Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2013

Moses—Owo Mbuọtidem

Moses—Owo Mbuọtidem

NSO IDI MBUỌTIDEM?

Bible ọdọhọ ke mbuọtidem edi ndisọn̄ọ nnịm n̄kpọ ke akpanikọ. Owo emi ọbuọtde idem ke Abasi enen̄ede enịm ke Abasi ayanam kpukpru se enye ọn̄wọn̄ọde.

DIDIE KE MOSES OKOWỤT KE IMENYENE MBUỌTIDEM?

Moses ama anam n̄kpọ emi owụtde ke enye ọbuọt idem ke un̄wọn̄ọ Abasi. (Genesis 22:15-18) Enye okpokosụk aka iso odụn̄ ke ufọkubọn̄ Egypt onyụn̄ okop inem uwem, edi enye ama esịn kpukpru emi, “emek nditiene ikọt Abasi mbiom ukụt utu ke ndidia inemesịt idiọkn̄kpọ ke ibio ini.” (Mme Hebrew 11:25) Ndi Moses okobobụmede ntre anam emi, ekem editua n̄kpọfiọk? Ihih, koro Bible ọdọhọ ke Moses ama aka iso ọsọn̄ọ “ada nte n̄kpọ eke enye okụtde Enye emi enyịn owo mîkwe.” (Mme Hebrew 11:27) Emi owụt ke enye ikatuaha n̄kpọfiọk ndomokiet ke ndikanam n̄kpọ emi owụtde ke imọbuọt idem ke Abasi.

Moses ama onyụn̄ an̄wam mbon en̄wen ẹnyene mbuọtidem ke Abasi. Da ke uwụtn̄kpọ se iketịbede ke ini udịmekọn̄ Pharaoh ẹkekụkde nditọ Israel ẹsịn ke Ididuot Inyan̄. Ndịk ama enen̄ede anam mmọ tutu mmọ ẹseme ẹnọ Jehovah ye Moses. Nso ke Moses akanam?

Etie nte Moses ikọfiọkke ke Abasi ọmọn̄ abahade Ididuot Inyan̄ man nditọ Israel ẹsan̄a ẹbe. Edi enye ama enyene mbuọtidem ke Abasi ọmọn̄ anam n̄kpọ anyan̄a ikọt esie. Ndien Moses okoyom nditọ Israel ẹnyene ukem mbuọtidem emi. Bible ọdọhọ ete: “Moses ọdọhọ mbon oro ete: ‘Ẹkûfehe ndịk. Ẹsọn̄ọ ẹda ẹnyụn̄ ẹkụt edinyan̄a Jehovah, emi enye edinyan̄ade mbufo mfịn emi.’” (Exodus 14:13) Ndi Moses ama anam nditọ Israel ẹtiene ẹbuọt idem ke Abasi? Ama anam sia Bible ọdọhọ ete: “Oto mbuọtidem mmọ ẹsan̄a ke Ididuot Inyan̄ ẹbe nte n̄kpọ eke ẹsan̄ade ke edisat isọn̄.” (Mme Hebrew 11:29) Mbuọtidem Moses ama enyene ufọn ọnọ enye onyụn̄ enyene ọnọ kpukpru mbon oro ẹketienede enye ẹbuọt idem ke Jehovah.

NSO KE IKEME NDIKPEP NTO MOSES?

Imekeme ndikpebe Moses ke ndidu uwem emi owụtde ke imọbuọt idem ke mme un̄wọn̄ọ Abasi. Ke uwụtn̄kpọ, Abasi ọn̄wọn̄ọ ndinọ nnyịn n̄kpọ udu uwem edieke ibemde iso inam n̄kpọ esie. (Matthew 6:33) Imọfiọk ke imemke utom ndinyene utọ mbuọtidem emi ke ererimbot emi ata ediwak owo ẹyomde inyene mi. Edi imenịm ke edieke isịnde idem inam n̄kpọ Abasi, iyomke ikpọ n̄kpọ, ke Jehovah iditreke ndinọ nnyịn se iyomde. Enye ọn̄wọn̄ọ ete: “Ndidehedei n̄kpọn̄ fi, ndinyụn̄ nsịnke fi.”—Mme Hebrew 13:5.

Nnyịn inyene ndin̄wam mbon en̄wen ẹnyene mbuọtidem n̄ko. Ke uwụtn̄kpọ, mme ete ye eka ẹdiọn̄ọ ke imenyene akwa ifet ndin̄wam nditọ mmimọ ẹbuọt idem ke Abasi. Nte nditọ ẹsụk ẹkponde, ana ẹkpep mmọ nte ke Abasi odu ye nte ke enye ikpọn̄-ikpọn̄ ekeme ndibiere se inende ye se ikwan̄ade. Ke adianade do, ana ẹnam mmọ ẹfiọk ke ndinịm mme ewụhọ Abasi akam edi ke ufọn nnyịn. (Isaiah 48:17, 18) Mfọnn̄kan n̄kpọ emi mme ete ye eka ẹkemede ndinọ nditọ mmọ edi ndinam mmọ ẹnịm ke Abasi odu ye nte ke enye edi andinọ mbon oro ẹnen̄erede ẹyom enye utịp.”—Mme Hebrew 11:6.