Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME JULY 2011

 San̄a Kpere Abasi

Ndi N̄kpọ Esitụk Jehovah?

Ndi N̄kpọ Esitụk Jehovah?

EDIEKE ọbọrọde ih, mbọk bọrọ ise mbụme enye emi n̄ko: Ndi se nnyịn isinamde esitụk enye nde? Oro edi, ndi nnyịn imekeme ndinam n̄kpọ emi enemde m̀mê ayatde Abasi esịt? Mbon akwaifiọk eset ẹkedọhọ ke owo ikemeke ndiyat m̀mê ndinem Abasi esịt. Mmọ ẹkedọhọ ke n̄kpọ isitụkke Abasi. Edi idịghe se Bible ekpepde edi oro. Enye akam ọdọhọ ke n̄kpọ esinen̄ede otụk Jehovah ye nte ke enye enen̄ede ekere aban̄a se nnyịn inamde. Yak ise ise se idude ke Psalm 78:40, 41.

Psalm 78 etịn̄ ibio ibio se iketịbede ye nditọ Israel, ye nte Abasi akanamde n̄kpọ ye mmọ. Ke Jehovah ama okosio mmọ ke ufụn Egypt, enye ama odụk ata akpan ediomi ye mmọ, onyụn̄ ọn̄wọn̄ọ ke edieke mmọ ẹkade iso ẹkop item imọ, ke imọ iyanam mmọ ẹdi “akpan inyene” imọ inyụn̄ ida mmọ inam ata akpan uduak. Nditọ Israel ẹma ẹnyịme ẹnyụn̄ ẹdụk ediomi emi ye Abasi. Edi ndi mmọ ẹma ẹnam se mmọ ẹken̄wọn̄ọde?—Exodus 19:3-8.

Idụhe se ikemede ndinọ Jehovah emi ọsọn̄de urua nte ndidu uwem emi anamde esịt adat enye

Andiwet Psalm ibuot 78 ọdọhọ ete: “Adan̄a didie ke mmọ ẹkesọn̄ ibuot ye enye ke wilderness!” (Ufan̄ikọ 40) Ekem enye ama adian do ete: “Mmọ [ẹma] ẹdomo Abasi ediwak ini.” (Ufan̄ikọ 41) N̄kọ omokụt ke andiwet psalm emi ọdọhọ ke ido emi ekememehe mmọ. Nsọn̄ibuot emi ọkọtọn̄ọ ke wilderness, esisịt ini ke Abasi ama akanyan̄a mmọ osio ke Egypt. Nditọ Israel ẹma ẹtọn̄ọ ndisụk Abasi uyo, ẹkere ke enye idikemeke ndise mban̄a mmimọ. (Numbers 14:1-4) N̄wed kiet emi mme akabade Bible ẹsidade ẹnam utom ọdọhọ ke usụn̄ en̄wen oro ẹkemede ndisịn se idude ke Psalm 78:40 edi: “Mmọ ẹma ẹtụn itụn ye Abasi” mîdịghe “mmọ ẹma ẹfan̄a n̄kpọ ye Abasi.” Edi mbọm ama esinam Jehovah efen ọnọ mmọ inikiet ekededi emi mmọ ẹkabarede esịt. Ntem ke mmọ ẹkesụk ẹsọn̄ ibuot ndien Abasi aka iso efen ọnọ mmọ.—Psalm 78:10-19, 38.

Didie ke ekesitie Jehovah ke idem ini ekededi emi nditọ Israel emi ẹketiede nte mmọn̄ ubom mi, ẹsọn̄de ibuot? Ufan̄ikọ 40 ọdọhọ ke mmọ ẹma “ẹnam enye ayat esịt.” Bible en̄wen esịn ufan̄ikọ emi ntem: “Ẹnam enye ofụhọ.” N̄wed ndụn̄ọde kiet ọdọhọ ete: “Ikọ itien̄wed emi ọwọrọ ke nte nditọ Israel ẹkedude uwem ama edi se ikpayatde owo, ukem nte ido eyen nsọn̄ibuot ekemede ndiyat ete ye eka esie.” Nsọn̄ibuot nditọ Israel ama anam “Edisana Abasi Israel okop ubiak” ukem nte ọsọn̄ibuot eyen esinamde mme andinyene enye ẹkop ubiak.—Ufan̄ikọ 41.

Nso ke ikeme ndikpep nto psalm emi? Enen̄ede eye ndikụt nte Jehovah esikperede mme andituak ibuot nnọ enye, ndien ke isidịghe mmọ ẹma ẹdedue, enye ọkpọn̄ mmọ. Imonyụn̄ ikụt n̄ko nte ke n̄kpọ esitụk Jehovah, ye nte ke se nnyịn isinamde esitụk enye nde. Didie ke emi otụk fi? Ndi emi anam ọdọn̄ fi ndinam se inende?

Akpana ibiere ndinam se inende nnyụn̄ nnam esịt adat Jehovah utu ke ndinam idiọkn̄kpọ nnam esịt ayat enye. Se enye onyụn̄ oyomde mme andituak ibuot nnọ enye ẹnam edi oro. Enye ọdọhọ ete: “Eyen mi, nyene ọniọn̄, nyụn̄ dat mi esịt.” (Mme N̄ke 27:11) Idụhe se ikemede ndinọ Jehovah emi ọsọn̄de urua nte ndidu uwem emi anamde esịt adat enye.

Itie Bible emi okpokotde ke July: