Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-10-01

7 Ndi Abasi Oyokop Onyụn̄ Eyere?

7 Ndi Abasi Oyokop Onyụn̄ Eyere?

  Akam

7 Ndi Abasi Oyokop Onyụn̄ Eyere?

MME owo ẹsinen̄ede ẹma ẹnyụn̄ ẹnen̄ede ẹyom ndifiọk ibọrọ mbụme emi. Bible owụt ke Jehovah esikop akam mfịn. Edi nnyịn idinam enye okop m̀mê etre ndikop akam nnyịn.

Jesus ama asua ọnọ mme adaiso ido ukpono eyo esie emi ẹkesibọn̄de akam mbubịk; n̄kukụre se mmọ ẹkekerede ẹban̄a ekedi ndiwụt mme owo ke mmimọ idi ndinen owo. Enye ọkọdọhọ ke mme orụk owo oro ẹma “ẹbọ utịp mmọ ọyọhọ ọyọhọ,” emi ọwọrọde ke mmọ ẹkebọ n̄kukụre se mmọ ẹkenen̄erede ẹyom—itoro owo. Edi idịghe se mmọ ẹkpekeyomde edi oro, ẹkpekeyom Abasi eyere mmọ. (Matthew 6:5) Kpasụk ntre mfịn, ediwak owo ẹsibọn̄ akam nte ekemde ye uduak idemmọ, idịghe nte ekemde ye uduak Abasi. Abasi isiyereke mmọ sia mmọ ẹfụmide mme edumbet Bible oro inemede mi.

Edi nso kaban̄a fi? Ndi Abasi oyokop onyụn̄ eyere akam fo? Ibọrọ mbụme emi itoho orụk, idụt, m̀mê idaha fo. Bible ọn̄wọn̄ọ ọnọ nnyịn ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” (Utom 10:34, 35) Ndi ikọ oro owụt nte afo etiede? Edieke afo abakde Abasi, afo emenen̄ede eten̄e enye, abak ndinam se enye mîmaha. Edieke afo anamde edinen ido, afo odomo ndinam se Abasi ọdọhọde ke edi edinen akan ndinam uduak idemfo m̀mê uduak ekemmọ owo. Ndi emenen̄ede oyom Abasi akpan̄ utọn̄ okop akam fo? Bible eteme fi nte ọkpọbọn̄de akam man Abasi okop. *

Edi akpanikọ ke ediwak owo ẹyom Abasi ada utịben̄kpọ eyere akam mmimọ. Edi idem ke eyo Bible, Abasi ikesiwakke ndinam mme utọ utịben̄kpọ oro. Ndusụk ini ediwak isua ikie ẹma ẹsibe mbemiso enye anamde utịben̄kpọ en̄wen. Akan oro, Bible owụt ke eyo oro ẹkesinamde utịben̄kpọ ama etre ke mme apostle ẹma ẹkekpan̄a. (1 Corinth 13:8-10) Ndi emi ọwọrọ ke Abasi iyereke aba akam mfịn? Nsa-o! Kere ban̄a ndusụk akam oro enye eyerede.

Abasi esinọ ọniọn̄. Jehovah edi akakan Andinọ ata ọniọn̄. Enye esinọ ke ntatubọk, ọnọ mbon oro ẹyomde ndausụn̄ esie ẹnyụn̄ ẹyomde ndida enye nsịn ke edinam.—James 1:5.

Abasi esinọ edisana spirit esie ye kpukpru edidiọn̄ oro ẹsan̄ade ye enye. Edisana spirit edi anam-utom odudu Abasi. Idụhe odudu emi ọsọn̄de akan enye. Enye ekeme ndin̄wam nnyịn ikan mme idomo. Enye ekeme ndinọ nnyịn emem ke ini esịt etịmerede nnyịn. Enye ekeme ndinam nnyịn inyene ndiye nti edu en̄wen. (Galatia 5:22, 23) Jesus ama anam mme anditiene enye ẹfiọk ke Abasi esinọ enọ emi ke ntatubọk.—Luke 11:13.

Abasi esinọ mbon oro ẹsịnde ifịk ẹyom enye ifiọk. (Utom 17:26, 27) Odu mme owo oro ẹsịnde ifịk ẹyom akpanikọ ke ofụri ererimbot. Mmọ ẹyom ndifiọk Abasi—se idide enyịn̄ esie, se enye aduakde aban̄a isọn̄ ye ubonowo, nte mmọ ẹkemede ndisan̄a n̄kpere enye. (James 4:8) Mme Ntiense Jehovah ẹsiwak ndisobo mme owo ntre ndien esinenem mmọ ndida Bible mbọrọ mme utọ mbụme oro.

Ndi oro akanam ọbọ magazine emi? Ndi afo omoyom nte akpasan̄ade ọfiọk Abasi? Ekeme ndidi enye ada emi eyere akam fo.

[Ikọ Idakisọn̄]

^ ikp. eki. 5 Edieke oyomde ndifiọk n̄kpọ en̄wen mban̄a nte ọkpọbọn̄de akam man Abasi eyere fi, se ibuot 17 ke n̄wed oro Nso ke Bible Enen̄ede Ekpep? emi Mme Ntiense Jehovah ẹsiode.