Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  August 2011

 Mme Andikot N̄wed Nnyịn Ẹbụp Ẹte . . .

Ndi Abasi Odụn̄ ke Ebiet Kiet?

Ndi Abasi Odụn̄ ke Ebiet Kiet?

Nsio nsio ido ukpono ẹdọhọ ke Abasi odu ke kpukpru ebiet. Ke uwụtn̄kpọ, Catechism Ufok Abasi Catholic ọdọhọ ke “Abasi odu ke kpukpru ebiet.” Ke ini John Wesley emi akasiakde Ufọkabasi Methodist ọkọkwọrọde ibuotikọ emi, “Abasi Emi Odude ke Kpukpru Ebiet,” enye ama ọdọhọ ke “idụhe ebiet emi Abasi mîdụhe, ke enyọn̄, ke isọn̄, ye kpukpru ebiet emi owo mîkemeke ndikụt.”

Nso ke Bible ekpep? Ndi Bible ọdọhọ ke Abasi odu ke kpukpru ebiet—ke heaven, ke isọn̄, ye ke esịtidem owo?

Bible ọdọhọ ke Abasi enyene akpan ebiet emi enye odụn̄de—oro edi, heaven. Edidem Solomon ọkọdọhọ Abasi ke akam emi enye ọkọbọn̄de ete: “Afo nyụn̄ tie ke heaven, kpa akpan ebietidụn̄ fo, kop.” (1 Ndidem 8:43) Ke ini Jesus Christ ekekpepde mme mbet esie ndibọn̄ akam, enye ọkọdọhọ mmọ ẹsibọn̄ akam ẹnọ “Ete nnyịn emi odude ke heaven.” (Matthew 6:9) Bible ọdọhọ ete ke Christ ama ekeset ke n̄kpa, ke enye “okodụk heaven, man enye ke emi akpada ke iso Abasi.”—Mme Hebrew 9:24.

Mme itie Bible emi ẹwụt in̄wan̄-in̄wan̄ nte ke Jehovah Abasi idụhe ke kpukpru ebiet, edi ke odu ke heaven kpọt. Heaven oro ẹtịn̄de ẹban̄a ke itie Bible emi idịghe ikpaenyọn̄ emi isụk idade ikụt mi, inyụn̄ idịghe edem ikpaenyọn̄. Heaven ikam ikemke Andibot ekondo. (1 Ndidem 8:27) Bible ọdọhọ ke “Abasi edi Spirit.” (John 4:24) Ntre, enye odụn̄ ke heaven eke spirit emi mîdụhe ke ekondo nnyịn emi.—1 Corinth 15:44.

Edi nso kaban̄a mme itie Bible emi ẹtiede nte ẹdọhọ ke Abasi odu ke kpukpru ebiet? Ke uwụtn̄kpọ, David ọkọdọhọ Abasi ke Psalm 139:7-10 ete: “Ami n̄keme ndika m̀mọ̀n̄ mbọhọ spirit fo, nnyụn̄ n̄keme ndifehe n̄ka m̀mọ̀n̄ mbọhọ iso fo? N̄kpọdọk ke enyọn̄, afo oyodu do; n̄kponyụn̄ mbri mbri mi ke Udi, sese! afo oyodu do. N̄kpemen mba usiere, man n̄kodụn̄ ata nsannsan ke inyan̄, do, n̄ko, ubọk fo ayada mi usụn̄.” Ndi itie Bible emi owụt ke Abasi odu ke kpukpru ebiet, ke mme ebiet oro ẹsiakde ke itien̄wed emi?

Kûfre ke David ekebem iso obụp Abasi ete: “N̄keme ndika m̀mọ̀n̄ mbọhọ spirit fo?” * Abasi esida edisana spirit etie ke ebiet kiet okụt se ededi oro enye oyomde ndikụt, onyụn̄ anam se ededi oro enye oyomde ndinam, idahake ika do ke idemesie. Ke uwụtn̄kpọ: Ntaifiọk ẹma ẹtie mi ke isọn̄ ke ndondo emi ẹdụn̄ọde nte ekondo emi ẹkotde Mars, emi odude ata ediwak miliọn kilomita ọkpọn̄ isọn̄, etiede. Mmọ ẹkesan̄a didie ẹnam emi? Mmọ ikakaha do ke idemmọ, edi ẹketie mi ke isọn̄ ẹdụn̄ọde ndise ye mme ntọt eken oro masịn emi ẹkenọde aka Mars ọkọnọde ẹsọk mmọ.

Kpasụk ntre, Jehovah Abasi inyeneke ndidu ke kpukpru ebiet mbemiso enye ekemede ndikụt nnyụn̄ mfiọk se ikade iso ke ebiet ekededi ke ekondo. Bible ọdọhọ ete: “Idụhe baba n̄kpọ kiet oro Abasi obotde eke edịbede enye ke enyịn.” (Mme Hebrew 4:13) Ih, edisana spirit, Jehovah Abasi, emi enen̄erede okop odudu, ekeme ndisịm kpukpru ebiet. Kpa spirit emi anam Jehovah ekeme ndikụt kpukpru ebiet nnyụn̄ ntie ke ebiet kiet, oro edi, “edisana ebietidụn̄” esie ke heaven, nnam se enye aduakde.—Deuteronomy 26:15.

^ ikp. eki. 8 Ikọ Hebrew oro ẹkabarede spirit mi ọwọrọ anamutom odudu Abasi, kpa odudu oro Abasi esidade anam se enye aduakde.