Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2011-03-01

“Utom Ubọk Fo Ọyọdọn̄ Fi”

“Utom Ubọk Fo Ọyọdọn̄ Fi”

 San̄a Kpere Abasi

“Utom Ubọk Fo Ọyọdọn̄ Fi”

ESINEN̄EDE abiak owo ndikụt owo emi enye amade ọbọde ufen onyụn̄ akpade. Imesitua inyụn̄ ifụhọ. Edi ata n̄kpọ ndọn̄esịt ndifiọk nte ke Jehovah Abasi, Andibot nnyịn, ọfiọk nte esitiede nnyịn ke idem ke utọ ini emi. Ke adianade do, enen̄ede ọdọn̄ enye ndida akwa odudu esie nnam mme akpan̄kpa ẹset. Job etịn̄ ikọ ke Job 14:13-15 ndiwụt ke imọ imenyene idotenyịn.

Kere ban̄a se inamde enye etịn̄ ikọ emi. Akwa idomo esịm Job emi edide ata owo mbuọtidem; inyene esie atahade, kpukpru ndima nditọ esie ẹkpan̄a, ndien ata idiọk udọn̄ọ anam enye. Ke ini ukụt emi enen̄erede ọsọn̄ ubọk, enye eseme ọnọ Abasi ete: “Afo akpakam edịp mi ke Udi!” (Ufan̄ikọ 13) Job ada udi nte ebiet nduọkodudu. Ke udi emi ke Abasi edidịp enye nte n̄kpọuto man enye ọbọhọ ukụt ye ubiak. *

Ndi Job edidu ke udi ke nsinsi? Enye ikereke ntre. Job aka iso ntem ke akam esie: “Ndien afo enịm ini ọnọ mi onyụn̄ eti mi!” Job enen̄ede ọdiọn̄ọ ke imọ idisịneke ke udi ke nsinsi, ke Jehovah idifreke imọ. Enye ada ini oro imọ idisịnede ke udi nte ini utom oro anade ọnọ kpukpru owo. Enye edisịne ke udi ibịghi adan̄a didie? Enye ọdọhọ ke idisịne do ‘tutu ubọhọ imọ edi.’ (Ufan̄ikọ 14) Ubọhọ oro ọwọrọ ini emi ẹdisiode enye ke udi, oro edi, ini emi ẹdinamde enye eset!

Nso inam Job enịm ke imọ iyọbọhọ? Sia enye ọdiọn̄ọ se edima Andibot nnyịn aduakde ndinam nnọ mme anam-akpanikọ asan̄autom esie oro ẹkpan̄ade. Job ọdọhọ ete: “Afo oyokot, ndien ami nyeyere fi. Koro utom ubọk fo ọyọdọn̄ fi.” (Ufan̄ikọ 15) Job ọdọhọ ke imọ idi utom ubọk Abasi. Andinọ uwem emi okobotde Job esịn ke idịbi eka esie iditreke-tre ndinam enye eset afiak edidu uwem.—Job 10:8, 9; 31:15.

Ikọ Job ekpep nnyịn akamba n̄kpọ aban̄a Jehovah: Enye enen̄ede ama mbon emi ẹtiede nte Job, emi ẹyakde uwem mmọ ẹsịn enye ke ubọk ẹnyụn̄ ẹnyịmede enye ada mmimọ anam se enye amade. (Isaiah 64:8) Jehovah ada mme anam-akpanikọ asan̄autom esie nte n̄kpọuto. Enen̄ede ‘ọdọn̄’ enye ndinam n̄kpọ nnọ mbon nsọn̄ọnda emi ẹkpade. Ataifiọk Bible kiet ọdọhọ ke ikọ Hebrew emi ẹkabarede ‘dọn̄’ “edi ata ọkpọsọn̄ ikọ emi owụtde adan̄a nte owo enen̄erede oyom ndinam n̄kpọ.” Ih, Jehovah esiti onyụn̄ enen̄ede oyom ndinam mme asan̄autom esie ẹset.

Enem ndikụt nte Jehovah ayararede uduak esie ndinam mme akpan̄kpa ẹset ke n̄wed Job emi edide kiet ke otu mme n̄wed Bible oro ẹkebemde iso ẹwet. * Enye oyom fi afiak akadiana ye mbon ima fo emi ẹma ẹkekpan̄a. Ndifiọk emi ekeme ndinam emem nnyịn utom ndiyọ n̄kpa owo nnyịn. Mbọk kpep ekese efen ban̄a edima Abasi emi ye nte ekemede ndiyak enye obot fi nte enye amade man ekpetiene okụt ini emi uduak esie edisude.

Mme itien̄wed Bible emi okpokotde ke March:

Esther 1Job 15

[Mme Ikọ Idakisọn̄]

^ ikp. eki. 4 N̄wed ndụn̄ọde kiet ọdọhọ ke ikọ Job oro “dịp mi,” ekeme ndiwọrọ “nịm [mi] ke eti itie nte n̄kpọuto.” N̄wed en̄wen ọdọhọ ke ikọ emi ọwọrọ “dịp mi nte n̄kpọuto.”

^ ikp. eki. 8 Edieke oyomde ndikpep n̄kpọ efen mban̄a un̄wọn̄ọ Bible oro aban̄ade nte mme owo ẹdisetde ẹdidu uwem ke edinen obufa ererimbot, kot ibuot 7 ke n̄wed, Nso ke Bible Enen̄ede Ekpep? emi Mme Ntiense Jehovah ẹsiode.