Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2010-06-01

Mbon Oro Ẹkewetde N̄kpọ Ẹban̄a Jesus

Mbon Oro Ẹkewetde N̄kpọ Ẹban̄a Jesus

 Kpep Nditọ Fo

Mbon Oro Ẹkewetde N̄kpọ Ẹban̄a Jesus

NDI emesima nditie ye mbon en̄wen n̄kot n̄kpọ mban̄a Jesus?— * Akpa ndusụk owo idem ndifiọk ke Jesus ikewetde n̄kpọ ndomokiet ke Bible. Kpa ye oro, owo itiaita oro ẹketienede ẹwet Bible ẹsian nnyịn ekese ẹban̄a Jesus. Kpukpru mmọ ẹkedu uwem ke ini Jesus okodude, mmọ ẹnyụn̄ ẹsian nnyịn se enye ekekpepde. Ndi emekeme ndisiak enyịn̄ mmọ mbitiaita?— Mmọ ẹdi Matthew, Mark, Luke, ye John. Owo inan̄ eken ẹdi Peter, James, Jude, ye Paul. Nso ke afo ọfiọk aban̄a mmọ?—

Ẹyak ibem iso ineme iban̄a ewet n̄wed ita, emi ẹkesịnede n̄ko ke otu apostle 12 oro Jesus ekenyenede. Ndi ọmọfiọk enyịn̄ mmọ?— Peter, John, ye Matthew. Peter ama ewet leta iba ọnọ ekemmọ mme Christian. Enye ama asian mmọ mme n̄kpọ oro enye ọkọfiọkde ke Jesus ama anam onyụn̄ etịn̄. Kụbọde Bible ka 2 Peter 1:16-18, nyụn̄ kot se Peter eketịn̄de aban̄a nte enye okokopde Jehovah Abasi etiede ke heaven etịn̄ ikọ ọnọ Jesus.—Matthew 17:5.

Apostle John ekewet n̄wed ition ke Bible. Enye eketie adiana Jesus ke akpatre udia oro mme mbet ẹkediade ye Eteufọk mmọ. John ama odu n̄ko ye Jesus ke ini Jesus akakpade. (John 13:23-26; 19:26) John ekewet kiet ke otu mbụk inan̄ oro ẹban̄ade uwem Jesus emi ẹkotde Gospel. Enye n̄ko ekewet Ediyarade emi Jesus akayararede ọnọ enye, ọkọrọ ye leta ita ke Bible oro ẹkotde ẹdian enye. (Ediyarade 1:1) Ọyọhọ owo ita oro eketienede ewet Bible oro akakabarede edi apostle Jesus ekedi Matthew. Enye ekesidi ọbọ a-tax.

Mme andiwet Bible iba en̄wen ẹkefiọk Jesus ke san̄asan̄a usụn̄. Mmọ ẹkedi nditọeka esie, sia ẹkedide n̄ko nditọ Joseph ye Mary. (Matthew 13:55) Ke akpa, mmọ ikedịghe mme mbet Jesus. Mmọ ẹma ẹkam ẹkere ke ibuot ọbọhọ Jesus ke ntak ifịk ifịk utom ukwọrọikọ esie. (Mark 3:21) Mmanie ẹkedi nditọeka esie emi?— James ekedi kiet ke otu mmọ. Enye ekewet n̄wed James ke Bible. En̄wen ekere Judas, emi ẹkotde n̄ko Jude. Enye ekewet n̄wed Jude ke Bible.—Jude 1.

Owo iba en̄wen emi ẹkewetde n̄kpọ ẹban̄a Jesus ẹdi Mark ye Luke. Mary eka Mark ama enyene akamba ufọk ke Jerusalem, ndien akpa mme Christian, emi esịnede apostle Peter, ẹma ẹsisop idem do. (Utom 12:11, 12) Ediwak isua ko ke edem, ke okoneyo oro Jesus ekenịmde akpatre Passover ye mme apostle esie, anaedi Mark ama etiene mmọ ke ini mmọ ẹkekade In̄wan̄ Gethsemane. Ke ini ẹkemụmde Jesus, mbonekọn̄ ẹma ẹsịn ubọk ẹmụm Mark, edi enye ọkpọn̄ ọfọn̄ linen esie efehe iferi.—Mark 14:51, 52.

Luke ekedi abiausọbọ emi ekenen̄erede aka n̄wed, ndien etie nte enye akakabarede edi mbet ke Jesus ama akakpa. Enye ama etịn̄ enyịn odụn̄ọde ọfiọk uwem Jesus, onyụn̄ ewet ata nnennen mbụk aban̄a  emi ke usụn̄ oro an̄wan̄ade owo. Nte ini akakade, Luke ama akabade nsan̄a isan̄ apostle Paul, onyụn̄ ewet n̄wed Utom ke Bible.—Luke 1:1-3; Utom 1:1.

Paul edi ọyọhọ owo itiaita oro eketienede ewet Bible, emi ekewetde n̄kpọ aban̄a Jesus. Enye ọkọbọ ukpep ke ukot Gamaliel, emi ekedide ọwọrọetop ekpeibet. Mme Pharisee ẹkebọk ẹnyụn̄ ẹkpep Paul emi ẹkesikotde Saul ini oro; enye ama asua mme mbet Jesus onyụn̄ etiene owot mmọ. (Utom 7:58–8:3; 22:1-5; 26:4, 5) Ndi ọmọfiọk nte Paul akasan̄ade edikpep akpanikọ oro aban̄ade Jesus?—

Ọfọn, Paul akasan̄a ke usụn̄ uka Damascus man okomụm mme mbet Jesus ke ini nyayama un̄wana okotode ke enyọn̄ ke mbuari ekịm enye enyịn. Enye ama okop nte uyo obụpde enye ete: “Saul, Saul, ntak emi afo ọkọbọde mi?” Jesus eketịn̄ ikọ! Enye ama ọdọhọ Paul aka Damascus. Do Jesus ama ọdọhọ Ananias mbet esie eketịn̄ ikọ ye Paul, ndien Paul ama akabade edi mbet Jesus. (Utom 9:1-18) Paul ekewet n̄wed 14 ke Bible, ọtọn̄ọde ke n̄wed Rome tutu esịm Mme Hebrew.

Ndi ọmọtọn̄ọ ndikot mme n̄wed Bible oro ẹban̄ade Jesus, m̀mê ọdọhọ owo okot ọnọ fi?— Kiet ke otu akakan n̄kpọ oro afo ekemede ndinam ke uwem edi nditọn̄ọ idahaemi afo edide uyen mi n̄kpep se Bible etịn̄de aban̄a Jesus.

[Ikọ Idakisọn̄]

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke ana ebet onyụn̄ obụp enye mbụme oro.

MBỤME:

▪ Siak mme apostle Jesus emi ẹkewetde Bible.

▪ Siak nditọeka Jesus iba emi ẹketienede ẹwet Bible.

▪ Mark akasan̄a didie ọdiọn̄ọ Jesus, ndien nso ikanam Luke mîdiọn̄ọke Jesus?

▪ Paul akasan̄a didie edidi mbet Jesus?

[Ndise ke page 25]

Jude

Mark

Peter

Matthew

Paul

James

Luke

John