Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME AUGUST 2011

Bible Okpụhọde Mme Owo

Bible Okpụhọde Mme Owo

NSO ikanam ete kiet emi ọkọdọde ediwak iban, emi ekesinyụn̄ enen̄erede asua Mme Ntiense Jehovah akabade edi kiet ke otu mmọ? Nso n̄ko ikanam pastọ Ufọkabasi Pentecostal ọkpọn̄ ufọkabasi esie? Nso ikanam mma kiet emi ẹkekamade ke ata idiọk usụn̄ etre ndisua idem onyụn̄ asan̄a ekpere Abasi? Nso ikonyụn̄ inam owo emi ekesimade ikwọ ọkpọsọn̄ uyom ye n̄kukwak akabade edi kiet ke otu Mme Ntiense Jehovah? Mbọk, kot mbụk emi ke ọmọn̄ okụt ibọrọ.

“Ndidi eti ebe idahaemi.”—RIGOBERT HOUETO

  • N̄KAMANA KE 1941
  • NTO BENIN
  • MMA NDỌ EDIWAK IBAN, NNYỤN̄ NNEN̄EDE NSUA MME NTIENSE JEHOVAH

NTE N̄KESIDUDE UWEM:

Nto Cotonou, akwa obio kiet ke Benin. Ete ye eka mi ẹketọn̄ọ ke ekpri ẹkpep mi ndidi owo Catholic, edi n̄kesikaha ufọkabasi kpukpru ini. Ediwak mbon Catholic emi ẹkedụn̄ọde ẹkpere nnyịn ẹma ẹdọ ediwak iban, koro ukara ẹma ẹnyịme ẹnam ntem ini oro. Ami ke idemmi n̄kọdọ iban inan̄.

Ke ini mme owo ẹketọn̄ọde ntịme ke obio man ẹkpụhọ ukara ke iduọk isua 1970, mma n̄kere ke emi ọyọfọn etieti ye idụt nnyịn. Ntre mma nnen̄ede mbere ye mbon oro ẹkeyomde ẹkpụhọ ukara mi nnyụn̄ nnen̄ede nsịn idem ke mbre ukara. Mbon ntịme emi ikamaha Mme Ntiense Jehovah koro mmọ mîkesitieneke isịn idem ke mbre ukara. Ami n̄kesịne ke otu mbon oro ẹkekọbọde Mme Ntiense Jehovah. Ke ini ẹkebịnde mme isụn̄utom Mme Ntiense Jehovah ẹsion̄o ke idụt nnyịn ke 1976, n̄kekere ke mmọ idifiakke idi aba tutu amama.

NTE BIBLE OKOKPỤHỌREDE UWEM MI:

En̄wan ukpụhọ ukara emi ama etre ke 1990. Ndien idem ama akpa mi etieti ke ini mme isụn̄utom Mme Ntiense Jehovah ẹkefiakde ẹdi idụt nnyịn. Mma ntọn̄ọ ndikere ke anaedi Abasi odu ye Mme Ntiense Jehovah. Kpa ini emi n̄ko ke n̄kọkpọn̄ utom emi n̄kesinamde n̄kanam utom ke ebiet enwen. Owo kiet ke obufa itieutom emi ekedi kiet ke otu Mme Ntiense Jehovah, ndien enye ikabiatke ini ndikwọrọ ikọ nnọ mi. Enye ama owụt mi mme itie N̄wed Abasi emi ọdọhọde ke Jehovah edi Abasi ima ye unenikpe. (Deuteronomy 32:4; 1 John 4:8) Mma mma mme edu Abasi nnyụn̄ nyom ndikpep mme n̄kpọ en̄wen mban̄a Jehovah; ntre mma nnyịme ẹkpep mi Bible.

Ikebịghike, mma ntọn̄ọ ndidụk mbono esop Mme Ntiense Jehovah. Mi ke n̄kokụt ke Mme Ntiense Jehovah enyene ata ima, mmọ inyụn̄ inamke asari ndien emi ama otụk mi etieti. Nte n̄kadiande idem ye mmọ, ntre ke n̄kokụt ke mmọ ẹdi ata mbet Jesus.—John 13:35.

Mma mbiere ke ana n̄kpọn̄ Ufọkabasi Catholic edieke nyomde ndinam n̄kpọ Jehovah. Edi  emi ikememke utom, sia mma n̄kere se mme owo ẹditịn̄de. Edi nte ini akakade, Jehovah ama ọnọ mi uko ndiwọrọ n̄kpọn̄ Ufọkabasi Catholic.

Edi ama oyom nnam akamba ukpụhọde efen. Se n̄kekpepde ke Bible ama anam mfiọk ke Abasi imaha udọ uwak iban. (Genesis 2:18-24; Matthew 19:4-6) Enye akada akpa an̄wan mi nte ata n̄wan mi. Ntre mma n̄kesịn ndọ nnyịn ke n̄wed ukara, nnọ iban eken se mmọ ẹdidade ẹdu uwem, nnyụn̄ nsio mmọ unyọn̄. Nte ini akakade, iba ke otu iban emi ẹma ẹkabade ẹdi Mme Ntiense Jehovah.

UFỌN ORO MBỌDE:

Okposụkedi emi n̄wan mi osụk edide owo Catholic, enye ifịnake mi ndinam n̄kpọ Jehovah. Enye okụt kpa nte ami nnyụn̄ n̄kụtde ke ndidi eti ebe idahaemi.

N̄kesikere ke ndisịn idem ke mbre ukara ayanam nnam ufọn nnọ obio mi, edi ofụri se n̄kanamde ọkọwọrọ ikpîkpu. Mmedikụt idahaemi ke Obio Ubọn̄ Abasi kpọt edikọk kpukpru mfịna ubonowo. (Matthew 6:9, 10) Mmokop inemesịt nte Jehovah anamde mfiọk nte n̄kpenen̄erede n̄kop inemesịt.

Ikememke utom ndinam ukpụhọde.’—ALEX LEMOS SILVA

  • N̄KAMANA KE 1977
  • NTO BRAZIL
  • N̄KESIDI PASTỌ UFỌKABASI PENTECOSTAL

NTE N̄KESIDUDE UWEM:

N̄kokpon ke Itu, ke São Paulo. Ubiatibet ama okpon etieti ke obio emi.

N̄ketie afai afai nnyụn̄ ndu oburobụt uwem. N̄kpọ efen edi ke mma nsinyam n̄kpọsọn̄ ibọk. Nte ini akakade, mma ndikụt ke edieke mmension̄oke idem n̄kpọn̄ utọ uwem emi, ke enye ayada mi ibuot mîdịghe esịn mi ke n̄kpọkọbi; ntre mma nsion̄o idem n̄kpọn̄ mme n̄kpọ emi. Ekem mma ntọn̄ọ Ufọkabasi Pentecostal, nnyụn̄ ndi pastọ nte ini akakade.

N̄kekere ke nyekeme ndinen̄ede n̄n̄wam mme owo edieke nsịnde idem nnam utom pastọ. Mma nsikwọrọ ikọ ke ekebe ukopikọ, ndien ẹma ẹdiọn̄ọ mi etieti. Kpa ye kpukpru emi, mma ndikụt ke mbon ufọkabasi ẹtak ke ndiyom ufọn idemmọ, iyomke-yom ufọn mbio en̄wen man ẹketịn̄ ẹban̄a ndikpono Abasi. Mma n̄kụt n̄ko ke n̄kukụre se ibehede ufọkabasi edi okụk. Ntre mma n̄kpọn̄ ufọkabasi emi.

NTE BIBLE OKOKPỤHỌREDE UWEM MI:

Ke ndondo oro ntọn̄ọde ndikpep Bible ye Mme Ntiense Jehovah, mma nsọsọp n̄kụt ke mmọ itiehe nte mme ido ukpono eken. N̄kpọ iba ke n̄kokụt. Akpa n̄kpọ edi ke Mme Ntiense Jehovah itịn̄ke-tịn̄ kpọt inọ mme owo ẹte ẹma Abasi; edi ẹmama Abasi n̄ko ke idemmọ. Ọyọhọ iba, mmọ isịnke idem ke mbre ukara inyụn̄ in̄wanake ekọn̄. (Isaiah 2:4) N̄kpọ iba emi ẹkenam nnen̄ede nnịm ke mmokụt ido ukpono akpanikọ ndien—kpa mfafaha inuaotop emi adade esịm nsinsi uwem.—Matthew 7:13, 14.

Mma ndikụt ke ana nnam akamba ukpụhọde man nnem Abasi esịt. Ama oyom ntịm nse ubon mi enyịn. Ama onyụn̄ oyom nnen̄ede nsụhọde idem. Okposụkedi ndinam kpukpru ukpụhọde emi mîkememke utom, Jehovah ama an̄wam   mi ndinam oro. Ama enen̄ede akpa n̄wan mi idem ndikụt nnamde kpukpru ukpụhọde emi. Enye ekebem mi iso ekpep Bible, ndien mme ukpụhọde emi n̄kanamde mi ama anam enye enen̄ede esịn idem ke ukpepn̄kpọ esie. Ikebịghike, ima ibiere ndidi Mme Ntiense Jehovah. Nnyịn mbiba ikana baptism usen kiet.

UFỌN ORO MBỌDE:

Ami ye n̄wan mi imenen̄ede ikop inemesịt ndin̄wam nditọ nnyịn mbita ẹsan̄a ẹkpere Jehovah. Ubon nnyịn enem etieti. Mmọkọm Jehovah nte enye anamde mi n̄kụt akpanikọ Bible. Akpanikọ enen̄ede okpụhọde mme owo. Mmokụt emi ke idemmi.

“Mmodu uwem ndien.”—VICTORIA TONG

  • N̄KAMANA KE 1957
  • NTO AUSTRALIA
  • ẸKEKAMA MI KE IDIỌK USỤN̄

NTE N̄KESIDUDE UWEM:

N̄kokpon ke Newcastle, ke New South Wales. Ami n̄kpon n̄kan ke otu nditọ itiaba, ndien ete mi ekedi owo mmịn ye owo afai, eka mi onyụn̄ edi owo afai n̄ko. Eka mi ama esitọk mi onyụn̄ ofiomo mi. Enye ekesitak ndidọhọ ke ndi idiọk eyen ndien ke ndika ikan̄ hell. Mme ikọ ntem ama esinyek mi idem etieti.

Eka mi ama esifiomo mi ọnọ unan tutu n̄kemeke ndika n̄wed ndusụk ini. Ukara ikayakke aba ete ye eka mi ẹkama mi ke ini n̄kedide isua 11. Mmọ ẹma ẹmen mi ẹkama, ekem ẹmen mi ẹkenịm ke ufọkidụn̄ n̄ka nun. Mma n̄wọrọ do mfehe ke ini n̄kedide isua 14. N̄koyomke ndifiak nnyọn̄ ufọk, ntre mma ntọn̄ọ ndiyo nsan̄a ke mme efak Kings Cross, ke esịt obio Sydney.

Ọkpọsọn̄ ediyo ke efak ama anam ntọn̄ọ ndida n̄kpọsọn̄ ibọk, n̄n̄wọn̄ mmịn, nse ndise idan̄, nnyụn̄ nsan̄a akpara. N̄kpọ ama etịbe usen kiet emi ekenen̄erede anam mi ndịk. N̄kodụn̄ ke ufọk ete kiet emi enyenede ufọk akpara. Irenowo iba ẹma ẹdi ndise enye mbubreyo usen kiet. Ndien ete emi ama ọdọhọ ndụk esịt ubet, edi mma nda n̄kop kpukpru se mmọ ẹkenemede. Enye okoyom ndimen mi nnyam nnọ mmọ. Mmọ ẹkeyom ndidịp mi ke nsụn̄ikan̄ mbiomo emi akade Japan man n̄kanam utom ke itie un̄wọn̄ mmịn. Idem ama enyek mi tutu mfrọ nda ke etehe ufọk emi n̄kodude mfrọ nduọ ke isọn̄ nnyụn̄ mfehe.

Mma ntịn̄ mfịna mi nnọ ete kiet emi ekedide esen ke Sydney, n̄kere ke enye ọmọn̄ oyom okụk ọnọ mi. Enye ikọnọhọ mi okụk, edi ama ada mi aka ebiet emi enye okodude man n̄keyere mmọn̄ nnyụn̄ ndia udia. N̄kọkpọn̄ke enye aba, ndien ke isua kiet ama ekebe nnyịn ima idọ ndọ.

NTE BIBLE OKOKPỤHỌREDE UWEM MI:

Enyene nte eketiede mi ke idem ke ini n̄kọtọn̄ọde ndikpep Bible ye Mme Ntiense Jehovah. Esịt ama ayat mi ke ini n̄kọdiọn̄ọde ke Satan edi ntak idiọkn̄kpọ koro n̄kesikop ke Abasi edi ntak ukụt nnyịn. Esịt ama onyụn̄ ana mi sụn̄-n̄ ke ini n̄kekpepde nte ke Abasi itụhọkede mme owo ke ikan̄ hell, kpa ukpepn̄kpọ emi ekesinyekde mi idem etieti.

 Ama eye mi ndikụt Mme Ntiense Jehovah ẹyakde Bible ada mmọ usụn̄ ke kpukpru se mmọ ẹnamde. Mmọ ẹtetịn̄ ẹnyụn̄ ẹwowụt ke imọbuọt idem ye Abasi. Mma nsọn̄ itie etieti, edi Mme Ntiense Jehovah ẹma ẹma mi ẹnyụn̄ ẹkpono mi inamke n̄kpọ m̀mê nso ke ntịn̄ nnyụn̄ nnam.

Ndisikere ke n̄wọrọke n̄kpọ ndomokiet enen̄erede edi mfịna mi. N̄kosụk nsasua idemmi, idem ke mma n̄kana baptism nnyụn̄ n̄kabade ndi kiet ke otu Mme Ntiense Jehovah. Mma mfiọk ke mmama Jehovah, edi n̄kekere ke enye ikemeke-keme ndima utọ owo nte ami.

N̄ketre ndinyene utọ ekikere emi ke isua 15 ama ekebe tọn̄ọ n̄kana baptism. Emi ekedi ke ini ẹkenọde utịn̄ikọ ke Ufọkmbono Obio Ubọn̄ Mme Ntiense Jehovah, ke ini etịn̄ikọ okokotde James 1:23, 24. Itien̄wed emi ọdọhọ ke Ikọ Abasi etie nte ukụtiso emi nnyịn ikemede ndimen nse idem nnyịn nnyụn̄ n̄kụt nte Jehovah esede nnyịn. Mma ntọn̄ọ ndikere ke anaedi nte ami nsede idemmi okpụhọde ye nte Jehovah esede mi. Edi mma nsụk n̄kere ke Jehovah ikemeke-keme ndima utọ owo nte ami.

Ke usen ifan̄ ẹma ẹkebe, mma n̄kot itien̄wed emi okokpụhọrede uwem mi. N̄kokot Isaiah 1:18, emi Jehovah ọdọhọde ete: “Mbufo ẹdi nnyịn inen̄ede mme n̄kpọ ke ufọt nnyịn. Mme idiọkn̄kpọ mbufo ẹkpetie nte iduot, ẹyenam mmọ ẹfia nte snow.” Eketie nte n̄kpọ eke Jehovah ọdọhọde mi ete: “Victoria—di inen̄ede n̄kpọ ke ufọt nnyịn. Mmọdiọn̄ọ fi, ndiọn̄ọ mme idiọkn̄kpọ fo. Mmokụt esịt fo, mmama fi.”

N̄kekemeke ndide idap okoneyo usen oro. Okosụk etie mi nte ke Jehovah ikemeke-keme ndima utọ owo nte ami. Edi mma ntọn̄ọ ndikere mban̄a nte Jesus akakpade afak nnyịn. Inikiet inikiet, mma n̄kụt ke Jehovah enyene ime ye ami ke ata anyanini, onyụn̄ owụt ke imama mi ke ata ediwak usụn̄. Edi ke edinam mi etie nte n̄kpọ eke ndọhọde enye nte: “Ima fo ikponke ikem ndisịm utọ owo nte ami. N̄kpa eyen fo inyụn̄ ikemeke ndifụk idiọkn̄kpọ mi.” Eketie nte n̄kpọ eke nsịnde ufak emi Jehovah ọnọde. Edi idahaemi, ke ini ntiede n̄kere enọ ufak emi, mmesikụt ke Jehovah ama mi.

UFỌN ORO MBỌDE:

Mmodu uwem ndien. Ndọ nnyịn afiak ọfọn idahaemi. Mmonyụn̄ n̄kop inemesịt nte ke mbon en̄wen ẹkeme ndikpep n̄kpọ nto mbụk uwem mi. Mmọtọn̄ọ ndien ndinen̄ede n̄kpere Jehovah.

“Ibọrọ akam oro n̄kọbọn̄de edi oro.”—SERGEY BOTANKIN

  • N̄KAMANA KE 1974
  • NTO RUSSIA
  • MMA NSIMA IKWỌ ỌKPỌSỌN̄ UYOM YE N̄KUKWAK

NTE N̄KESIDUDE UWEM:

N̄kamana ke Votkinsk, kpa ebiet emi ọwọrọetop ọkwọ ikwọ oro, Pyotr Ilich Tchaikovsky, okotode. Ikedi ubuene. Ete mi ama ọfọn uwem etieti, edi mmịn ekedi mfịna esie, ntre ufọk nnyịn ekesidi mfịna mfịna kpukpru ini.

N̄kọdiọn̄ọke n̄wed, ndien nte ini akakade, mma ntọn̄ọ ndida nte ke ami nsịme n̄kan, ke n̄kemeke-keme nditie nte nditọ ufọkn̄wed nnyịn eken. Mma ntọn̄ọ nditie ikpọn̄  ikpọn̄, n̄konyụn̄ mmaha mme owo. Ndika n̄wed eketie mi ufen ufen. Ekesidi mma nsịm otu owo n̄kemeke aba nditịn̄ idem ata n̄kpri n̄kpọ emi nsitịn̄de ke mme ini en̄wen. Ke mma n̄kokụre elementri, ẹkewet ke n̄wed ibọrọ udomo ẹte: “Ikemeke nditịn̄ ikọ.” Ikọ emi ama abiak mi onyụn̄ anam ntetịm nda nte ke n̄wọrọke n̄kpọ. Mma n̄kere m̀mê ufọn uwem mi-e.

Mma ntọn̄ọ ndin̄wọn̄ ọkpọsọn̄ mmịn̄ ke mma n̄kọtọn̄ọ ndikpon. Ke nsonso oro, mma nsikop idem inem ke ini n̄n̄wọn̄de mmịn. Edi esịt ama esimia mi ufen ke ini n̄n̄wọn̄de mbe ubọk. Ekeditie nte ufọn uwem mi idụhe. Mma ntọn̄ọ ndinen̄ede mfụhọ, nsinyụn̄ nsịne ikpọn̄ ke ufọk ke ata ediwak usen. Ndien mma n̄kere m̀mê akpakam ọfọn n̄wot idem.

N̄kpọ ama afiak ọfọn ke esisịt ini ke ini n̄kesịmde isua 20. Mma ntọn̄ọ ndima ikwọ ọkpọsọn̄ uyom ye n̄kukwak. Ikwọ emi ama esinam n̄kop odudu, ndien mma ntọn̄ọ ndidian idem ye mbon en̄wen emi ẹmade ikwọ emi. Mma nyak idet mi enen̄ede ọniọn̄, ntịbi utọn̄, nnyụn̄ nsisịne n̄kpọ nte mme ọkwọ ikwọ emi mmade. Sụn̄sụn̄, mma ntọn̄ọ nditie afai afai, iyatesịt iyatesịt, nsinyụn̄ ntọhọ utọk etieti ke ufọk.

N̄kekere ke ndikpan̄ utọn̄ nnọ ikwọ emi ayanam n̄kop inemesịt, edi akakam ananam mfụhọ. Mma mforo n̄kpọ en̄wen! Esịt ama esidiọk mi etieti ke ini n̄kopde ndiọi ido mme ọkwọ ikwọ emi n̄kamade.

Mma mfiak nyom ndiwot idem, nnyụn̄ nnen̄ede mbiere ndinam oro isan̄ emi. N̄kukụre se ikakpande mi ndiwot idem ekedi eka mi. Enye ama enen̄ede ama mi, onyụn̄ anam ata ediwak n̄kpọ ọnọ mi. N̄kpọ ama ọdiọk etieti. N̄koyomke ndidu uwem aba, edi n̄konyụn̄ nyomke ndiwot idem.

Mma ntọn̄ọ ndikot mme n̄wed mbụk Russia man mmen ekikere mi mfep do. Mma n̄kot mbụk kiet emi aban̄ade owo uko emi akanamde utom ke ufọkabasi. Inikiet inikiet, ama ọtọn̄ọ ndidọn̄ mi ndinam n̄kpọ nnọ Abasi ye mbon en̄wen. Mma mbọn̄ akam ke ofụri esịt nnọ Abasi, kpa n̄kpọ emi akanam mmenamke. N̄keben̄e Abasi nte an̄wam mi ndu uwem emi enyenede ufọn. Mma n̄kop ata emem ke esịt idem ke mma n̄kọbọn̄ akam oro mma. Ndien se iketịbede ke oro ebede ama enen̄ede akpa mi idem. Ke hour iba ẹma ẹkebe, owo kiet ke otu Mme Ntiense Jehovah ama edi ufọk mi edibụp m̀mê nyama ndikpep Bible. Mmenen̄ede ndiọn̄ọ ke ibọrọ akam oro n̄kọbọn̄de edi oro. Usen oro ndien ke n̄kọtọn̄ọ ndikop inem uwem.

NTE BIBLE OKOKPỤHỌREDE UWEM MI:

Mma nduọn̄ọ kpukpru n̄kpọ ikwọ mi, kpa ye oro mîkememke utom ndinam emi. Edi ikwọ emi ama esịne mi ke ibuot ebịghi. Mma nsiti nte n̄kesidude uwem ini ekededi n̄kopde ẹkwọde ikwọ emi. N̄koyomke ndiọi ekikere emi ẹtịmerede nti n̄kpọ emi n̄kekpepde, ntre mma nsifep mme utọ ebiet emi. Mma nsinen̄ede mbọn̄ akam ini ekededi emi ndiọi ekikere emi ẹdụkde mi esịt. Ndinam ntem ama esinam nnyene “emem Abasi emi akande kpukpru ekikere.”—Philippi 4:7.

Nte n̄kekpepde Bible, mma ndikụt ke ana mme Christian ẹtịn̄ se mmọ ẹnịmde ke akpanikọ ẹnọ mbon en̄wen. (Matthew 28:19, 20) N̄kekere ke ndikemeke ndinam emi tutu amama. Edi se n̄kekpepde ama anam n̄kop inemesịt nnyụn̄ nnen̄ede nnyene emem. Mma mfiọk ke ana mbon en̄wen ẹnyụn̄ ẹtiene ẹkpep akpanikọ n̄ko. Ntre, kpa ye emi ndịk ekesinamde mi, mma ntọn̄ọ nditịn̄ se n̄kekpepde nnọ mbon en̄wen. Idem ama akpa mi ke ini n̄kokụtde ke ndineme n̄kpọ ye mbon en̄wen akakam ananam nnyene uko, nnyụn̄ ntetịm nnịm se n̄kekpepde ke akpanikọ.

UFỌN ORO MBỌDE:

Mmenyene ata inem inem ubon idahaemi. Mman̄wam ediwak owo, esịnede eyeneka mi an̄wan ye eka mi, ẹkpep Bible. Ndinam n̄kpọ Abasi nnyụn̄ n̄n̄wam mbon en̄wen ẹkpep n̄kpọ ẹban̄a Abasi anam uwem mi enen̄ede enyene ufọn.