Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  January 2013

 IBUOTIKỌ IKPAEDEM: NDI AKPANA UTỊT ERERIMBOT ENYEK FI IDEM?

Ndi Utịt Ererimbot Esinyek Fi Idem?

Ndi Utịt Ererimbot Esinyek Fi Idem?

Ediwak owo ẹkedọhọ ke ata akwa n̄kpọ ọmọn̄ etịbe ke ofụri ererimbot ke December 21, 2012, ke n̄wed usenọfiọn̄ mbon Maya. Ndi ama okop n̄kpọ ntem? Eketie fi didie ke idem ini okokopde emi? Edieke edide nsia ama oyomo fi, anaedi esịt ama enem fi ke n̄kpọ ndomokiet iketịbede. Edieke ekekerede ke ata eti n̄kpọ ọmọn̄ etịbe, anaedi ama okop idiọkesịt ke ini n̄kpọ ndomokiet mîketịbede. Edi edieke ekekerede ke ererimbot emi ọmọn̄ esịm utịt, anaedi idotenyịn fo ama akpa mfụhọ. Ndi mbon oro ẹkedọhọde ke ererimbot eyesịm utịt usen oro ẹkenam ndudue?

Nso kaban̄a “utịt ererimbot” emi ẹtịn̄de ẹban̄a ke Bible? (Matthew 28:20, Edisana Ŋwed Abasi Ibom) Idem enyek ndusụk owo sia mmọ ẹkere ke ẹdifọfọp isọn̄ emi. Ke ini idem aduaide-duai mbon eken ndikụt se iditịbede ererimbot emi ama esịm utịt. N̄kpọ aban̄ade utịt ererimbot akakak ediwak owo. Edi ndi ekikere abian̄a mbon emi ẹdọhọde ke ererimbot ọmọn̄ esịm utịt, mîdịghe ndi ererimbot emi oyosụk esịm utịt usen kiet?

Ndifiọk se Bible etịn̄de aban̄a utịt ererimbot ekeme ndikpa fi idem. Bible etịn̄ ntak emi ikpetiede-tie ibet utọ ini emi onyụn̄ owụt ke ndusụk owo ẹkeme ndikpa mba edieke mmọ ẹkerede ke utịt ebịghi akaha ndidi. Kot nte Bible ọbọrọde ndusụk mbụme oro ẹsiwakde ndibụp mban̄a utịt ererimbot emi.

 Ndi ẹdifọfọp isọn̄ emi?

SE BIBLE ỌDỌHỌDE: “[Abasi] owụk isọn̄ ke itie esie; idisehekede tutu amama, m̀mê ke nsinsi.”PSALM 104:5.

Abasi idifọpke isọn̄ emi m̀mê ndiyak ẹsobo enye. Utu ke oro, Bible ọdọhọ ke mme owo ẹyedụn̄ ke isọn̄ emi ke nsinsi. Psalm 37:29 ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”Psalm 115:16; Isaiah 45:18.

Ke Abasi ama okobot isọn̄ ama, enye ọkọdọhọ ke kpukpru n̄kpọ “ẹfọn etieti.” Ndien enye ikpụhọkede ekikere. (Genesis 1:31) Utu ke Abasi ndiduak ndisobo isọn̄, enye akam aduak ‘ndisobo mbon oro ẹbiatde isọn̄,’ nnyụn̄ n̄kụt nte ke owo isoboke isọn̄ emi.—Ediyarade 11:18.

Edi owo ekeme ndikere m̀mê ikọ 2 Peter 3:7 ọwọrọ didie. Itien̄wed oro ọdọhọ ete: “Ẹda ukem ikọ emi ẹmụm enyọn̄ ye isọn̄ emi ẹdude ke emi ẹnịm ẹnọ ikan̄.” Ndi emi iwụtke ke ẹyefọp isọn̄ emi? Ke nditịm ntịn̄, ke ini Bible etịn̄de ndusụk ini aban̄a “enyọn̄” m̀mê heaven, “isọn̄,” ye “ikan̄,” emi ẹsida aban̄a n̄kpọ. Ke uwụtn̄kpọ, Genesis 11:1 ọdọhọ ete: “Ofụri isọn̄ ẹkesem usem kiet.” Idịghe ata “isọn̄” ke ẹtịn̄ ẹban̄a mi, edi mme owo.

Se Peter ekenemede owụt ke idịghe ata enyọn̄, isọn̄, ye ikan̄ ke enye eketịn̄ aban̄a ke 2 Peter 3:7. Ufan̄ikọ 5 ye 6 ẹtịn̄ nte ẹkedade mmọn̄ ukwọ ẹsobo eyo Noah, edi n̄kpọ ikanamke isọn̄ emi. Utu ke oro, Ukwọ oro okosobo mme idiọkowo. Enye n̄ko ama osobo mme andikara eyo oro, ndien mmọ ke ẹkot enyọn̄ ke itien̄wed emi. (Genesis 6:11) Mmọdo, ikọ Peter ọwọrọ ke Abasi oyonyụn̄ osobo mme idiọkowo eyo emi ye idiọk ukara mmọ taktak nte n̄kpọ eke ẹtan̄de mmọ ẹdọn̄ ke ikan̄ ẹfọp.

Nso iditịbe ererimbot emi ama esịm utịt?

SE BIBLE ỌDỌHỌDE: “Ererimbot ke ebebe efep ye mme udọn̄ esie, edi owo eke anamde uduak Abasi ododu ke nsinsi.”1 JOHN 2:17.

“Ererimbot” emi edibede ifep idịghe isọn̄ emi, edi edi mme owo emi mîmaha ndidu uwem nte Abasi etemede. Kpa nte abiausọbọ ekemede ndisịbe owo ndido idem emi udọn̄ọ odụkde mfep mbak owo oro idikpa, ntre n̄ko ke Abasi ‘edisịbe mme anamidiọk ifep’ man nti owo ẹkeme ndikop inem uwem ke  isọn̄ emi. (Psalm 37:9) Emi ọwọrọ ke “utịt ererimbot” emi edikam ifọfọn ye nnyịn.

Ndusụk mme andikabade Bible ẹma ẹfiọk ke utịt ererimbot emi Bible etịn̄de aban̄a idịghe utịt isọn̄. Ntak edi oro mmọ ẹkekabarede enye nte “akpatre ini editịm n̄kpọ emi” m̀mê “akpatre ini eyo emi.” (Matthew 24:3; Edisana Ŋwed Abasi Ibom) Sia edide mme owo ye isọn̄ ẹyebọhọ utịt ererimbot emi, ndi inenke ndikere ke mme owo ẹyeka iso ẹdụn̄ ke isọn̄ emi? Bible ọdọhọ ke enen ndikere ntre sia enye etịn̄ aban̄a “eyo eke edidide.”—Luke 18:30, Edisana Ŋwed Abasi Ibom.

Jesus okokot ini oro “ini [emi] ẹdinamde n̄kpọ ẹkabade ẹdi mbufa.” Jesus ayanam ubonowo ẹfiak ẹketie nte Abasi okoyomde mmọ ẹtie. (Matthew 19:28, Edisana Ŋwed Abasi Ibom) Ini oro ndien ke

Edieke inamde “uduak Abasi,” oro edi, se enye ọdọhọde inam, utịt ererimbot idinyekke nnyịn idem. Utu ke oro, idikam itetie ibet.

Ndi utịt ererimbot enen̄ede ekpere?

SE BIBLE ỌDỌHỌDE: “Ke ini mbufo ẹkụtde nte mme n̄kpọ emi ẹtịbede, ẹfiọk ẹte obio ubọn̄ Abasi emekpere.”LUKE 21:31.

Prọfesọ Richard Kyle ewet ke n̄wed esie emi The Last Days Are Here Again ete ke “ndutịme ye afanikọn̄ oro ẹtịbede inikiet inikiet ke ererimbot emi” akpan akpan ke ini owo mîdiọn̄ọke ntak “anam ediwak owo ẹdọhọ ke ererimbot ọmọn̄ esịm utịt.”

Mme andiwet Bible emi ẹketịn̄de ẹban̄a utịt ererimbot ikodomoke nditịn̄ se mme n̄kpọntịbe eyo mmọ ẹkedade ẹnọ. Abasi ọkọnọ mmọ edisana spirit nditịn̄ nte n̄kpọ editiede ke ini utịt ererimbot ekperede. Se ndusụk n̄kpọ emi mmọ ẹketịn̄de mi ise m̀mê mmọ ke ẹsu ke eyo nnyịn.

Jesus ọkọdọhọ ima ikokụt “kpukpru n̄kpọ emi,” yak ifiọk ke utịt ererimbot ekpere. (Matthew 24:33) Mme Ntiense Jehovah ẹnịm ke kpukpru emi ẹwụt ke utịt ererimbot enen̄ede ekpere, ndien mmọ ke ẹkwọrọ emi ẹnọ mme owo ke idụt 236.

Ndi ndikere ke utịt ọmọn̄ ededi ekem enye idịghe ọwọrọ ke enye ididịghe aba?

SE BIBLE ỌDỌHỌDE: “Ini ekededi emi mmọ ẹdọhọde: ‘Emem ye ifụre!’ adan̄aoro nsobo ayabuat mmọ kpa nte uman abuatde n̄wan idịbi; ndien mmọ idikwe usụn̄ ubọhọ.”1 THESSALONICA 5:3.

Bible ọdọhọ ke usen nsobo ererimbot emi editie nte ntọn̄ọ ubiak uman emi esibuatde-buat n̄wan idịbi. Se iditịbede mbemiso utịt ererimbot emi etie nte n̄wan emi asan̄ade ye idịbi. N̄wan idịbi ọfiọk ke iyaman eyen usen kiet. Abiausọbọ ekeme ndisiak usen emi enye edimande. Edi ekpededi enye imanke usen oro, enye ọfiọk ke iyosụk iman ke mîbịghike. Ntre n̄ko, ndikere ke ererimbot emi ọmọn̄ esịm utịt ke ini mîkemke iwọrọke ke nnyịn idụhe ke “mme akpatre usen.”—2 Timothy 3:1.

Edi owo ekeme ndibụp ete, ‘Edieke inen̄erede ikụt idiọn̄ọ emi ẹwụtde ke utịt ekpere, ntak emi ediwak owo mîkwe?’ Bible ama etetịn̄ ke utịt ama ekpere, ke ediwak owo ẹdikam idada idiọn̄ọ utịt inam n̄kpọ imam. Utu ke ndinyịme ke se ikụtde owụt ke idu uwem ke mme akpatre usen, mmọ ẹdikam isasak ite: “Tọn̄ọ nte mme ete ete nnyịn ẹkede ke n̄kpa, kpukpru n̄kpọ ẹtie kpa nte ẹketiede toto ke editọn̄ọ emi ẹkebotde mme  n̄kpọ.” (2 Peter 3:3, 4) Emi ọwọrọ ke kpa ye oro nnyịn ikụtde idiọn̄ọ emi in̄wan̄-in̄wan̄, ediwak owo ididọn̄ke enyịn do.—Matthew 24:38, 39.

Nnyịn imeneme ndusụk n̄kpọ ke Bible emi ẹwụtde ke utịt ererimbot emi ekpere ke ibuotikọ emi. * Ndi akpama ndifiọk mme n̄kpọ en̄wen? Ke edide ntre, dọhọ Mme Ntiense Jehovah ẹdikpep Bible ye afo. Ẹkeme ndidi ndikpep fi ke ufọk fo, m̀mê ke ebiet en̄wen emi afo amade, mîdịghe ke fon. Ukpepn̄kpọ emi edi ke mfọn, ndien inua ikemeke ndibụk ufọn oro edibọde.

^ ikp. eki. 39 Edieke oyomde ndifiọk n̄kpọ efen mban̄a emi, mbọk kot ibuot 9, emi ọdọhọde ete: “Nte Nnyịn Idu Uwem ke ‘Mme Akpatre Usen’?” ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

 

Kpep N̄kpọ En̄wen

Nso ke Bible Enen̄ede Ekpep?

Nte Nnyịn Idu Uwem ke “Mme Akpatre Usen”?

N̄kpama Ẹdikpep Mi Bible ke Mfọn

Ẹsikpep Owo Bible Didie?

Mme owo ke ofụri ererimbot ẹdiọn̄ọ ke Mme Ntiense Jehovah ẹsikpep owo Bible ke mfọn. Se nte mmọ ẹsinamde.