Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  2010-10-01

4 Ikpọbọn̄ Iben̄e Nso?

4 Ikpọbọn̄ Iben̄e Nso?

 Akam

4 Ikpọbọn̄ Iben̄e Nso?

ẸDỌHỌ ke enye ke ẹbọn̄ ẹkan ke kpukpru akam mme Christian. Edide ntre m̀mê idịghe, ata ediwak owo ifiọkke se akam uwụtn̄kpọ Jesus—emi ndusụk ini ẹsikotde Akam Ọbọn̄ m̀mê Ete Nnyịn—ọwọrọde. Ata ediwak owo ẹsitịn̄ akam emi ke ibuot kpukpru usen, ndien etie nte mmọ ẹsinam emi ediwak ini. Edi idịghe se ikanamde Jesus ekpep akam oro edi oro. Isan̄a didie ifiọk?

Esisịt ini mbemiso Jesus ekekpepde akam emi, enye ama ọdọhọ ete: “Ke ini ọbọn̄de akam, kûyịre ke nditịn̄ mfiak ntịn̄ n̄kpọ kiet.” (Matthew 6:7) Ndi Jesus ọkọdọhọ ẹnam n̄kpọ oro enye akakpande ke ini enye ekekpepde ikọ akam oro ẹkpemụmde ẹdọn̄ ke ibuot ẹtịn̄ ẹfiak ẹtịn̄? Baba! Utu ke oro, Jesus ekekpep nnyịn se ikpeben̄ede ke akam nnyịn, okonyụn̄ owụt nnyịn se ikpedide mme ebeiso n̄kpọ ke ini ibọn̄de akam. Ẹyak itịn̄ enyịn idụn̄ọde se enye eketịn̄de. Ẹwet akam emi ke Matthew 6:9-13.

“Ete nnyịn emi odude ke heaven, yak ẹnam enyịn̄ fo asana.”

Ntem ke Jesus eketi mme anditiene enye ke ẹkpebọn̄ kpukpru akam ẹnọ Ete imọ, Jehovah. Edi ndi afo ọmọfiọk ntak emi enyịn̄ Abasi edide ata akpan n̄kpọ ntre ye ntak emi oyomde ẹnam enye asana?

Ẹmebiat enyịn̄ Abasi toto ke ini emi ẹkebotde owo. Satan, kpa asua Abasi, okot Jehovah osu nsu, idiọk Andikara emi mînen̄ekede inyene unen ndikara mme edibotn̄kpọ Esie. (Genesis 3:1-6) Ediwak owo ẹmeda ye Satan, ẹkpep ke Abasi edi ọsọn̄ido, abak ibak emi esisiode usiene mîdịghe ẹdọhọ ke Enye idịghe Andibot. Mbon en̄wen ẹkam ẹtop ekọn̄ ye enyịn̄ esie, ẹsio enyịn̄ oro Jehovah ẹfep ke mme edikabade Bible mmọ ẹnyụn̄ ẹkpan mme owo ndikot enyịn̄ oro.

Bible owụt ke Abasi eyetre kpukpru ndiọi edinam emi. (Ezekiel 39:7) Ke ini enye edinamde emi, enye ọyọnọ fi kpukpru se inanade fi onyụn̄ ọkọk kpukpru mfịna fo n̄ko. Didie? N̄kpọ en̄wen oro Jesus eketịn̄de ke akam esie ọbọrọ mbụme oro.

“Yak obio ubọn̄ fo edi.”

Mfịn ediwak mme andikpep ido ukpono ifiọkke se Obio Ubọn̄ Abasi edide. Edi nte mme andikpan̄ utọn̄ nnọ Jesus ẹkefiọkde, mme prọfet Abasi ẹma ẹtetịn̄ ata anyan ini ko ke Messiah, Andinyan̄a oro Abasi emekde, ayakara Obio Ubọn̄ oro edikpụhọrede ererimbot.  (Isaiah 9:6, 7; Daniel 2:44) Enye ayanam enyịn̄ Abasi asana ke ndiyarade nsu Satan ndien ekem osobo Satan ye kpukpru utom esie. Obio Ubọn̄ Abasi eyetre ekọn̄, udọn̄ọ, akan̄—ayakam etre n̄kpa. (Psalm 46:9; 72:12-16; Isaiah 25:8; 33:24) Ke ini afo ọbọn̄de akam ete yak Obio Ubọn̄ Abasi edi, afo ọbọn̄ akam ete kpukpru un̄wọn̄ọ emi ẹsu.

“Yak uduak fo ada itie, nte edide ke heaven, yak edi ke isọn̄ kpasụk ntre.”

Ikọ Jesus owụt ke uduak Abasi ayada itie ke isọn̄ ukem nte edide ke heaven emi Abasi odụn̄de. Owo ndomokiet ikekemeke ndikpan uduak Abasi ndida itie ke heaven; do, Eyen Abasi ama an̄wana ye Satan ye mme demon esie onyụn̄ osion̄o mmọ ọduọn̄ọ ke isọn̄. (Ediyarade 12:9-12) Ukem nte akpa ye ọyọhọ eben̄e iba ke akam uwụtn̄kpọ oro, ọyọhọ eben̄e ita emi an̄wam nnyịn iwụk ntịn̄enyịn ke se idide ebeiso n̄kpọ—oro edi, uduak Abasi utu ke uduak idem nnyịn. Uduak Abasi esida nti ufọn ọsọk kpukpru edibotn̄kpọ. Ntem, idem mfọnmma owo oro Jesus ama ọdọhọ Ete esie ete: “Okûdi ke uduak mi, edi yak uduak fo ada itie.”—Luke 22:42.

“Nọ nnyịn udia eke ekemde nnyịn ke usen mfịn.”

Jesus ama owụt ke nnyịn ikpenyene ndiben̄e se inanade nnyịn n̄ko. Idiọkke ndiben̄e Abasi se ididade idu uwem ke usen ke usen. Ke akpanikọ, ndinam oro anam iti ke Jehovah edi enye emi “[ọnọde] kpukpru owo uwem ye ibifịk ye kpukpru n̄kpọ.” (Utom 17:25) Bible owụt ke enye edi edima ete emi okopde inemesịt ndinọ nditọ esie se inanade mmọ. Edi ukem nte eti ete m̀mê eka, enye idinamke mme eben̄e emi mînyeneke ufọn inọ nnyịn.

“Fen nọ nnyịn ke isọn eke nnyịn ikamade.”

Ndi afo amakama Abasi isọn? Ndi omoyom enye efen ọnọ fi? Ediwak owo mfịn idaha idiọkn̄kpọ ke n̄kpọ ndomokiet. Edi Bible ekpep ke idiọkn̄kpọ edi ntak kpukpru nnama oro ẹsịmde nnyịn, sia enye edi ntak n̄kpan̄a ubonowo. Nnyịn imesiwak ndinam idiọkn̄kpọ sia ikadade-da enye imana, ndien n̄kukụre se idinamde nnyịn inyene nsinsi uwem edi edieke Abasi efende ọnọ nnyịn. (Rome 3:23; 5:12; 6:23) Esịt enem nnyịn koro Bible ọdọhọ ete: “Afo, [Jehovah], ọmọfọn, omonyụn̄ ama ndidahado.”—Psalm 86:5.

“Nyan̄a nnyịn sio ke ubọk andidiọk.”

Ndi ọmọfiọk ke emenen̄ede oyom Abasi ekpeme fi? Ediwak owo imaha ndinịm ke “andidiọk,” oro edi, Satan, odu. Edi Jesus ama ekpep ke Satan odu, idem okotde enye “andikara ererimbot emi.” (John 12:31; 16:11) Satan abiat ererimbot emi enye akarade mi, ndien enye enen̄ede oyom ndibiat fi n̄ko, ndinam fi okûnen̄ede ukpere Ete fo, kpa Jehovah. (1 Peter 5:8) Edi odudu Satan ifetke-fet ndikpon nte odudu Jehovah, ndien Jehovah ama ndikpeme mbon oro ẹmade Enye.

Akpan eben̄e ifan̄ oro inemede ke akam uwụtn̄kpọ Jesus oro itịn̄ke kpukpru se ikpesisịnde ke akam nnyịn. Ti ke 1 John 5:14 etịn̄ aban̄a Abasi ete: “Se ededi oro nnyịn iben̄ede ekekem ye uduak esie, enye ọbiọn̄ utọn̄ ke eben̄e nnyịn.” Ntem kûkere ke mfịna fo ekpri akaha nditịn̄ nnọ Abasi.—1 Peter 5:7.

Edi nso kaban̄a ini ye ebiet emi ikpọbọn̄de akam? Ndi mmọ ẹnen̄ede ẹdi akpan n̄kpọ ke ini ibọn̄de akam?