Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2011-06-01

Ndi Akanam Etie Fi nte Udụkke Otu?

Ndi Akanam Etie Fi nte Udụkke Otu?

 Kpep Nditọ Fo

Ndi Akanam Etie Fi nte Udụkke Otu?

MME owo isidaha owo emi mmọ ẹkerede ke idụkke otu ke n̄kpọ ndomokiet. Ekeme ndidi nte owo etiede, ebiet emi enye otode, ye nte enye esitịn̄de ikọ onyụn̄ anamde n̄kpọ esida mfịna emi edi. Ndi akanam etie fi nte udụkke otu? *

Iyom ndineme mban̄a ete kiet emi eketiede enye nte ke imọ idụkke otu. Enye ekekere Mephibosheth. Ẹyak ineme iban̄a owo emi enye ekedide ye ntak emi ekesitiede enye ntem ke idem. Afo eyekpep ediwak n̄kpọ oto Mephibosheth edieke edide esitie fi ntem ke idem.

Jonathan, ata edima ufan David, okobon Mephibosheth. Mbemiso Jonathan akade akakpa ke ekọn̄, enye ama ọdọhọ David ete ‘ọfọn ido ye nditọ imọ.’ Ke isua ifan̄ ẹma ẹkebe ke David ama akakabade edidem, enye ama eti ikọ Jonathan emi. Ndien Mephibosheth do okodu. Enye ama enyene ata idiọk unọmọ ke ini enye ekedide eyenọwọn̄, onyụn̄ akabade mbụn̄ọ. Ndi omokụt do se ikanamde enye ekere ke imọ idụkke otu?

David ama ebiere ndifọn ido ye eyen Jonathan emi. Ntre enye ama anam Mephibosheth edidụn̄ ekpere ufọk esie ke Jerusalem, onyụn̄ ọnọ enye itie ndisitie ndia udia ye enye ke okpokoro esie. David ama ọdọhọ Ziba ye nditọ esie iren, ye ifịn esie, ete ẹsan̄a utom ẹnọ Mephibosheth. Ata ukpono ke David okokpono eyen Jonathan emi! Ndi ọmọfiọk se iketịbede ke oro ebede?

 David ama edinyene ediwak mfịna. Absalom eyen David ama odomo ndibọ David itieubọn̄. David ama efehe mbak Absalom ediwot imọ. Mephibosheth ama oyom nditiene David ye mmọ eken mfehe. Mme ufan David emi ẹketienede enye mi ẹma ẹdiọn̄ọ ke David odot ndikara. Mephibosheth ikekemeke nditiene mmọ sia enye ekedide mbụn̄ọ.

Edi Ziba ama ọkọdọhọ David ke Mephibosheth ekesịn nditiene enye sia oyomde ndisụhọde ntie nda ukara. David ama enịm se Ziba eketịn̄de emi, ntre enye ama ọkpọn̄ kpukpru inyene Mephibosheth ọnọ Ziba. Ikebịghike, David ama akan Absalom ke ekọn̄ onyụn̄ afiak ọnyọn̄ Jerusalem. Idahaemi ke David ekedi edikop ikọ Mephibosheth n̄ko. David ọkọdọhọ Mephibosheth ye Ziba ẹbahade inyene oro. Afo ekere ke nso ke Mephibosheth akanam?

Mephibosheth ikayatke esịt idọhọ ke se David ekebierede emi ifọnke. Enye ama ọfiọk ke edieke edidem mîdụhe ke emem, ke enye idikemeke ndikara ọfọn. Ntre, enye ama ọdọhọ Ziba ada kpukpru inyene oro. Se ikenen̄erede ibehe Mephibosheth ekedi nte ke David asan̄autom Jehovah afiak ọnyọn̄ edi Jerusalem ke emem.

Mephibosheth ama ọbọ ufen etieti. Ekesitie enye nte imọ idụkke-dụk otu. Edi Jehovah ama ama enye etieti onyụn̄ ese aban̄a enye. Nso ke nnyịn ikeme ndikpep nto emi?— Se ikpepde edi nte ke ndusụk owo ẹkeme ndisu nsu ndori nnyịn ke idem ini emi inamde se inende. Jesus ọkọdọhọ ete: “Edieke ererimbot asuade mbufo, mbufo ẹmefiọk ẹte enye ama asua mi mbemiso edisua mbufo.” Mme owo ẹma ẹkam ẹwot Jesus! Nnyịn imenyene ntak ndinịm nte ke edieke nnyịn inamde se inende, ke ata Abasi emi ekerede Jehovah ye Eyen esie Jesus ẹyema nnyịn n̄ko.

Kụbọde Bible fo kot

1 Samuel 20:15-17, 41, 42

2 Samuel 4:4; 9:1-10; 19:24-30

John 15:18

[Ikọ Idakisọn̄]

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke akpana ebet onyụn̄ ayak enye ọbọrọ mbụme oro.