Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2011

Se Akpanamde ke Ini Oto-Obot Afanikọn̄

Se Akpanamde ke Ini Oto-Obot Afanikọn̄

Nso ke owo akpanam ke emi oto-obot afanikọn̄ awakde ntem onyụn̄ owotde mme owo idahaemi akan nte akanam owotde? Ẹyak ineme se akpanamde aban̄a emi.

Kpọn̄ ebiet emi oto-obot afanikọn̄ ekemede nditịbe.

Mme N̄ke 22:3 ọdọhọ ke “owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.” Eti item Bible emi ekeme ndisio owo ke afanikọn̄. Edieke ukara ẹdọhọde ke obot ọmọn̄ otop obomo, m̀mê ke mmọn̄ ọmọn̄ ọtọ emen obio, m̀mê ke idiọk oyobio ọmọn̄ ọwọrọ, owo emi enyenede ibuot ekpenyene ndikpọn̄ ebiet oro iwiwa n̄ka ebiet oro afanikọn̄ emi mîdisịmke. Uwem ọsọn̄ urua akan ufọk m̀mê inyene ekededi.

Ndusụk owo ẹnyene n̄kpọ ekem ndibiere ke mmimọ ididụn̄ke ke ebiet emi oto-obot afanikọn̄ esiwakde nditịbe. Esop Edidiana Mme Idụt ẹdọhọ ete: “Mme ebiet oro oto-obot afanikọn̄ ẹsiwakde nditịbe inen̄ekede iwak ke isọn̄ emi. Ikpọ oto-obot afanikọn̄ edisụk itịbe kpa mi ke ini iso.” Emi ekeme nditịbe akpan akpan ke mme ebiet oro ẹkperede esụk, m̀mê ebiet oro ikpọ itiat ke esịtisọn̄ ẹfeberede ẹkpọn̄ ebiet emi mmọ ẹkpedude. Edieke mûdụn̄ke ke utọ ebiet emi, mîdịghe edieke ọwọrọde do aka ebiet en̄wen, utọ afanikọn̄ emi idisọpke isịm fi.

Biere se edinamde.

Oto-obot afanikọn̄ ekeme ndisụk nnọmọ fi ke mbuari idem ke ama akanam se ẹtemede ke enyọn̄ emi. Edi se idin̄wamde fi edi ndibem iso mbiere se edinamde ke ini n̄kpọ mîkam itịbeke kan̄a. Emi ekekem ye item N̄wed Abasi emi ikokotde ke Mme N̄ke 22:3. Ndi emenyene ekpri ekpat itọk onyụn̄ eben̄e idem itọk? N̄wed emi, 1-2-3 of Disaster Education ọdọhọ ọdọn̄ mme n̄kpọ emi ke ekpat itọk fo: Se ekemede ndida n̄n̄wam owo mbemiso abiausọbọ edisịm, mmọn̄, udia emi mîdisọpke ibiara, ye mme akpan n̄wed nte ID kad, n̄wed insurance, ye mme n̄kpọ ntre. Ọkpọfọn esitie ye ubon fo eneme utọ oto-obot afanikọn̄ oro ekemede nditịbe ke edem mbufo ye se ẹkpenamde.

Ndi emenyene ekpri ekpat itọk onyụn̄ eben̄e idem itọk?

Nen̄ede kpere Abasi.

Emi ekeme ndin̄wam fi ke idaha ekededi. Bible ọdọhọ ke Abasi edi “Ete mbọm ye Abasi kpukpru ndọn̄esịt, emi ọdọn̄de nnyịn esịt ke kpukpru ukụt nnyịn.” Afiak ọdọhọ ke enye edi “Abasi emi ọnọde mbon oro ẹfụhọde ndọn̄esịt.”—2 Corinth 1:3, 4; 7:6.

Abasi enen̄ede ọfiọk se iwọrọde mbon oro ẹbuọtde idem ye enye. Enye edi Abasi ima emi esisọn̄ọde mme owo idem ke nsio nsio usụn̄. (1 John 4:8) Ndibọn̄ akam mben̄e Abasi okopodudu edisana spirit esie, utu ke nditie  mbet utịben̄kpọ, ekeme ndin̄wam ke idaha ekededi. Edisana spirit ekeme ndinam mme anam-akpanikọ asan̄autom Abasi oro ẹsobode afanikọn̄ ẹti mme itie N̄wed Abasi emi ẹkemede ndidọn̄ mmọ esịt. Ndien kpukpru emi ẹkeme ndinam etie mmọ ke idem nte eketiede David, edidem Israel, emi ọkọdọhọde ete: “Idem edieke nsan̄ade ke itịghede ọkpọsọn̄ ekịm, ndifeheke idiọk, koro afo odude ye ami; eto fo ye esan̄ fo ẹdọn̄ mi esịt.”—Psalm 23:4.

Ndibọn̄ akam mben̄e Abasi okopodudu edisana spirit esie, utu ke nditie mbet utịben̄kpọ, ekeme ndin̄wam ke idaha ekededi

Un̄wam emi ekemmọ mme Christian ẹnọde.

Prọfet kiet emi ekekerede Agabus ama ọdọhọ ke eyo mme apostle ete ke “akan̄ ọmọn̄ odu ke ofụri isọn̄; ndien emi ama ada itie ke eyo Claudius.” Akan̄ emi ekenen̄ede ọnọmọ mme mbet Jesus emi ẹkedude ke Judea. Nso ke mme mbet eken ẹkenam ke ini mmọ ẹkopde se iwọrọde nditọete mmọ? Bible ọdọhọ ete: “Mme mbet [ẹma] ẹbiere, owo mmọ kiet kiet nte ekemde ye se owo enyenede, ndinọ n̄kpọ un̄wam ẹsọk nditọete emi ẹdụn̄de ke Judea.” (Utom 11:28, 29) Mmọ ẹma ẹnọ n̄kpọ ẹsọk nditọete mmọ emi.

Mme Christian ẹsin̄wam kiet eken ke ini afanikọn̄

“Onyụn̄ etie nte mmenyene owo”

Se mme asan̄autom Abasi ẹsinyụn̄ ẹnamde mfịn edi oro ke ini nditọete mmọ ẹsobode afanikọn̄. Mme owo ẹnen̄ede ẹdiọn̄ọ nte Mme Ntiense Jehovah ẹsin̄wamde nditọete mmọ. Ke uwụtn̄kpọ, ke ini akwa unyekisọn̄ eketịbede ke Chile ke February 27, 2010, Mme Ntiense Jehovah ẹma ẹsọsọp ẹken̄wam mme owo do. Karla emi akwa oyobio ekemende ufọk mmọ ọdọhọ ete: “Ama enen̄ede enem nnyịn ndikụt [ekemmọ Mme Ntiense] ẹdide ke ndan̄nsiere ẹdin̄wam nnyịn. Imenịm ke Jehovah akada mmọ ọdọn̄ nnyịn esịt. Onyụn̄ etie nte mmenyene owo.” Ete eka esie emi mîdịghe Ntiense ọkọdọhọ ke ama okokụt un̄wam oro Mme Ntiense ẹnọde ete: “Se n̄kụtde emi enen̄ede okpụhọde ye se nsikụtde ke ufọkabasi nnyịn.” Se enye okokụtde ama anam enye ọdọhọ Mme Ntiense Jehovah ẹdikpep imọ Bible.

Ndidu ye mbon oro ẹmade Abasi ekeme ndinen̄ede n̄n̄wam ke ini afanikọn̄. Edi ndi ini oyodu emi oto-obot afanikọn̄ mîdidụhe aba ke isọn̄ emi? Ẹyak ise se Bible etịn̄de aban̄a emi.