Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2011-11-01

  Ukpọhọde Inemesịt Ubon

Mme Ọdọ Ndọ, Ẹdiana Kiet Ẹma Abasi

Mme Ọdọ Ndọ, Ẹdiana Kiet Ẹma Abasi

Frederick * ọdọhọ ete: “Ke nsonso oro ikanamde ndọ, n̄kenen̄ede nyom ami ye n̄wan mi isitie kiet ikpep Bible. N̄koyom n̄wan mi esinen̄ede akpan̄ utọn̄ ke ini ikpepde n̄kpọ. Edi Leanne an̄wan mi ikekemeke nditie sụn̄-n̄ n̄kpep n̄kpọ. Ndien ke ini mbụpde mbụme, ibọrọ esie ikesibehe ih m̀mê ihih. Enye ikesibọrọke mbụme nte ami n̄kekerede ke akpana enye ọbọrọ.”

Leanne ọdọhọ ete: “N̄kedi isua 18 ke ini n̄kọdọde Frederick. Ima isitie kiet ikpep Bible kpukpru ini, edi ebe mi ekesida ini ukpepn̄kpọ emi nte ini ndida n̄wụt mi kpukpru ndudue mi ye mme ukpụhọde oro akpanade nnam. N̄kpọ emi ama esibiak mi tutu ukpepn̄kpọ odorode mi.”

AFO ekere ke nso ikedi mfịna Frederick ye Leanne? Mmọ ẹma Abasi, ndien mmọ ẹkeyom ndinam eti n̄kpọ. Ke adianade do, mmọ mbiba ẹfiọk ke ọfọn mmimọ itie kiet ikpep Bible. Edi etie nte n̄kpọ emi akpakadiande-dian mmọ akakam asasuan mmọ. Mmọ ẹma ẹsitie kiet ẹkpep n̄kpọ, edi mmọ ikadianake kiet nte ebe ye n̄wan ima Abasi.

Didie ke owo akpama Abasi? Ntak emi ebe ye n̄wan ẹkpedianade kiet ẹma Abasi? Nso mfịna ke mmọ ẹkeme ndinyene, ndien didie ke mmọ ẹkpekọk mfịna emi?

Didie ke Owo Akpama Abasi?

Bible etịn̄ aban̄a nsio nsio uwem emi mme owo ẹdude. (Jude 18, 19) Ke uwụtn̄kpọ, Paul emi eketienede ewet Bible etịn̄ aban̄a ukpụhọde emi odude ke ufọt owo emi amade Abasi ye enye emi mîmaha. Enye ọkọdọhọ ke mbon emi mîmaha Abasi ẹsikere ẹban̄a idemmọ, ikereke iban̄a mbon en̄wen. Mmọ isinịmke ibet Abasi, edi ẹsidu uwem nte mmọ ẹmade.—1 Corinth 2:14; Galatia 5:19, 20.

Mbon emi ẹmade Abasi itiehe ntem, mmọ ẹnen̄ede ẹma ibet Abasi. Mmọ ẹda Jehovah Abasi nte Ufan ẹnyụn̄ ẹma ndikpebe enye. (Ephesus 5:1) Ke ntre, mmọ ẹnyene ima,  ẹfọn ido, ẹnyụn̄ ẹtie emem emem. (Exodus 34:6) Mmọ ẹsinịm ibet Abasi idem ke ini ọsọn̄de ndinam emi. (Psalm 15:1, 4) Darren, emi odụn̄de ke Canada onyụn̄ ọdọde ndọ ke isua 35 idahaemi, ọdọhọ ete: “Ami nda owo emi amade Abasi nte owo emi esikerede aban̄a nte ikọ ye edinam esie editụkde Abasi.” Jane an̄wan esie adian do ete: “Ami nda n̄wan emi amade Abasi nte n̄wan emi esịnde ukeme kpukpru usen ndinyene mme edu emi ẹsiakde ke Galatia 5:22, 23.”

Edi emi iwọrọke ke ana owo ọdọ ndọ mbemiso enye ekeme ndidu uwem nte Abasi oyomde. Ke nditịm ntịn̄, Bible ọdọhọ ke owo kiet kiet ekpenyene ndikpep n̄kpọ mban̄a Abasi nnyụn̄ n̄kpebe enye.—Utom 17:26, 27.

Ntak Emi Ebe ye N̄wan Ẹkpedianade Kiet Ẹma Abasi?

Ntak emi ebe ye n̄wan ẹkpedianade kiet ẹma Abasi? Kere ban̄a uwụtn̄kpọ emi: Ọtọin̄wan̄ iba ẹyom ndibuana ebiet kiet ntọ n̄kpọ. Owo kiet ete ke iyom nditọn̄ọ nditọ n̄kpọ ke ukwọedịm, edi enye eken ọdọhọ ke akam ọfọn ẹtọ ke ndaeyo. Kiet ete ke enyene se iyomde ndiduọk ke isọn̄ man isọn̄ ọfọn n̄kpọ, enye eken ete ke isọn̄ oro inyeneke mfịna ke ufọn idụhe ndiduọk n̄kpọ. Owo kiet anam utom ke in̄wan̄ oro kpukpru usen ke ini enye eken etiede-tie awan̄ ubọk ese enye. N̄kpọ edisụk iyeye ke in̄wan̄ emi, edi idiyehe nte ekpeyede edieke mmọ mbiba ẹkpebierede se mmọ ẹyomde ekem ẹdian ubọk ẹnam se mmọ ẹkebierede emi.

N̄wan ye ebe ẹtie nte mme ọtọin̄wan̄ emi. Edieke owo kiet ke otu mmọ esịnde idem anam n̄kpọ Abasi, emi ayan̄wam ndọ mmọ. (1 Peter 3:1, 2) Edi ndọ mmọ ayakam etetịm ọfọn edieke mmọ mbiba ẹdianade kiet ẹn̄wam kiet eken anam n̄kpọ Abasi. Enyene-ọniọn̄ Edidem Solomon ọkọdọhọ ke “owo iba ẹfọn ẹkan owo kiet.” Ntak-a? “Koro mmọ ẹnyenede eti utịp ke ọkpọsọn̄ utom mmọ. Koro edieke owo mmọ kiet ọduọde, enye eken ekeme ndimenede nsan̄a esie.”—Ecclesiastes 4:9, 10.

Anaedi esidọn̄ fi ndidiana ye ebe m̀mê n̄wan fo nnam n̄kpọ Abasi. Kpa nte edide ye mme ọtọin̄wan̄, ndinyene udọn̄ kpọt idinyeneke ufọn. Se n̄kpọ iba emi ẹkemede ndifịna fi ye se akpanamde mi.

AKPA MFỊNA: Ini idụhe.

Sue emi ọdọde ndọ ndondo emi ọdọhọ ete: “Ebe mi esidi edimen mi ke itieutom ke n̄kanika itiaba mbubreyo. Ndien utom esinana ebet nnyịn ke ufọk. N̄kpọ emi esifịna nnyịn tutu; esịt nnyịn ọyọdọhọ nnyịn ke akpana itie kiet ikpep Bible, edi idem esimem nnyịn tutu ọdọn̄ nnyịn ndiduọk odudu.”

Se akpanamde: Ẹnam ukpụhọde ẹnyụn̄ ẹdian ubọk ẹnam n̄kpọ. Sue ọdọhọ ete: “Ami ye ebe mi ima ibiere ndisibak ndemede ke usenubọk, ntie kiet n̄kot Bible nnyụn̄ nneme se ikotde mbemiso ikade utom. Ebe mi esin̄wam mi anam ndusụk n̄kpọ ke ufọk man nnyene ufan̄ ntie ye enye.” Nso ufọn ke mmọ ẹkedia ke ndinam emi? Ed, ebe Sue, ọdọhọ ete: “Mmokụt nte ke ini ekededi emi ami ye n̄wan mi idianade kiet inam n̄kpọ Abasi, ke isisọn̄ke nnyịn ndikọk mfịna ndien ke nnyịn isinyeneke ediwak mfịna.”

N̄kpọ en̄wen emi akpanamde adian ye edineme nneme ye kiet eken edi ndisitie kiet mbọn̄ akam. Didie ke emi edin̄wam mbufo? Ryan emi ama ọkọdọ ndọ ke isua 16 idahaemi ọdọhọ ete: “Ke ndondo emi, ami ye n̄wan mi ima inyene akamba mfịna ke ndọ nnyịn. Edi ima itọn̄ọ ndisitie kiet mbọn̄ akam kpukpru okoneyo, ntịn̄ mfịna nnyịn nnọ Abasi. N̄kere ke ndinam emi akan̄wam nnyịn ikọk mfịna oro ikenyenede inyụn̄ ifiak ikop inemesịt ke ndọ nnyịn.”

NAM EMI ISE: Kpukpru usen, mbemiso ẹdụkde idap, ẹda esisịt ini ẹneme kpukpru se ikenemde mbufo usen oro, kpa mme  n̄kpọ emi ẹkemede ndikọm Abasi mban̄a. Ẹneme n̄ko mme mfịna emi ẹkenyenede, akpan akpan mme mfịna emi ẹyomde Abasi an̄wam mbufo ẹkọk. Edi kûda ini emi nte ini nditịn̄ kpukpru se n̄wan m̀mê ebe fo mîkanamke ọfọn. Utu ke oro, ke ini ẹtiede kiet ẹbọn̄ akam, ẹbọn̄ ẹban̄a sụk mme n̄kpọ emi anade mbufo mbiba ẹnam n̄kpọ ẹban̄a. Ekem ke eyo esierede, ẹnam n̄kpọ ẹban̄a se ẹkebọn̄de akam ẹben̄e Abasi.

UDIANA MFỊNA: Ukeme nnyịn edi nsio nsio.

Tony ọdọhọ ete: “Mmaha ukot n̄wed.” Ndien Natalie an̄wan esie ọdọhọ ete: “Mmama ukot n̄wed nnyụn̄ mma nditịn̄ se n̄kotde. N̄kere ke ndịk mi esinam Tony ndusụk ini ke ini itiede kiet ikpep Bible.”

Se akpanamde: Ẹkûnam n̄kpọ ke ndomoidem m̀mê nditak ke ndikụt ndudue nnọ kiet eken. Toro n̄wan m̀mê ebe fo ke ekpri se enye anamde. Tony ọdọhọ ete: “Ndusụk ini, nte n̄wan mi esinemede Bible esinam bụt anam mi nte ke enye ọfiọk n̄kpọ akan mi, ndien n̄kesimaha ndineme Bible ye enye ini akpa. Edi Natalie an̄wan mi an̄wam mi etieti. Idahaemi imesitie kiet ineme Bible, mmonyụn̄ n̄kụt ke ufọn o-bụt idụhe. Edikam enenem mi ndineme Bible ye enye. Emi anam inen̄ede idiana kiet inyụn̄ idu ke emem.”

Ediwak mme ọdọ ndọ ẹkụt ke nditie kiet n̄kot nnyụn̄ n̄kpep Bible kpukpru urua anam ndọ mmimọ ọfọn akan nte ekedide. Se ekpefepde: Da se ekpepde nọ idemfo item, kûdọhọ ke kpukpru enyene ebe m̀mê n̄wan fo. (Galatia 6:4) Ẹkûneme mfịna emi ẹkemede ndida utọk ndi ke ini ukpepn̄kpọ; ẹyom ini en̄wen ẹnam emi. Ntak-a?

Kere emi ise: Ndi ekpetie ke itie emi ubon fo ẹdiade udia ọsọbọ inia? Eyedi ukpanamke utọ n̄kpọ oro, koro emi ekeme ndinam udia odorode kpukpru owo. Jesus ọkọdọhọ ke ndikpep nnyụn̄ nnam uduak Abasi etie nte ndidia udia. (Matthew 4:4; John 4:34) Nditịn̄ se ibiakde fi kpukpru ini emi ẹtiede kiet ẹkpep Bible ekeme ndinam ukpepn̄kpọ odorode n̄wan m̀mê ebe fo. Imọdiọn̄ọ ke ana eneme mfịna emi mbufo ẹnyenede, edi nam emi ke ini emi mbufo ẹkenịmde ndisida nnam emi.—Mme N̄ke 10:19; 15:23.

NAM EMI ISE: Wet edu iba m̀mê ita emi amade akan ke idem an̄wan m̀mê ebe fo. Ini en̄wen emi nneme Bible mbufo aban̄ade mme edu emi, tịn̄ nọ n̄wan m̀mê ebe fo nte enen̄erede ama nte enye esiwụtde mme edu emi.

Se Ọtọde ke Edidọk

Edieke ebe ye n̄wan ẹdianade kiet ẹma Abasi, ndọ mmọ eyenem, emem oyonyụn̄ odu n̄ko. Bible ọdọhọ ke “se ededi eke owo ọtọde, oro ke enye edinyụn̄ ọdọk.”—Galatia 6:7.

Frederick ye Leanne, emi iketịn̄de iban̄a ke ntọn̄ọ ntọn̄ọ ibuotikọ emi, ẹkụt ke itien̄wed emi edi akpanikọ. Mmọ ẹdọ ndọ idahaemi ke isua 45 ẹnyụn̄ ẹkụt ufọn edika iso ndiana kiet mma Abasi. Frederick ọdọhọ ete: “Mma nsiduọhọ n̄wan mi nte ke enye anam ikûsuneme nneme. Edi nte ini akade, mma ndikụt ke ana ami n̄ko nsịn ukeme man isineme nneme.” Leanne ọdọhọ ete: “Se ikenen̄erede in̄wam nnyịn ke ofụri ini mfịna emi edi ke nnyịn mbiba imama Jehovah Abasi. Ke ofụri ini emi, nnyịn imesitie kiet ikpep Bible inyụn̄ ibọn̄ akam. Esimem utom ọnọ mi ndima Frederick ke ini n̄kụtde nte enye esịnde ukeme ndinyene mme edu Christian.”

^ ikp. eki. 3 Ẹkpụhọ mme enyịn̄.

BỤP IDEMFO ETE . . .

  • Ebịghi didie iketie kiet ibọn̄ akam?
  • Nso ke n̄kpanam man n̄wan m̀mê ebe mi esitat esịt eneme nneme Ikọ Abasi ye ami?

 

Kpep N̄kpọ En̄wen

Nso Idi Utuakibuot Ubon?

Se nte emi ekemede ndinam fi asan̄a ekpere Abasi ye nte enye ekemede ndinam ubon fo ẹdiana kiet.

Nam Se Abasi Ọdọhọde Man Ndọ Mbufo Enem

Afo ndibụp idemfo mbụme iba ekeme ndinam ndọ mbufo enem.