Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2011-04-01

Jesus—Ebiet Emi Enye Okotode

Jesus—Ebiet Emi Enye Okotode

“[Pilate] ọtọn̄ọ ntak odụk ufọk ubọn̄ andikara okobụp Jesus ete: ‘Afo oto m̀mọ̀n̄?’ Edi Jesus ibọrọke enye.”—JOHN 19:9.

PONTIUS PILATE emi ekedide owo ukara Rome okobụp Jesus mbụme emi ke ini emi enye ekekpede ikpe Jesus. * Pilate ama ọfiọk ebiet emi Jesus okotode ke Israel. (Luke 23:6, 7) Enye ama ọfiọk n̄ko ke Jesus ikedịghe ikpîkpu owo. Okûdi Pilate okoyom ndifiọk m̀mê Jesus ama ododu uwem? Ndi owo ukara emi mîkedịghe okpono Abasi mi ama eben̄e idem ndinyịme akpanikọ nnyụn̄ nnam akpanikọ? M̀mê ntre-e, se idiọn̄ọde edi nte ke Jesus ikamaha ndibọrọ enye, ndien se iketịbede esisịt ini ke oro ebede ama enen̄ede owụt ke se ikakam ibehede Pilate ekedi utom esie, idịghe akpanikọ m̀mê edinen ikpe.—Matthew 27:11-26.

Imenen̄ede ikop inemesịt koro mbon emi ẹnen̄erede ẹyom ndifiọk ebiet emi Jesus Christ okotode ẹkeme ndinam ntre. Bible etịn̄ ebiet emi Jesus okotode. Se se enye etịn̄de mi.

Ebiet emi enye akamanade:

Jesus akamana ke ata usụhọde itie ke Bethlehem, ke ntọn̄ọ ntọn̄ọ ini utọ isua 2 M.E.N. nte ibat eyomfịn owụtde. Caesar Augustus ama owụk ewụhọ ete mme owo ẹkesịn enyịn̄ ke n̄wed, ntre, Mary eka Jesus emi ama ‘ekekpere ndiman eyen’ ama asan̄a ye Joseph ebe esie aka Bethlehem obio mme Joseph. Ẹma ẹwak ke obio tutu mmọ ikwe itie ke ubetnna isenowo ndina, ntre, mmọ ẹma ẹkena ke ufọk ufene, ndien mi ke Jesus akamana, ekem ẹmen enye ẹnịm ke usịnudia ufene.—Luke 2:1-7.

Bible ama etetịn̄ ebiet emi Jesus edimanade ediwak isua ko ke edem ete: “O Bethlehem Ephrathah, emi ekpride akaha ndidu ke otu ediwak tọsịn obio Judah, owo oyoto fi ke esịt ọwọrọ ọnọ mi, emi edidide andikara ke Israel.” * (Micah 5:2) Imokụt mi ke Bethlehem ama ekpri tutu owo ibatke enye isịn ke otu mme obio Judah. Edi ẹyekpono obio emi etieti koro Messiah m̀mê Christ emi ẹken̄wọn̄ọde edito Bethlehem.—Matthew 2:3-6; John 7:40-42.

Ebiet emi ẹkebọkde enye:

Ke ete ye eka Jesus ẹma ẹkedu esisịt ini ke Egypt, mmọ ẹma ẹwọrọ ẹka Nazareth, obio emi odude ke Galilee, emi okonyụn̄ edide n̄kpọ nte kilomita 96 to do sịm edem edere Jerusalem. Jesus ikọyọhọke isua ita ini oro. Mme ọtọin̄wan̄, mme ekpemerọn̄ ye mme ọkọiyak ẹkedụn̄ọ ke ediye obio emi. Ndien mi ke Jesus okodụn̄ ye nditọeka esie emi edide ẹma ẹwak ndien etie nte mmọ ikenen̄ekede inyene n̄kpọ.—Matthew 13:55, 56.

 Bible ama etetịn̄ ediwak isua ke edem ke Messiah edidi “eyen Nazareth.” Matthew ọdọhọ ke ete ye eka Jesus ẹma ẹka ẹkedụn̄ ke “Nazareth, man okposu se ẹkedade mme prọfet ẹtịn̄, ẹte: ‘Ẹdikot enye eyen Nazareth.’” (Matthew 2:19-23) Etie nte ikọ oro, “eyen Nazareth” enyene n̄kpọ ndinam ye ikọ Hebrew oro “nsehe,” onyụn̄ etie nte Matthew eketịn̄ aban̄a ntịn̄nnịm ikọ emi Isaiah okokotde Messiah “nsehe” Jesse, emi ọwọrọde ke Messiah okoto ubon Jesse, ete Edidem David. (Isaiah 11:1) Ke nditịm ntịn̄, Jesus okoto ubon David, kpa eyen Jesse.—Matthew 1:6, 16; Luke 3:23, 31, 32.

Ebiet emi enye okotode:

Bible ọdọhọ ke Jesus ama ododu uwem anyan ini mbemiso enye ekedide edimana ke ufọk ufene ke Bethlehem. Ntịn̄nnịm ikọ Micah emi iketịn̄de iban̄a aka iso ọdọhọ ke ‘ntọn̄ọ Esie ekedi toto ke eset, ko ke ata anyan ini.’ (Micah 5:2) Jesus emi edide akpan Abasi ekedi angel ke heaven mbemiso edide edimana mi ke isọn̄ nte owo. Enye ke idemesie ama ọdọhọ ete: “N̄koto heaven nsụhọde ndi.” (John 6:38; 8:23) Didie?

Jehovah * Abasi akada edisana spirit esie anam utịben̄kpọ emi. Enye ama osio uwem esie ke heaven edisịn ke idịbi Mary, n̄kaiferi Jew emi mîkọfiọkke erenowo, man enye aman Jesus nte mfọnmma owo. Ata Ọkpọsọn̄ Abasi kpọt ekeme ndinam utọ utịben̄kpọ emi. Okonyụn̄ edi nte angel eketịn̄de ọnọ Mary ete: “Idụhe ikọ baba kiet eke otode Abasi eke mîditreke ndisu.”—Luke 1:30-35, 37.

Ke adianade ye ebiet emi Jesus okotode, Bible etịn̄ mme n̄kpọ en̄wen ọnọ nnyịn aban̄a enye. N̄wed Matthew, Mark, Luke, ye John, ẹnam ifiọk ekese iban̄a nte enye okodude uwem.

^ ikp. eki. 3 Edieke oyomde ndifiọk n̄kpọ efen mban̄a nte ẹkemụmde ẹnyụn̄ ẹkpede ikpe Jesus, kot ibuotikọ emi “Ndiọkn̄kan Ikpe Emi Akanam Ẹkpede,” ke page 18-22 ke magazine emi.

^ ikp. eki. 6 Etie nte ẹkesikot Bethlehem Ephrathah (m̀mê Ephrath).—Genesis 35:19.

^ ikp. eki. 10 Bible ọdọhọ ke Abasi ekere Jehovah.