Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2013

 BIBLE OKPỤHỌDE MME OWO

“Mmenyene Ata Ifụre Ndien.”

“Mmenyene Ata Ifụre Ndien.”
  • ISUA AKAMANADE: 1981
  • EBIET OTODE: UNITED STATES
  • SE ENYE EKEDIDE: IDIỌK UDỌ

NTE UWEM MI EKETIEDE:

N̄kamana ke Moundsville, ekpri obio kiet ke mben Akpa Ohio ke edem usoputịn Virginia, U.S.A. Ikedi nditọ inan̄, irenowo ita ye n̄wan kiet ndien ami n̄kedi udọ. Ufọk nnyịn ama esinen̄ede enem. Ete ye eka mi ẹma ẹsinam utom etieti, ẹnam akpanikọ ẹnyụn̄ ẹma mme owo. Okposụkedi emi nnyịn mîkenyeneke n̄kpọ, nnyịn ikonyụn̄ idịghe ubuene. Ete ye eka mi emi ẹkedi Mme Ntiense Jehovah, ndien mmọ ẹma ẹsịn ifịk ẹkpep nnyịn Bible toto ke uyen.

Ke mma n̄kokpon esisịt, mma ntre ndinam se ete ye eka mi ẹkekpepde mi. N̄kekere ke Bible iyakke owo enyene ifụre onyụn̄ okop inem uwem. Eketie nte ke owo ndikam nnam se enye amade edinọ enye inemesịt. Ntre, mma ntre ndidụk mbono esop Mme Ntiense Jehovah. Nditọeka mi iba ẹma ẹtiene mi edem. Ete ye eka mi ẹma ẹnam se mmọ ẹkekeme ndin̄wam nnyịn, edi nnyịn ikọnọhọ mmọ utọn̄.

N̄kọfiọkke ke ifụre oro n̄koyomde edikam inam ndụk ufụn nnọ n̄kpọsọn̄ mmịn ye n̄kpọsọn̄ ibọk. Ke ini n̄kọnyọn̄de n̄wed usen kiet, ufan mi ama ọnọ mi sika. Mma mbọ n̄n̄wọn̄. Tọn̄ọ ke usen oro, mma nduọ nnyịne ke mme mbubiam ido eken, n̄n̄wọn̄ ikọn̄ekpo, nda n̄kpọsọn̄ ibọk nnyụn̄ ndu oburobụt uwem. Nte ini akakade, mma nsida n̄kpọsọn̄ ibọk ke utọ ke utọ nnyụn̄ ndụk ufụn nnọ mmọ. Ekem mma ntọn̄ọ ndinyanyam man nnyene okụk ndu uwem atahade emi.

Okposụkedi emi n̄kanamde nte ke utọ uwem emi n̄kodude idiọkke, esịt okosụk amamia mi ufen. Edi mma n̄kere ke n̄kemeke ndinyan̄a sia mmanyan̄a ọdọduọhọ ke obu. Kpa ye oro n̄kesitienede n̄ka unek ye udia uwem, mma nsikop mfụhọ ye ndobo. Ndusụk ini, mma nsitie n̄kere utọ uwem atahade emi ndude ke ini edide ete ye eka mi ko ke ẹdu ata uwem.

NTE BIBLE OKOKPỤHỌREDE UWEM MI:

N̄kekere ke utọ owo nte ami ikemeke ndikpụhọde, edi mmọ eken ikekereke  ntre. Ete ye eka mi ẹma ẹdọhọ nditiene mmimọ ndụk akamba mbono Mme Ntiense Jehovah ke 2000. Mma nnyụn̄ n̄ka ke nnam didie. Idem ama akpa mi ndikụt nditọeka mi iba emi ẹketienede mi ẹdu idiọk uwem ke mbono oro.

Mma ntie ke itie mbono emi nti ke kpa mi ke n̄kodụk kọnsat isua oko. Se n̄kokụtde ama otụk mi esịm ọkpọ. Mbio ye sika ẹkeyọyọhọ mi ke ini ikodụkde kọnsat. N̄kpọ efen edi ke ediwak owo do ẹketie afai afai, ẹnyụn̄ ẹbre etịme etịme ikwọ. Edi mme owo ke itie mbono Mme Ntiense emi ẹketie ufan ufan, ẹkop ata inemesịt, ẹnyụn̄ ẹdara owo nte ami, okposụkedi emi mma n̄kọkpọn̄ mmọ ke ediwak isua. Mmọ ẹma ẹnam itie emi asana, se n̄konyụn̄ n̄kopde do ama anam nnyene idotenyịn. Ndikụt nte Bible anamde mme owo ẹdu uwem ẹnyụn̄ ẹkop inemesịt ama anam n̄kere se ikanamde n̄kpọn̄ usụn̄ Abasi.—Isaiah 48:17, 18.

“Bible anam mi ntre ndida nnyụn̄ nnyanyam n̄kpọsọn̄ ibọk. Bible anam mi ndi eti owo ke obio”

Mma mbiere ndifiak ndinam n̄kpọ Abasi ke mbono oro ama akasuana. Se nditọeka mi iba oro ẹkenyụn̄ ẹkopde ke itie mbono oro ama anam mmọ ẹbiere n̄ko ndifiak n̄kpono Abasi. Nnyịn mbita ima inyịme ẹfiak ẹkpep nnyịn Bible.

Itie Bible emi ekenen̄erede otụk mi ekedi James 4:8. Enye ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” Mma ndikụt ke edieke nyomde ndisan̄a n̄kpere Abasi, ke ana n̄kpụhọde, ntre sika, n̄kpọsọn̄ ibọk, nnyụn̄ ntre ndin̄wọn̄ mmịn mbe ubọk.—2 Corinth 7:1.

Mma ntre idiọk ndụk oro n̄kesidụkde nnyụn̄ ntọn̄ọ ndidụk ndụk ye Mme Ntiense Jehovah. Ebiowo emi ekekpepde mi Bible ama enen̄ede an̄wam mi. Enye ama esikot mi kpukpru ini ke fon esinyụn̄ awaha edem mi ese nte n̄kpọ etiede ye ami. Ami ye enye idi itai ye aban̄ tutu esịm emi.

Ami ye nditọeka mi iba eken ima ina baptism ke 2001 ndiwụt ke imayak idem inọ Abasi. Inua ikemeke ndibụk nte esịt ekenemde ete ye eka mi, ye ekperedem eyeneka mi emi okosụk anamde n̄kpọ Abasi. Mmọ ẹma ẹnen̄ede ẹkop inemesịt nte kpukpru nnyịn ifiakde idiana kiet ikpono Jehovah.

UFỌN ORO MBỌDE:

N̄kesikere ke Bible iyakke owo enyene ifụre, edi idahaemi, mmedi ndikụt ke enye akam ekpekpeme owo. Bible anam mi ntre ndida nnyụn̄ nnyanyam n̄kpọsọn̄ ibọk. Bible anam mi ndi eti owo ke obio.

Mmokop inemesịt nditiene ikọt Abasi ke ofụri ererimbot n̄kpono Jehovah. Mmọ ẹnen̄ede ẹma kiet eken ẹnyụn̄ ẹkpono Abasi ye esịt kiet. (John 13:34, 35) Mi ke Abasi okosio ata san̄asan̄a enọ ọnọ mi, oro edi, Adrianne edima an̄wan mi. Esịt enen̄ede enem nnyịn ndidiana kiet nnam n̄kpọ Abasi.

Idahaemi, utu ke ndidu uwem atahade, ndikam n̄kwọrọ ikọ ofụri ini, n̄kpep mme owo nte mmọ ẹkemede ndida Ikọ Abasi ndu uwem nnyụn̄ mbọ ufọn. Se inọde mi ata inemesịt edi emi. Mmekeme ndidọhọ ke ofụri esịt nte ke Bible okpụhọde owo. Mmenyene ata ifụre ndien.