Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2013

Moses—Enyene Ima

Moses—Enyene Ima

NSO IDI IMA?

Owo emi enyenede ima esitetịn̄ onyụn̄ ananam owụt ke imama mme owo, idem ọkpọkọm emi atak enye n̄kpọ.

DIDIE KE MOSES OKOWỤT KE IMENYENE IMA?

Moses ama ama Abasi. Didie? Ọfọn, ti se ẹwetde ke 1 John 5:3 emi: “Ndima Abasi ọwọrọ ete nnyịn inịm mme ewụhọ esie.” Moses ama anam emi. Enye ama anam kpukpru se Abasi ọkọdọhọde enye anam, ọtọn̄ọde ke utọ akwa n̄kpọ nte ndika n̄kokụt Edidem Pharaoh esịm se itiede nte ekpri n̄kpọ, oro edi, ndinyụn̄ nsio esan̄ nnyan ke Ididuot Inyan̄. Edide se ẹkedọhọde enye anam ama emem m̀mê ikememke ndinam, Moses ama “anam kpa ntre.”—Exodus 40:16.

Moses ama ama ekemmọ nditọ Israel. Nditọ Israel ẹma ẹdiọn̄ọ ke Jehovah ọkọdọhọ Moses ada mmimọ usụn̄, ntem mmọ ẹma ẹbiom ofụri mfịna mmọ ẹbịne Moses. Bible ọdọhọ ete: “Mme owo ẹda ke iso Moses ọtọn̄ọde ke usenubọk tutu esịm mbubreyo.” (Exodus 18:13-16) Kere nte Moses adade tọn̄ọ usenubọk esịm mbubreyo akpan̄ utọn̄ okop mfịna nditọ Israel! Edi ekenenem Moses ndinam emi sia enye ama ama mmọ.

Moses n̄ko ama esisịn mmọ ke akam. Enye ama akam ọbọn̄ akam esịn mbon oro ẹkeduede enye. Ke uwụtn̄kpọ, ke ini Miriam eyeneka esie okosụkde Moses uyo, Jehovah ama ọtọ enye akpamfia. Utu ke ndikam nnenem esịt mban̄a emi, Moses ama ọsọsọp ekpe Abasi ubọk ete: “O Abasi, mbọk! Mbọk, nam udọn̄ọ emi okụre enye!” (Numbers 12:13) Nso en̄wen ikpanam Moses ọbọn̄ utọ akam emi edieke mîkpedịghe ima?

NSO KE IKEME NDIKPEP NTO MOSES?

Nnyịn imekeme ndikpebe Moses ke ndinen̄ede mma Abasi. Utọ ima oro edinam nnyịn inịm mme ewụhọ esie “ke ofụri esịt.” (Rome 6:17) Ke ini ikopde uyo Jehovah ke ofụri esịt, esịt eyenem enye. (Mme N̄ke 27:11) Nnyịn ke idem nnyịn iyadia ufọn edinam emi. Ke ini inamde n̄kpọ Abasi ke ntak inen̄erede ima enye, iyanam se inende, esịt oyonyụn̄ enem nnyịn ndinam emi!—Psalm 100:2.

Usụn̄ en̄wen emi ikemede ndikpebe Moses edi ndisio esịt mma mme owo. Ke ini mme ufan m̀mê iman nnyịn ẹmende mfịna mmọ ẹditịn̄ ẹnọ nnyịn, ima esinam nnyịn inen̄ede ikpan̄ utọn̄ inọ mmọ, inyene esịtmbọm, oro edi, ikere iban̄a nte n̄kpọ oro afịnade mmọ eketre, inyụn̄ inanam iwụt ke imama mmọ.

Imekeme n̄ko ndibọn̄ akam nsịn mme ufan ye iman nnyịn nte Moses akanamde. Ndusụk ini ekeme nditie nte inyeneke se ikemede ndinam man in̄wam mmọ ke ini mmọ ẹnemede mfịna mmọ ẹnọ nnyịn. Imekeme ndikam ndọhọ mmọ ke n̄kukụre n̄kpọ emi ikemede ndinam edi ndisịn mmọ ke akam. Edi ti ikọ Bible emi: “N̄kpeubọk [m̀mê akam] edinen owo enyene odudu etieti.” (James 5:16) Akam nnyịn ekeme ndinam Jehovah anam n̄kpọ ọnọ owo emi Enye mîkaduakke ndinam n̄kpọ nnọ. Ke ntem, mbọk yak isisịn mme ufan ye mme iman nnyịn ke akam. *

Idịghe omokụt do ke imenyene ekese ndikpep nto Moses. Okposụkedi emi Moses ekedide owo nte nnyịn, enye ama enen̄ede enyene mbuọtidem, osụhọde idem onyụn̄ enyene ima. Adan̄a nte ikpebede enye, ntre ke edifọn ye nnyịn ye mbon en̄wen.—Rome 15:4.

^ ikp. eki. 8 Man Abasi okop akam nnyịn, ana inen̄ede isịn ukeme ndinam se enye oyomde. Edieke oyomde ndifiọk n̄kpọ efen mban̄a emi, kot ibuot 17 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.