Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2013

 San̄a Kpere Abasi

“Afo . . . Ayarade Mmọ Ọnọ Nseknditọ”

“Afo . . . Ayarade Mmọ Ọnọ Nseknditọ”

Ndi emenen̄ede oyom ndifiọk Abasi—se enye amade, se enye asuade, ye se enye aduakde? Jehovah Abasi etịn̄ utọ owo emi imọ idide ke Bible. Edi idịghe kpukpru owo ẹkeme ndikot Bible nnyụn̄ nnen̄ede mfiọk Abasi. Ntak-a? Sia idịghe kpukpru owo ke Abasi esiyak ẹfiọk imọ. Ẹyak ise se Jesus eketịn̄de aban̄a emi.—Kot Matthew 11:25.

Itien̄wed oro ọtọn̄ọ ntem: “Adan̄aoro Jesus ọdọhọ ete.” Nte Jesus ọtọn̄ọde ikọ emi owụt ke etie nte enyene se isụk itịbede emi anamde enye etịn̄ se enye oyomde nditịn̄. Idahaoro ke enye osụk asua ọnọ obio ita ke Galilee emi mîkamaha nditiene enye kpa ye mme utịben̄kpọ emi enye akanamde do. (Matthew 11:20-24) Afo emekeme ndikere m̀mê odu owo emi okposụk okụtde mme utịben̄kpọ emi Jesus akanamde edi imaha nditiene enye. Nsọn̄ibuot mmọ ikayakke mmọ ẹtiene Jesus.—Matthew 13:10-15.

Jesus ama ọfiọk ke enyene n̄kpọ iba emi ẹkemede ndin̄wam nnyịn inen̄ede ifiọk Abasi—oro edi, un̄wam Abasi ye eti esịt. Kop akam emi enye ọkọbọn̄de ọnọ Abasi: “Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo emedịp mbon ọniọn̄ ye mbon ikike mme n̄kpọ emi onyụn̄ ayarade mmọ ọnọ nseknditọ.” Ndi omokụt ntak emi ikọdọhọde ke idịghe kpukpru owo ke Abasi esiyak ẹfiọk imọ? Jehovah emi edide “Ọbọn̄ enyọn̄ ye isọn̄” ekeme ndibiere ndidịp m̀mê ndiyarade ikọ esie nnọ owo eke enye amade. Edi emi iwọrọke ke enye asasat owo. Nso ndien isinam enye ayak ndusụk owo ẹfiọk imọ edi iyakke mbon eken?

Jehovah ama mbon nsụhọdeidem, imaha mbon ntan̄idem. (James 4:6) Enye isiyakke “mbon ọniọn̄ ye ikike” ererimbot emi, oro ntan̄idem mmọ anamde mmọ ẹkere ke mmimọ iyomke Abasi, ẹfiọk imọ. (1 Corinth 1:19-21) Edi enye esiyak nseknditọ ẹfiọk imọ—oro edi, mbon oro ẹsụhọrede idem nte nditọwọn̄, ẹnyụn̄ ẹnen̄erede ẹyom ndifiọk enye. (Matthew 18:1-4; 1 Corinth 1:26-28) Jesus ama okụt utọ mbon emi. Ke uwụtn̄kpọ, se enye ekekpepde ikan̄wan̄ake ediwak mme adaiso ido ukpono emi ẹkenen̄erede ẹfiọk n̄wed ẹnyụn̄ ẹtan̄ idem, edi akakam an̄wan̄a ikpîkpu mme ọkọiyak emi ẹkesụhọrede idem. (Matthew 4:18-22; 23:1-5; Utom 4:13) N̄ko-n̄ko, ndusụk imọ owo ye mme ọfiọk n̄wed emi ẹkenen̄erede ẹsụhọde idem ẹma ẹtiene Jesus.—Luke 19:1, 2, 8; Utom 22:1-3.

Yak ifiak ise mbụme oro ikobụpde ke ntọn̄ọ ibuotikọ emi: Ndi emenen̄ede oyom ndifiọk Abasi? Edieke oyomde, esịt eyenem fi ndifiọk ke Abasi iyakke mbon oro ẹdade idem ke mfiọk-n̄kaha ẹfiọk imọ, edi ke ayak mbon nsụhọdeidem oro mme ọfiọkn̄kpọ owo ererimbot emi ẹdade ke mbio, ẹfiọk imọ. Mmọdo, edieke enen̄erede osụhọde idem ekpep Bible sia etịmde oyom ndifiọk Abasi, Jehovah iditreke ndiyak fi etiene ọfiọk imọ. Emi ayanam fi enen̄ede okop inemesịt onyụn̄ ekeme ndidu “ata uwem”—oro edi, nsinsi uwem ke edinen obufa ererimbot Abasi emi edide esesịm ama mi. *1 Timothy 6:12, 19; 2 Peter 3:13.

Itie Bible emi okpokotde ke January

Matthew 1-21

^ ikp. eki. 7 Mme Ntiense Jehovah ẹyema nditie ye afo n̄kpep Bible man enen̄ede ọfiọk Abasi ye se enye aduakde. Mmọ ẹsida n̄wed emi ekerede Nso ke Bible Enen̄ede Ekpep? ẹnam emi.