Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-10-01

2 Ikpọbọn̄ Inọ Anie?

2 Ikpọbọn̄ Inọ Anie?

 Akam

2 Ikpọbọn̄ Inọ Anie?

NDI kpukpru akam ẹsika ebiet kiet, inamke n̄kpọ m̀mê ẹbọn̄ ẹnọ anie? Edi ọsọ n̄kpọ ndikere ntre ke ererimbot mfịn. Ekikere emi enem mbon oro ẹmade nsio nsio ufọkabasi ndidiana kiet ntuak ibuot, ẹnyụn̄ ẹyomde ẹnyịme kpukpru ido ukpono kpa ye oro ẹdide nsio nsio. Ndi ekeme ndidi ekikere oro inenke?

Bible ekpep ke ẹbọn̄ ata ediwak akam ẹnọ owo oro owo mîkpọbọn̄ke inọ. Ko ke eyo oro ẹkewetde Bible, mme owo ẹma ẹsiwak ndibọn̄ akam nnọ ndisọi mbiet. Edi Abasi ama esiwak ndikpan utọ edinam oro. Ke uwụtn̄kpọ, Psalm 115:4-6 etịn̄ ntem aban̄a ndisọi mbiet: “Ẹmenyene utọn̄, edi ikopke.” N̄kpọ emi ana in̄wan̄-in̄wan̄. Ufọn ndibọn̄ akam nnọ abasi emi mîkemeke ndikop se etịn̄de?

In̄wan̄-in̄wan̄ mbụk Bible kiet anam n̄kpọ emi enen̄ede an̄wan̄a. Elijah emi ekedide ata prọfet ama amia ata ye mme prọfet Baal ete ẹbọn̄ akam ẹnọ abasi mmọ, ndien ke oro ebede enye Elijah ọbọn̄ ọnọ Abasi esiemmọ. Elijah ọkọdọhọ ke enye emi ediyerede edi ata Abasi. Mme prọfet Baal ẹma ẹnyịme n̄kpọ emi ẹnyụn̄ ẹbọn̄ akam etieti ke anyan ini, idem ẹfioride uyo ọsọn̄—edi ufọn ikodụhe! Mbụk oro ọdọhọ ete: “Baba owo kiet eke eyerede idụhe, baba n̄kpan̄-utọn̄ inyụn̄ idụhe.” (1 Ndidem 18:29) Edi nso iketịbe ke ini Elijah ọkọbọn̄de akam?

Ke Elijah ama ọkọbọn̄ akam, Abasi esie ama eyere iwiwa, ọdọn̄ ikan̄ oto ke heaven edita uwa Elijah. Nso ikedi ukpụhọde? Akpan n̄kpọ kiet oro anamde ifiọk ukpụhọde emi odu ke akam Elijah, emi ẹwetde ke 1 Ndidem 18:36, 37. Enye edi ata ibio ibio akam—n̄kpọ nte ikọ 30 kpọt ke akpasarade usem Hebrew. Edi ke ikọ ifan̄ oro, Elijah ama okot Jehovah, kpa ọkpọkpọ enyịn̄ Abasi, utịm ikata.

Baal, emi ọwọrọde “andinyene” m̀mê “eteufọk,” ekedi abasi mbon Canaan, ndien enye ekedi ke utọ ke utọ. Edi Jehovah edi san̄asan̄a enyịn̄ emi akakan Owo ke ofụri ekondo ekerede. Abasi emi ọkọdọhọ ikọt esie ete: “Ami ndi Jehovah; enyịn̄ mi edi oro: ndinyụn̄ nnọhọ owo efen ubọn̄ mi.”—Isaiah 42:8.

Ndi akam Elijah ye eke mme prọfet Baal oro ẹkeka ebiet kiet? Utuakibuot Baal okososụhọde mme owo itie ke ntak usan̄a akpara ye edikam n̄wa mme owo. Edi utuakibuot Jehovah akakam ọnọnọ ikọt esie Israel uku, osio mmọ ke ufụn utọ ndiọi edinam oro. Ke ntre, kere ban̄a emi: Edieke afo ekpewetde leta ọnọ ẹsọk ufan oro afo enen̄erede okpono, ndi afo okpoyom ẹmen enye ẹsọk owo emi mîkereke enyịn̄ ufan fo, emi ọwọrọde idiọk etop, mînyụn̄ itiehe nte ufan fo? Ke akpanikọ ukpoyomke!

 Edieke afo ọbọn̄de akam ọnọ Jehovah, afo ọbọn̄ ọnọ Andibot, Ete ofụri ubonowo. * Prọfet Isaiah ọkọbọn̄ akam ete: “Afo, O Jehovah, edi ete nnyịn.” (Isaiah 63:16) Mmọdo, Abasi emi ke Jesus Christ eketịn̄ aban̄a ke ini enye ọkọdọhọde mme anditiene enye ete: “Mmọn̄ ndidọk mbịne Ete mi ye Ete mbufo, Abasi mi ye Abasi mbufo.” (John 20:17) Jehovah edi Ete Jesus. Enye edi Abasi emi Jesus ọkọbọn̄de akam ọnọ, okonyụn̄ ekpepde mme anditiene enye ete ẹbọn̄ akam ẹnọ.—Matthew 6:9.

Ndi Bible eteme nnyịn ete ibọn̄ akam inọ Jesus, Mary, ndisana owo, m̀mê mme angel? Baba—ọdọhọ ibọn̄ inọ Jehovah ikpọn̄-ikpọn̄. Kere ban̄a ntak iba. Akpa, akam edi edinam utuakibuot, ndien Bible ọdọhọ ke Jehovah ikpọn̄-ikpọn̄ ke ẹkpetuak ibuot ẹnọ. (Exodus 20:5) Ọyọhọ iba, Bible anam ifiọk ke enye enyene udorienyịn̄ emi, “Afo emi okopde akam.” (Psalm 65:2) Okposụkedi emi Jehovah esiyakde ediwak n̄kpọ ọnọ mbon en̄wen ẹnam, enye idehedei iyak edikop akam inọ owo ekededi. Enye edi Abasi emi ọn̄wọn̄ọde ke imọ idikop akam nnyịn ke idem imọ.

Ntre, edieke oyomde Abasi okop akam fo, ti item N̄wed Abasi emi: “Ẹyenyan̄a owo ekededi eke esemede okot enyịn̄ Jehovah.” (Utom 2:21) Edi ndi Jehovah esikop kpukpru akam, inyeneke se oyomde? Mîdịghe ndi enyene n̄kpọ en̄wen oro oyomde ifiọk edieke iyomde Jehovah okop akam nnyịn?

[Ikọ Idakisọn̄]

^ ikp. eki. 9 Ndusụk ukpepn̄kpọ ido ukpono ẹdọhọ ke ifọnke ndikot ọkpọkpọ enyịn̄ Abasi, idem ke akam. Edi enyịn̄ oro odu n̄kpọ nte utịm ike 7,000 ke mme akpasarade usem emi ẹkedade ẹwet Bible, ke ediwak idaha enye odu ke akam ye ke mme psalm mme anam-akpanikọ asan̄autom Jehovah.

[Ndise ke page 5]

Ata oro Elijah akamiade ye mme prọfet Baal ama owụt ke kpukpru akam ikaha ebiet kiet