Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  February 2013

 SAN̄A KPERE ABASI

‘Enye Edi Abasi Mme Odu-Uwem’

‘Enye Edi Abasi Mme Odu-Uwem’

Ndi n̄kpa okop odudu akan Abasi? Tutu amama! N̄kpa m̀mê “asua” en̄wen ekededi ikemeke ndikop odudu n̄kan “Ata Ọkpọsọn̄ Abasi.” (1 Corinth 15:26; Exodus 6:3) Abasi enyene odudu ekem ndinam mme akpan̄kpa ẹset, se enye onyụn̄ ọn̄wọn̄ọde ndinam edi oro ke obufa ererimbot esie. * Nnyịn isan̄a didie ifiọk ke Abasi ayanam emi? Jesus Eyen esie etịn̄ ikọ emi ọdọn̄de kpukpru nnyịn esịt onyụn̄ ọnọde nnyịn idotenyịn.—Kot Matthew 22:31, 32.

Jesus ọkọdọhọ mme Sadducee emi mîkenịmke ke ẹyenam mme akpan̄kpa ẹset ete: “Amaedi ediset mme akpan̄kpa, nte mbufo ikokotke se Abasi eketịn̄de ọnọ mbufo, ete, ‘Ami ndi Abasi Abraham ye Abasi Isaac ye Abasi Jacob’? Enye idịghe Abasi mme akpan̄kpa, edi edi eke mme odu-uwem.” Mi, Jesus eketịn̄ aban̄a nneme oro Abasi ekenemede ye Moses ekpere eto emi asakde ikan̄ ke n̄kpọ nte isua 1514 M.E.N. (Exodus 3:1-6) Jesus ọkọdọhọ ke se Jehovah eketịn̄de ọnọ Moses emi—“Ami ndi Abasi Abraham ye Abasi Isaac ye Abasi Jacob”—owụt nte ke idụhe se ikemede ndikpan Abasi ndinam mme akpan̄kpa ẹset. Didie ke emi edi ntre?

Akpa kan̄a, kere ban̄a se ikanamde Jesus etịn̄ ikọ emi. Abraham, Isaac, ye Jacob ẹma ẹkpan̄a ata ediwak isua mbemiso Jehovah ekenemede nneme oro ye Moses. Isua 329 ama ebe tọn̄ọ Abraham akakpa, isua 224 ebe tọn̄ọ Isaac akakpa, ndien isua 197 ebe n̄ko tọn̄ọ Jacob akakpa. Edi Jehovah ọkọdọhọ ke imọ ‘idi’ Abasi mmọ, idọhọke ke imọ ‘ikedi’ Abasi mmọ. Jehovah eketịn̄ aban̄a owo ita emi ẹma ẹkekpan̄a mi nte n̄kpọ eke mmọ ẹsụk ẹdude uwem. Ntak-a?

Jesus ọbọrọ ete: “Enye [Jehovah] idịghe Abasi mme akpan̄kpa, edi edi eke mme odu-uwem.” Kere ban̄a se ikọ emi ọwọrọde. Edieke Abasi mîdinamke mme akpan̄kpa ẹset, ọwọrọ Abraham, Isaac, ye Jacob ẹdidu ke udi ke nsinsi nsinsi. Edieke emi ekpedide ntre, ọwọrọ ke Jehovah ekpedi Abasi mme akpan̄kpa. Emi n̄ko ọkpọwọrọ ke n̄kpa okop odudu akan Jehovah, ye nte ke enye ikemeke ndinam mme anam-akpanikọ asan̄autom esie ẹset.

Nso ndien ke ikpetịn̄ iban̄a Abraham, Isaac, Jacob, ye mme anam-akpanikọ asan̄autom Jehovah eken emi ẹkekpan̄ade? Jesus ama etịn̄ ọkpọikọ emi ete: “Ke enyịn esie kpukpru mmọ ke ẹdu uwem.” (Luke 20:38) Ke nditịn̄ akpanikọ, Jehovah aduak ndinam mme asan̄autom esie emi ẹkekpan̄ade ẹset, ndien enye ayanam emi. Ntak edi oro enye ọdọhọde ke mmọ ke ẹdu uwem. (Rome 4:16, 17) Jehovah eyeti kpukpru mmọ tutu ekem ini emi enye edinamde mmọ ẹfiak ẹdidu uwem.

Jehovah enen̄ede okop odudu akan n̄kpa

Ndi ọdọn̄ fi ndifiak n̄kụt mme ufan ye iman fo oro ẹkekpan̄ade? Edieke edide ntre, ti ete ke Jehovah enen̄ede okop odudu akan n̄kpa. Idụhe n̄kpọ ndomokiet oro ekemede ndikpan enye ndinam mme akpan̄kpa ẹset nte enye aduakde. Kpep n̄kpọ efen ban̄a ediset ke n̄kpa ye Abasi emi ọn̄wọn̄ọde ndinam mme akpan̄kpa ẹset. Emi ayanam fi etetịm asan̄a ekpere Jehovah, kpa ‘Abasi mme odu-uwem.’

Itie Bible emi okpokotde ke February

Matthew 22-28Mark 1-8

^ ikp. eki. 3 Edieke oyomde ndifiọk n̄kpọ efen mban̄a nte Abasi edinamde mme owo ẹset ke obufa ererimbot esie, mbọk kot ibuot 7 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.