịt? Ndi akpakịp ibet odu emi ikpenịmde? Ke akpanikọ utọ n̄kpọ oro idụhe. Jesus Christ emi edide Eyen Abasi ọdọhọ ke n̄kukụre se Abasi oyomde nnyịn inam edi ndima ima.—Kot Mark 12:28-31.

Kere se iketịbede ke ini Jesus eketịn̄de ikọ emi. Enye ekekpep mme owo n̄kpọ ke temple ke Nisan 11, usen ifan̄ mbemiso ẹwot enye. Mme asua esie ẹkeyom ndibọ enye uyo. Ntre, mmọ ẹma ẹbụp enye mme mbụme emi ẹkemede ndisịn enye ke mfịna. Edi Jesus ama ọbọrọ mme mbụme emi ke usụn̄ oro mme asua emi mîkekemeke ndisioro uyo. Ekem, owo kiet ama obụp Jesus mbụme emi: “Ewe edi ebeiso ke otu kpukpru ewụhọ?”—Ufan̄ikọ 28.

Mbụme emi eketie ekikọhọ ekikọhọ. Ndusụk mme Jew ẹma ẹsidọhọ ke enyene ibet emi okponde akan ke otu ewụhọ oro ẹkewakde ẹbe 600 ke Ibet Moses. Etie nte mbon eken ẹkedọhọ ke kpukpru mbet emi ẹkedi ukem ye nte ke ifọnke owo ndikere ke ndusụk ẹkpon ẹkan mbon eken. Jesus ọkpọbọrọ utọ mbụme emi didie?

Jesus akasiak ibet iba utu ke kiet. Akpa, enye ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Ufan̄ikọ 30; Deuteronomy 6:5) “Esịt,” “ekikere,” “ukpọn̄,” ye “ukeme” ẹda ẹban̄a utọ owo emi nnyịn idide. Ikọ Jesus ọwọrọ ke owo enyene ndima Jehovah ke kpukpru usụn̄. N̄wed kiet emi esitịn̄de n̄kpọ aban̄a Bible etịn̄ ntem aban̄a ufan̄ikọ emi: “Ana owo enen̄ede ama Abasi ke kpukpru usụn̄.” Edieke amade Abasi, ayanam kpukpru se ekekeme kpukpru usen ndinem enye esịt.—1 John 5:3.

Ọyọhọ iba, Jesus ọkọdọhọ ete: “Afo enyene ndima mbọhọidụn̄ fo nte idemfo.” (Ufan̄ikọ 31; Leviticus 19:18) Owo emi amade Abasi iditreke-tre ndima mbọhọidụn̄ esie. (1 John 4:20, 21) Edieke imade mbọhọidụn̄ nnyịn nte idem nnyịn, iyanam n̄kpọ ye mmọ nte iyomde mmọ ẹnam ye nnyịn. (Matthew 7:12) Ke ini inamde emi, nnyịn iwụt ke imama Abasi emi okobotde nnyịn onyụn̄ obot mmọ ke mbiet idem esie.—Genesis 1:26.

N̄kukụre se Jehovah oyomde ikọt esie ẹnam edi ndima ima

Ndi odu ewụhọ eke okponde akan ndima Abasi ye mbọhọidụn̄? Jesus ọbọrọ ete: “Idụhe ewụhọ en̄wen eke okponde akan mmọ emi.” (Ufan̄ikọ 31) Jesus ọkọdọhọ ke ofụri ibet eken ẹkọn̄ọ ke ewụhọ mbiba emi.—Matthew 22:40.

Isọn̄ke ndinem Abasi esịt. N̄kukụre se enye oyomde nnyịn inam edi ndima ima. Toto ke eset tutu esịm emi, Abasi esisụk oyom ikọt esie ẹma imọ, ndien se enye edisụk iyomde mmọ ẹnam edi oro ke nsinsi. Edi owo isimaha ima ke inua, ima inyụn̄ itreke ke esịt; ẹsinanam ẹwụt ke owo ama owo. (1 John 3:18) Kpep nte ekemede ndinyene utọ ima emi nnyụn̄ nnanam n̄wụt ke amama Jehovah, Abasi emi edide “ima.”—1 John 4:8.

Itie Bible emi okpokotde ke March

Mark 9-16Luke 1-6

 

Kpep N̄kpọ En̄wen

ENYỌN̄-UKPEME

Ndi Emesinam Se Abasi Ọdọhọde?

Ọfọn ikop uyo Abasi, edi enyene n̄kpọ en̄wen emi enye ọdọhọde inam man idi ufan esie.