Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2013

 BIBLE OKPỤHỌDE MME OWO

“Mmọ Ẹkeyom Ndụn̄ọde Se Bible Ekpepde Nse”

“Mmọ Ẹkeyom Ndụn̄ọde Se Bible Ekpepde Nse”
  • ISUA AKAMANADE: 1982

  • EBIET OTODE: DOMINICAN REPUBLIC

  • SE ENYE EKEDIDE: OWO MORMON

NTE UWEM MI EKETIEDE:

N̄kamana ke Santo Domingo ke Dominican Republic. Ikedi nditọ inan̄—irenowo ita ye n̄wan kiet. Ami n̄kedi ekperedem. Ete ye eka mi ẹma ẹnen̄ede ẹka n̄wed ẹnyụn̄ ẹyom nnyịn idi nti nditọ inyụn̄ idụk ndụk ye nti owo. Mmọ ẹma ẹsobo mme isụn̄utom mbon Mormon ke 1978. Sia ete ye eka nnyịn ẹkemade nte n̄kparawa Mormon emi ẹkesisịnede n̄kpọ ẹnyụn̄ ẹkamade idem, mmọ ẹma ẹbiere ndidi akpa mbon Mormon ke isuo oro.

Nte n̄kokponde owo, mma mma nte ẹkesidiade usọrọ ke ufọkabasi nnyịn ye nte ẹkesitịn̄de n̄kpọ ẹban̄a uwem ubon ye eti ido uwem. Ama enen̄ede enem mi ndidi owo Mormon, ndien n̄koyom ndidi isụn̄utom Ufọkabasi Mormon.

Ke mma n̄kesịm isua 18, ima iwọrọ ikodụn̄ ke United States man n̄kaka eti ufọkn̄wed ntaifiọk. Ke n̄kpọ nte isua kiet ama ekebe, eyeneka eka mi ama asan̄a ye ebe esie edise nnyịn ke Florida. Mmọ ẹkedi Mme Ntiense Jehovah. Mmọ ẹma ẹdọhọ nnyịn iditiene idụk akamba mbono mmọ. Idem ama akpa mi ndikụt kpukpru owo ẹkụbọrede Bible mmọ ẹnyụn̄ ẹwetde se ẹtịn̄de ke itie mbono oro ẹnịm. Ntem mma ndọhọ ẹnọ mi eton̄wed ye babru nnyụn̄ ntọn̄ọ nditiene n̄wet se ẹkwọrọde.

Ke mbono oro ama akasuana, eyeneka eka mi ye ebe esie ẹma ẹdọhọ mi ete sia nyomde ndidi isụn̄utom, ke mmimọ imekeme ndin̄wam mi n̄kpep n̄kpọ mban̄a Bible. Mma mma ekikere emi sia ini oro n̄kọdiọn̄ọke Bible nte ndiọn̄ọde N̄wed Mormon.

NTE BIBLE OKOKPỤHỌREDE UWEM MI:

Nte ikesinemede Bible ke urụk ukopikọ, eyeneka eka mi ye ebe esie ẹma ẹsidọhọ mi mmen se ẹkpepde mi ke Ufọkabasi Mormon  ndomo ye se Bible ekpepde. Mmọ ẹkeyom ndụn̄ọde se Bible ekpepde nse.

Mma n̄kpep ediwak n̄kpọ ke Ufọkabasi Mormon, edi n̄kọdiọn̄ọke m̀mê mme n̄kpọ emi ẹdu ntre ke Bible. Eyeneka eka mi ama ọnọ Ẹdemede! [Ikọmbakara] eke November 8, 1995, ẹsọk mi. Ẹma ẹwet n̄kpọ ẹban̄a mbon Mormon ke magazine Mme Ntiense Jehovah emi. Ke mma n̄kokot magazine emi, idem ama akpa mi ndikụt ke ntịmke mfiọk ediwak ukpepn̄kpọ mbon Mormon. Emi ama anam n̄kodụn̄ọde ikpehe Intanet mbon Mormon man nse m̀mê magazine Mme Ntiense oro eketịn̄ akpanikọ. Enye eketịn̄ akpanikọ, sia mma n̄kụt mme n̄kpọ oro ke ini n̄kakade itie ubon n̄kpọeset mbon Mormon ke Utah.

Ofụri emi n̄kesikere ke Bible ye N̄wed Mormon ẹdu ke n̄kemuyo. Edi ke ini ntọn̄ọde ndisịn idem n̄kot Bible, mma ndikụt ke N̄wed Mormon etịn̄ se idide ata isio ye se Bible etịn̄de. Ke uwụtn̄kpọ, Bible ọdọhọ ke Ezekiel 18:4 ete ke ukpọn̄ ekeme ndikpa. Edi N̄wed Mormon etịn̄ ke Alma 42:9, ete: “Tutu amama ukpọn̄ ikpaha.”

N̄kpọ en̄wen emi ekenen̄erede afịna mi ekedi nte mbon Mormon ẹkekpepde owo ndida idụt mmọ ke n̄kpọ n̄kan idụt en̄wen. Ke uwụtn̄kpọ, ẹkpep mbon Mormon nte ke In̄wan̄ Eden okodu ke Jackson County, Missouri ke U.S.A. N̄kpọ en̄wen edi ke mme prọfet Ufọkabasi Mormon ẹsidọhọ ke usen kiet usen kiet ke Abasi ayada United States akara isọn̄ emi.

Mma n̄kere se iditịbede inọ mme idụt eken, utọ nte idụt emi n̄kamanade. Enyene akparawa kiet emi edide owo Mormon emi ẹkesụk ẹnọde ukpep ndidi isụn̄utom. Mma mbụp enye mbubreyo usen kiet ke ini enye okokotde mi ke urụk ukopikọ m̀mê enye akpan̄wana ye mbon Mormon edieke obio esie akpan̄wanade ekọn̄ ye obio mmọ. Idem ama akpa mi ndikop enye ọdọhọde ke ikpan̄wana. Mma nnen̄ede nnam ndụn̄ọde mban̄a kpukpru se ẹkekpepde mi ke ufọkabasi emi nnyụn̄ mbụp mme prọfet nnyịn mbụme. Mmọ ẹkedọhọ ke se mbụpde edi ndịben̄kpọ emi ẹdiyararede usen kiet.

Sia utọ n̄kpọ emi mîkenemke mi, mma mfiak nnen̄ede n̄kere mban̄a idem mi ye ntak emi n̄koyomde ndidi isụn̄utom Mormon. Mma n̄kụt ke ntak kiet emi akanamde nyom ndidi isụn̄utom mmọ edi ke n̄koyom ndin̄wam mme owo. N̄kpọ en̄wen edi ke n̄koyom mme owo ẹkpono mi. Edi n̄ketịmke ndiọn̄ọ Abasi. Okposụkedi n̄kesikotde Bible, n̄kenen̄ekede mfiọk se isịnede ke Bible. N̄kọfiọkke se ikanamde Abasi obot owo ye isọn̄ emi.

UFỌN ORO MBỌDE:

Mma ndifiọk ediwak n̄kpọ ke ini n̄kekpepde Bible ye Mme Ntiense Jehovah, utọ nte enyịn̄ Abasi, se isitịbede inọ owo ke ini enye akpade, ye nte Jesus edinamde ẹnam uduak Abasi. Mma ndidiọn̄ọ Bible nsịt nsịt, ama esinyụn̄ enem mi ndikpep mbon en̄wen Bible. Mma nnenịm ke Abasi odu edi idahaemi mmekeme ndineme nneme ye enye nte ata Ufan mi. Mma nna baptism nte kiet ke otu Mme Ntiense Jehovah ke July 12, 2004, ndien ke ọfiọn̄ itiokiet ama ekebe, mma ntọn̄ọ ndikwọrọ ikọ ofụri ini.

Mma nnam utom isua ition ke ibuot itieutom Mme Ntiense Jehovah ke Brooklyn ke New York. Mma nnen̄ede n̄kop inemesịt nditiene nnam ẹmịn̄ Bible ye mme n̄wed Bible emi ẹdinyenede ufọn inọ ata ediwak owo ke ofụri ererimbot. Ndien ke n̄kop inem edin̄wam mme owo ẹkpep n̄kpọ ẹban̄a Abasi.