Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2011

Oto-Obot Afanikọn̄ Idụhe Aba!

Oto-Obot Afanikọn̄ Idụhe Aba!

NSO ke akpanam edieke owo ọkpọdọhọde fi ete, “Ibịghike, oto-obot afanikọn̄ ididụhe aba ke ererimbot emi”? Ekeme ndidi edidọhọ enye, “Adadaba. Oto-obot afanikọn̄ edisụk idodu.” Mîdịghe, emekeme ndikere m̀mê anie ke enye oyom ndibian̄a.

Okposụkedi emi etiede nte oto-obot afanikọn̄ iditreke, odu se inọde nnyịn ata idotenyịn nte ke enye eyetre. Edi idịghe owo edinam enye etre. Mme owo ikam itịmke idiọn̄ọ nte mme n̄kpọ-obot ẹtiede ye ntak emi n̄kpọ ẹtiede ntem, owo itịn̄ke-tịn̄ iban̄a ndikara mmọ m̀mê ndinam mmọ ẹtre ndinọ nnyịn afanikọn̄. Enyene-ọniọn̄ Edidem Solomon emi akakarade Israel eset ekewet ete: “N̄kụt kpukpru utom ata Abasi, nte ubonowo mîkemeke ndifiọk utom emi ẹnamde ke idak utịn; koro ubonowo ẹsịnde idem ọkpọsọn̄ ẹyom ndifiọk, edi mmọ ifiọkke. Ndien ọkpọkọm mmọ ẹdọdọhọ ke imenyene ọniọn̄ ikem ndifiọk, mmọ idikemeke ndifiọk.”—Ecclesiastes 8:17.

Edieke owo mîkemeke ndinam oto-obot afanikọn̄ etre, anie ndien ekeme? Bible ọdọhọ ke Andibot ekeme. Enye okobot isọn̄ ye mmọn̄ onyụn̄ enịm mmọ ke itie mmọ. (Ecclesiastes 1:7) Ke adianade do, Abasi itiehe nte owo, odudu esie inyeneke adan̄a. Prọfet Jeremiah ama ọsọn̄ọ emi ete: “O Jehovah Akakan Ọbọn̄ Andikara! Sese, edi afo akada akwa odudu fo ye edinyanade ubọk fo anam enyọn̄ ye isọn̄. Ofụri n̄kpọ emi isọn̄ke ikan fi.” (Jeremiah 32:17) Sia edide Abasi okobot isọn̄ ye kpukpru se idude ke esịt, enye ọfiọk nte akpakamade n̄kpọ esie man mme owo ẹkpedụn̄ ke emem ye ifụre.—Psalm 37:11; 115:16.

Abasi edisan̄a didie inam mme oto-obot afanikọn̄ ẹtre? Idịghe emeti ke ọyọhọ ibuotikọ iba ke nneme emi ọkọdọhọ ke ndiọi n̄kpọ oro ẹtịbede ke isọn̄ idahaemi ẹwụt ke nnyịn idu ke “akpatre ini editịm n̄kpọ emi.” Jesus ọkọdọhọ ete: “Ke ini mbufo ẹkụtde nte mme n̄kpọ emi ẹtịbede, ẹfiọk ẹte obio ubọn̄ Abasi emekpere.” (Matthew 24:3; Luke 21:31) Obio Ubọn̄ Abasi edi ukara Abasi ke heaven; ukara emi oyokpụhọde n̄kpọ akamba akamba ke isọn̄ emi, onyụn̄ anam mme oto-obot afanikọn̄ ẹtre. Okposụkedi emi Jehovah Abasi enyenede odudu ndinam  emi ke idemesie, enye ayak utom emi ọnọ Eyen esie anam. Kop se prọfet Daniel eketịn̄de aban̄a Eyen Abasi mi: “Ẹnọ enye ukara ye itie ukpono ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye.”—Daniel 7:14.

Abasi ọnọ Eyen esie odudu nditre kpukpru afanikọn̄ ke isọn̄ man isọn̄ emi enem owo ndidụn̄ ndien. Ke ini Jesus okodude ke isọn̄ n̄kpọ nte tọsịn isua iba emi ẹkebede, enye ama owụt ke imenyene odudu ikan mme n̄kpọ-obot. Ke ini mme mbet esie ẹkewatde ubom isan̄ kiet ke Inyan̄ Galilee, “akwa oyobio [ama] etịbe, mbufụt onyụn̄ ọtọ odụk ubom, tutu mmọn̄ ekpere ndiyọhọ ubom oro.” Idem ama enyek mme mbet esie tutu mmọ ẹkere ke imọn̄ itak, ntre mmọ ẹtịn̄ nte etiede mmọ ke idem ẹnọ Jesus. Nso ke Jesus akanam? N̄kukụre se enye akanamde ekedi ndiduari ofụm nnyụn̄ ndọhọ inyan̄ nte: “‘Dobo! Na sụn̄!’ Ndien ofụm odobo, akwa ndobo onyụn̄ odu.” Idem ama enen̄ede akpa mme mbet esie, anam mmọ ẹbụp kiet eken ẹte: “Anie ededi emi, emi ofụm ye inyan̄ ẹkopde uyo esie?”—Mark 4:37-41.

Abasi ama ọnọ Jesus odudu oro akam akande oro tọn̄ọ enye ekeset aka heaven. Sia enye edide Edidem Obio Ubọn̄ Abasi, enye oyokụt ete ke imokpụhọde isọn̄ emi man mme owo ẹkeme ndidụn̄ ke emem ye ifụre, ndien enye enyene odudu ndinam oro.

Edi nte ima ikokokụt, ndiọi owo emi ẹdiọkde itọn̄ ẹyom ufọn idemmọ kpọt ẹdi ntak ediwak afanikọn̄ oro ẹsịmde nnyịn mfịn. Nso ke Obio Ubọn̄ Abasi edinam ye mmọ edieke mmọ ẹkade iso ẹdu uwem ntem, mînyụn̄ inyịmeke ndikabade esịt? Bible ọdọhọ ke Ọbọn̄ Jesus ‘oyoto heaven edi ye mme okopodudu angel esie ke ikan̄ eke asakde, onyụn̄ ada usiene ọsọk mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.’ Ih, Jesus oyosobo “mbon oro ẹbiatde isọn̄.”—2 Thessalonica 1:7, 8; Ediyarade 11:18.

Ke oro ebede, Jesus Christ emi edide “Edidem ndidem” oyokụt ete ke mme n̄kpọ-obot ẹdu ke itie mmọ, inyụn̄ inọmọke owo ndomokiet ke ukara imọ. (Ediyarade 19:16) Enye ayada odudu esie anam ofụm, eyo, ye edịm ẹdu ke itie mmọ ke usụn̄ oro ọfọnde ye kpukpru owo. Jehovah Abasi ama etetịn̄ nte emi editiede anyan ini ko ete: “Nyọnọ mbufo edịm ke edikem ini, ndien isọn̄ oyon̄wụm mbun̄wụm, eto ke in̄wan̄ oyonyụn̄ osion̄o mfri esie.” (Leviticus 26:4) Mme owo ẹyebọp ufọk ini oro, inyụn̄ ikopke ndịk ke oyobio m̀mê n̄kpọ en̄wen ekededi oyowụri. Isaiah 65:21 ọdọhọ ete: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.”

Nso ke Afo Akpanam?

Nnyịn imọfiọk ke etiene ọdọn̄ fi ndidụn̄ ke ererimbot emi oto-obot afanikọn̄ mîdidụhe. Edi nso ke akpanam man etiene odu do? Sia “mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus” mîdidụhe do, ọwọrọ ke ana ekpep n̄kpọ aban̄a Abasi onyụn̄ ananam owụt ke imoyom enye edikara isọn̄ emi. Abasi oyom nnyịn ifiọk imọ inyụn̄ isụk ibuot inọ eti mbụk Obio Ubọn̄ oro imọ inọde Eyen imọ odudu ndikara.

Mfọnn̄kan usụn̄ ndinam emi edi nditịn̄ enyịn n̄kpep Bible. Bible etịn̄ se owo akpanamde man etiene odu ke isọn̄ emi ke ini Obio Ubọn̄ Abasi edikarade, inyụn̄ inam isọn̄ emi odu ke ifụre. Mbọk dọhọ Mme Ntiense Jehovah ẹnam fi ọfiọk se Bible ekpepde. Esịt eyenen̄ede enem mmọ ndinam oro. Iyom ndinam fi ọfiọk ke edieke esịnde idem ekpep n̄kpọ man ọfiọk Abasi onyụn̄ osụkde ibuot ọnọ eti mbụk, ikọ Mme N̄ke 1:33 oyosu fi ke idem. Itien̄wed oro ọdọhọ ete: “Owo eke okopde uyo mi oyodụn̄ ke ifụre inyụn̄ ikopke ndịk afanikọn̄.”

 

Kpep N̄kpọ En̄wen

Nso Idi Eti Mbụk?

Se se idide eti mbụk emi otode Abasi, ntak emi ikpọkwọrọde eti mbụk emi usọp usọp, se ikpanamde.

Nso Idi Obio Ubọn̄ Abasi?

Anie edi Edidem Obio Ubọn̄ Abasi, ndien nso ke Obio Ubọn̄ Abasi edinam?

N̄kpama Ẹdikpep Mi Bible

N̄kpama ẹdikpep mi Bible ke mfọn ke ebiet ye ini eke mmade.