Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  2011-04-01

Jesus—Nte Enye Okodude Uwem

Jesus—Nte Enye Okodude Uwem

“Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—JOHN 4:34.

SE IKETỊBEDE ini Jesus etịn̄de ikọ emi enen̄ede owụt se ikedide akpan n̄kpọ inọ enye. Enye ama asan̄a ye mme mbet esie ofụri usenubọk ke Samaria emi etiede obot obot. (John 4:6) Mme mbet esie ẹma ẹkere ke biọn̄ ọdọn̄ enye, ntre ẹnọ enye udia. (John 4:31-33) Se Jesus ọkọbọrọde mmọ ama owụt se enye akadade nte ata akpan n̄kpọ. Ndinam uduak Abasi ekenen̄ede edi akpan n̄kpọ ọnọ enye akan udia. Jesus ama esitịn̄ onyụn̄ ananam owụt ke imọ idu uwem nte Abasi okoyomde idu. Nso ke emi akabuana?

Ndikwọrọ nnyụn̄ n̄kpep mme owo mban̄a Obio Ubọn̄ Abasi:

Bible etịn̄ se ikedide akpan utom Jesus ete: “Enye asan̄a akanade ofụri Galilee, ekpep . . . onyụn̄ ọkwọrọ eti mbụk obio ubọn̄.” (Matthew 4:23) Jesus ikọkwọrọke Obio Ubọn̄ Abasi kpọt inọ mme owo, edi ama ekpep mmọ n̄kpọ—ọnọ item, anam n̄kpọ an̄wan̄a mmọ, onyụn̄ ọkọk ibuot ye mmọ. Obio Ubọn̄ Abasi ekedi ibuotikọ ukwọrọikọ esie.

Ke ofụri ini ukwọrọikọ Jesus, enye ama ekpep mme owo se Obio Ubọn̄ Abasi edide ye se Obio Ubọn̄ emi edinamde. Kop n̄kpọ ifan̄ emi aban̄ade Obio Ubọn̄ oro mi, ye mme itie N̄wed Abasi oro ẹwụtde se Jesus eketịn̄de aban̄a Obio Ubọn̄ Abasi.

  • Obio Ubọn̄ Abasi edi ukara eke heaven, ndien Jesus ke Jehovah emek ete edi Edidem Obio Ubọn̄ emi.—MATTHEW 4:17; JOHN 18:36.
  • Obio Ubọn̄ emi ayanam enyịn̄ Abasi asana onyụn̄ anam uduak Abasi ke isọn̄ nte ẹnamde ke heaven.—MATTHEW 6:9, 10.
  • Ke ini Obio Ubọn̄ Abasi edikarade isọn̄ emi, ofụri isọn̄ edidi Paradise.—LUKE 23:42, 43.
  • Obio Ubọn̄ Abasi ọmọn̄ ededi edinam uduak Abasi ke isọn̄. *MATTHEW 24:3, 7-12.

Ndinam mme utịben̄kpọ:

Ẹkenen̄ede ẹdiọn̄ọ Jesus nte “Andikpep.” (John 13:13) Edi Jesus ama anam ediwak utịben̄kpọ n̄ko ke isua ita ye ubak emi enye ọkọkwọrọde ikọ ke isọn̄. Mme utịben̄kpọ emi ẹma ẹnyene ufọn iba ke nsụhọde n̄kaha. Akpa, emi ama anam mme owo ẹkụt ke Abasi okosio enye ọdọn̄. (Matthew 11:2-6) Ọyọhọ iba, emi ama owụt ke Edidem Obio Ubọn̄ Abasi emi ayanam se ikande oro ke ini iso. Se ndusụk utịben̄kpọ emi Jesus akanamde mi.

Kere nte uwem editiede ke isọn̄ ke ini okopodudu Edidem emi edikarade nnyịn!

Ndinam ẹdiọn̄ọ orụk Owo emi Jehovah Abasi edide:

Idụhe owo en̄wen emi odotde onyụn̄ ekemede ndikpep nnyịn n̄kpọ mban̄a Jehovah nte Eyen esiemmọ, kpa Jesus Christ.  Sia Jesus edide “akpan ke otu kpukpru edibotn̄kpọ,” idụhe angel emi odude ye Jehovah ebịghi nte enye. (Colossae 1:15) Kere ofụri ini oro enye akadade ekpep n̄kpọ oto Ete esie, ekpep uduak Esie, mme edumbet Esie, ye mme usụn̄ Esie.

Jesus ama enen ke ndikọdọhọ nte: “Baba owo kiet ifiọkke enye emi Eyen edide ke mîbọhọke Ete; baba owo kiet inyụn̄ ifiọkke enye emi Ete edide ke mîbọhọke Eyen, ye enye emi Eyen enyịmede ndiyarade enye nnọ.” (Luke 10:22) Ke ini Jesus okodude ke isọn̄, enye ama ada ofụri esịt esie anam mme owo ẹfiọk owo emi Ete esie edide. Ukwọrọikọ ye ukpepn̄kpọ Jesus ikenyeneke mbiet—enye ama emen se Akwa Abasi Ibom ekekpepde enye ke heaven ekpep mme owo.—John 8:28.

Ẹkeme ndimen usụn̄ emi Jesus ekekpepde mme owo n̄kpọ aban̄a Ete esie ndomo ye se transfọma esinamde ye ikan̄ ilektrik. Transfọma esisụhọde odudu ikan̄ ilektrik, anam enye edi se mme owo ẹkemede ndida nnam n̄kpọ ke ufọk. Ntem ke Jesus okonyụn̄ anam ke ini enye okodude ke isọn̄, emen ikpọ n̄kpọ oro Ete esie ekekpepde enye ke heaven etịn̄ ọnọ mme owo ke ata mmemmem usụn̄ emi ekemede ndisọp n̄n̄wan̄a mmọ man ẹda ẹdu uwem.

Se usụn̄ iba emi Jesus akanamde ẹdiọn̄ọ Ete esie mi.

  • Jesus ama esikpep mme owo akpanikọ aban̄a Abasi—Enyịn̄ esie, uduak esie, ye mme usụn̄ esie.—JOHN 3:16; 17:6, 26.
  • Nte Jesus akanamde n̄kpọ ama anam ẹkụt nti edu Jehovah. Jesus ekenen̄ede anam n̄kpọ nte Ete esie tutu enye ọdọhọ ete: “Owo eke okụtde mi okụt Ete n̄ko,” oro onyụn̄ etie nte ndidọhọ, ‘Edieke oyomde ndifiọk nte Ete mi etiede, se se nnamde.’—JOHN 5:19; 14:9.

Idem esikpa nnyịn ke nte Jesus okodude uwem. Iyadia ata akamba ufọn edieke idun̄ọrede ntak emi Jesus akakpade inyụn̄ inamde se ikpepde ke Bible.

^ ikp. eki. 9 Edieke oyomde ndikpep n̄kpọ en̄wen mban̄a Obio Ubọn̄ Abasi ye nte nnyịn isan̄ade ifiọk ke enye ọmọn̄ ededi, kot ibuot 8 “Nso Idi Obio Ubọn̄ Abasi?,” ye ibuot 9 “Nte Nnyịn Idu Uwem ke ‘Mme Akpatre Usen’?” ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.