Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2011-03-01

 Kpep N̄kpọ To Ikọ Abasi

Anie Edi Jesus Christ?

Anie Edi Jesus Christ?

Ibuotikọ emi obụp mme mbụme emi ẹkemede ndidi emesibụp n̄ko onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Anie edi Jesus Christ?

Jesus itiehe nte nnyịn, enye ama ododụn̄ ke heaven nte owo eke spirit mbemiso edide edimana ke isọn̄. (John 8:23) Enye edi ata akpa n̄kpọ emi Abasi okobotde, ndien Abasi akada enye obot kpukpru n̄kpọ eken. Enye edi n̄kukụre owo emi Jehovah okobotde ke idemesie, ntak edi oro ẹkotde enye “ikpọn̄-ikpọn̄ edibon” Eyen Abasi. Jesus okonyụn̄ edi Etịn̄ikọ ke ibuot Abasi, ntak edi oro ẹkotde enye “Ikọ.”—John 1:1-3, 14; kot Mme N̄ke 8:22, 23, 30; Colossae 1:15, 16.

2. Ntak emi Jesus ekedide isọn̄?

Abasi akanam Eyen esie edidu ke isọn̄ emi ke ndisio uwem esie ke heaven ndisịn ke idịbi Mary, eyenan̄wan Jew emi mîkọfiọkke erenowo. Ntre Jesus ikenyeneke ete ke isọn̄. (Luke 1:30-35) Jesus ekedi isọn̄ emi (1) man ekpep mme owo akpanikọ aban̄a Abasi, (2) man enịm eti uwụtn̄kpọ ke ndinam uduak Abasi, (3) man onyụn̄ ọnọ mfọnmma uwem esie nte “ufak.”—Kot Matthew 20:28; John 18:37.

3. Ntak emi iyomde ufak?

Ufak edi ekọmurua emi ẹkpede man ẹsana owo emi ẹkemụmde ẹyak. Abasi ikoyomke owo ọsọn̄ onyụn̄ akpa. Isan̄a didie idiọn̄ọ? Abasi ama ọdọhọ Adam, akpa owo oro, ete ke edieke enye anamde se Bible okotde idiọkn̄kpọ ke enye ayakpa. Ekpedi Adam ikanamke idiọkn̄kpọ, enye okpokodu uwem ke nsinsi. Okposụkedi emi Adam okodude uwem ekpere ndisịm tọsịn isua, n̄kpa esie ọkọtọn̄ọ ke usen emi enye ọkọsọn̄de ibuot ye Abasi. (Genesis 2:16, 17; 5:5) Adam ama ayak idiọkn̄kpọ ye n̄kpa ọnọ kpukpru nditọ esie. Ntem ke n̄kpa ekebe ke Adam “odụk” ererimbot. Ntak edi oro iyomde ufak.—Kot Rome 5:12; 6:23.

 4. Ntak emi Jesus akakpade?

Anie ekeme ndifak nnyịn nsio ke n̄kpa? Owo ekpe utịp idiọkn̄kpọ esie kpọt ke ini enye akpade. Idụhe anana-mfọnmma owo ndomokiet emi ekemede ndifak mbon en̄wen nsio ke idiọkn̄kpọ mmọ.—Kot Psalm 49:7-9.

Sia Jesus mîkenyeneke ete ke isọn̄, emi akpakanamde enye ada idiọkn̄kpọ amana, enye akakpa ke ntak idiọkn̄kpọ mbon en̄wen, idịghe ke ntak idiọkn̄kpọ esie. Abasi ama ọdọn̄ Eyen esie edikpa ọnọ nnyịn man owụt nte enye enen̄erede ama ubonowo. Jesus ama osụk ibuot ọnọ Ete esie onyụn̄ enyịme ndikpa ke ntak idiọkn̄kpọ nnyịn ndiwụt ke imọ n̄ko imama nnyịn.—Kot John 3:16; Rome 5:18, 19.

5. Nso ke Jesus anam idahaemi?

Jesus ama esinam udọn̄ọ okụre mme owo, anam mme akpa n̄kpa ẹset, onyụn̄ an̄wam mbon oro ẹkenyenede mfịna, ndien kpukpru emi okowụt se enye edinamde inọ mme okopitem ubonowo ke ini iso. (Luke 18:35-42; John 5:28, 29) Ke Jesus ama akakpa, Abasi ama anam enye eset okodu uwem ke heaven. (1 Peter 3:18) Ekem Jesus ama ebet ke ubọk nnasia Abasi tutu Jehovah ọnọ enye odudu ndikara ofụri isọn̄. (Mme Hebrew 10:12, 13) Idahaemi Jesus ke akara nte Edidem ke heaven, ndien mme mbet esie ke isọn̄ ke ẹkwọrọ eti mbụk emi ke ofụri ererimbot.—Kot Daniel 7:13, 14; Matthew 24:14.

Ke mîbịghike, Jesus ayada odudu emi ẹnọde enye nte Edidem etre kpukpru ndutụhọ onyụn̄ osobo mbon oro ẹdide ntak ndutụhọ emi. Kpukpru mbon emi ẹbuọtde idem ke Jesus enyụn̄ ẹkopde item esie ẹyedu uwem ke Paradise ke isọn̄.—Kot Psalm 37:9-11.

Kpukpru mbon emi ẹbuọtde idem ke Jesus enyụn̄ ẹkopde item esie ẹyedu uwem ke Paradise ke isọn̄

 

 

Kpep N̄kpọ En̄wen