Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-05-01

 Ukpọhọde Inemesịt Ubon

Kpep Nditọ Fo Ẹkabade Mme Owo Oro Ẹkemede Ndiberi Edem

Kpep Nditọ Fo Ẹkabade Mme Owo Oro Ẹkemede Ndiberi Edem

George: * “Ekesidi kpukpru okoneyo. Michael, ekpri eyeneren mi emi edide isua inan̄, ama esisuan n̄kpọmbre esie obon ke ufọk. Mma nsidomo ndinam enye etịm mme n̄kpọ oro obon mbemiso odụkde idap. Edi enye ama esiyat esịt, ofiori n̄kpo, onyụn̄ aka iso asuan n̄kpọ obon. Ndusụk ini, esịt ama esiyat mi tutu nduat enye, edi oro akakam anam esịt etetịm ọdiọk nnyịn mbiba. N̄kesiyom ini idap edi ini inemesịt. Ntre, mma nsion̄o idem mfep, nsinyụn̄ ntịm mme n̄kpọ oro mbon.”

Emily: “Mfịna ọkọtọn̄ọ ke ini emi Jenny eyen mi emi edide isua 13 mîketịmke ifiọk nte andikpep esie okoyomde enye anam utom ufọkn̄wed emi ẹkenọde enye. Ke ini enye ọkọnyọn̄de n̄wed edi, enye ama atua eyet ke hour kiet. Mma ndọhọ enye ọdọhọ ẹn̄wam imọ ke ufọkn̄wed, edi enye ama ọdọhọ ke andikpep mmimọ ọsọsọn̄ ido, ntre ke imọ ikemeke ndida andikpep ke iso ntịn̄ ikọ. Akayak nsịn̄ ndika ufọkn̄wed iwiwa n̄kasua nnọ andikpep oro. N̄kekere ke owo ndomokiet inyeneke unen ndinam esịt ọdiọk edima eyen mi ntre!”

NDI se ikọwọrọde George ye Emily esiwọrọ fi? Ukem nte George ye Emily, ediwak ete ye eka isimaha ndikụt nditọ mmọ ẹnyenede mfịna m̀mê mîkopke inemesịt. Edi ndammana n̄kpọ mme ete ye eka ndikpeme nditọ mmọ. Edi se iketịn̄de iban̄a ke enyọn̄ emi ọnọ ete ye eka ifet ndikpep nditọ mmọ ata akpan n̄kpọ; oro edi, ndinam n̄kpọ nte nditọ owo. Edi akpanikọ ke owo ikemeke ndikpep eyen isua 4 ukem se ẹkpepde eyen isua 13.

Edi se idude edi ke udukemeke ndikpeme eyen fo mbak mfịna kpukpru ini. Nte ini akade, eyen ọyọkpọn̄ ete esie ye eka esie onyụn̄ ‘obiom mbiomo idemesie.’ (Galatia 6:5; Genesis 2:24) Man nditọwọn̄ ẹkeme ndise mban̄a idemmọ, ana mme ete ye eka ẹtịn̄ enyịn ẹkpep nditọ mmọ n̄kpọ man mmọ ẹkabade ẹdi ikpọ owo emi ẹfọnde ido, ẹkerede ẹban̄a owo, ẹnyụn̄ ẹdide se ẹberide edem. Emi idịghe ifia ubọk kiet!

  Edi ọfọn sia nte Jesus ekesinamde n̄kpọ ye mme mbet esie edi ata eti uwụtn̄kpọ ọnọ mme ete ye eka. Jesus ikobonke nditọ. Edi se ikanamde enye emek onyụn̄ ọnọ mme mbet esie ukpep ekedi man mmọ ẹkpekeme ndinam utom emi, idem ke enye ama ọkọnyọn̄. (Matthew 28:19, 20) Se Jesus akanamde mme mbet esie ẹkabade ẹdi edi ukem ye se mme ete ye eka ẹyomde nditọ mmọ ẹdi. Se ikpehe ita kpọt ke uwụtn̄kpọ oro Jesus ekenịmde ọnọ mme ete ye eka.

‘Ẹnịm Uwụtn̄kpọ’ Ẹnọ Nditọ Mbufo

Ke ama ekekpere ini emi Jesus edikpade, enye ama ọdọhọ mme mbet esie ete: “N̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.” (John 13:15) Kpasụk ntre, mme ete ye eka ẹnyene ndikpep nditọ mmọ nnyụn̄ nnam n̄wụt mmọ nte ẹkpedide mme owo oro ẹkemede ndiberi edem.

Bụp idemfo ete: ‘Ndi mmesima nditịn̄ ke enenem mi ndinam utom mi? Ndi mmesitịn̄ mban̄a idatesịt oro n̄kopde ke ntak emi nnamde ọkpọsọn̄ utom nnọ mbon en̄wen? Mîdịghe, ndi nsiwak ndiseme idem nnyụn̄ mmen idemmi ndomo ye mbon emi etiede nte inyeneke mfịna ke uwem?’

Imọdiọn̄ọ ke mfọnmma owo idụhe. N̄kpọ esinyụn̄ akak kpukpru nnyịn ndusụk ini. Edi uwụtn̄kpọ mbufo edi akakan usụn̄ emi ẹkemede ndin̄wam nditọ mbufo ẹfiọk ke enen̄ede ọfọn owo anam n̄kpọ ke usụn̄ oro ẹkemede ndiberi edem ke enye.

NAM EMI ISE: Edieke ekemede, da eyen fo ndusụk ini ka itieutom fo nyụn̄ wụt enye se esinamde man enyene okụk ada ọbọk ubon. San̄a ye eyen fo kanam n̄kpọ nọ owo ke mfọn. Ẹma ẹkụre, sian eyen fo nte esịt enemde fi ndinam n̄kpọ oro.—Utom 20:35.

Kûyom Eyen Fo Anam Se Isọn̄de Ikan Enye

Jesus ama ọfiọk ke ayada ini mbemiso mme mbet esie ẹdikemede ndinam utom emi enye ọkọnọde mmọ. Enye ama ọdọhọ mmọ inikiet ete: “Mmenyene ediwak n̄kpọ nditịn̄ nnọ mbufo, edi mbufo idikemeke ndibiom mmọ ke emi.” (John 16:21) Jesus ikọdọhọke mme mbet esie ẹtọn̄ọ ndinam n̄kpọ ke idemmọ ke nsonso oro. Utu ke oro, enye ama ada ekese ini ekpep mmọ ediwak n̄kpọ. Ekedi Jesus okokụt ke mme mbet esie ẹkeme ndinam n̄kpọ ke idemmọ mbemiso enye osio mmọ ọdọn̄.

Kpasụk ntre, ikpọfọnke mme ete ye eka ẹdọhọ nditọ mmọ ẹnam mme n̄kpọ emi ikpọ owo ẹkpenamde ke ini emi mmọ mîkponke kan̄a ikem. Kpa ye oro, nte nditọ ẹkọride, mme ete ye eka ẹkpenyene ndibiere orụk utom emi ẹdotde ye mmọ. Ke uwụtn̄kpọ, ete ye eka ẹkpenyene ndikpep nditọ mmọ ẹfiọk ndiyere mmọn̄ nnyụn̄ n̄kama idem, ndinam ubet mmọ asana, ndika n̄kpọ ke ini, ye ndikama okụk. Ke ini eyen ọtọn̄ọde n̄wed, ete ye eka ẹkpenyene ndinam eyen oro ada utom oro ẹnọde enye ke ufọkn̄wed nte akpan utom emi anade enye anam.

Mme ete ye eka ikpọnọhọ eyen mmọ utom kpọt. Ana mmọ n̄ko ẹn̄wam eyen oro man enye ekeme ndinam utom oro ọfọn. George oro iketịn̄de iban̄a ke ntọn̄ọ ama edifiọk ke ntak kiet emi Michael ekesiyatde esịt ke ini ẹdọhọde enye atan̄ n̄kpọmbre esie edi ke utom oro ama okpon akan enye. George ọdọhọ ete: “Utu ke ndiduat Michael nte atan̄ n̄kpọmbre esie, mma n̄kpep enye nte enye akpanamde oro.”

Nso ke enye akanam? George ọdọhọ ete: “Akpa n̄kpọ oro n̄kanamde ekedi ndinịm akpan ini oro enye akpatan̄de n̄kpọmbre esie etịm obon kpukpru okoneyo. Ekem, ami ye enye itịm mme n̄kpọ ke n̄kan̄ kiet ibon. Mmanam utom oro akabade etie nte ibre mbre, nnyụn̄ n̄kam nnam akabade mbuba man ise owo emi edisọpde ubọk ikan. Ikebịghike, n̄kpọ emi ama akabade edi kiet ke otu n̄kpọ oro isinamde mbemiso idụkde idap. Mma ndọhọ Michael ke edieke enye ọsọpde anam, ke nyokot mbụk en̄wen nnọ enye mbemiso enye odụkde idap. Edi edieke enye mîsọpke ubọk, ke ndikot esisịt mbụk nnọ enye.”

NAM EMI ISE: Dụn̄ọde se eyen fo kiet kiet edikemede ndinam, emi edinamde n̄kpọ ẹsan̄a nte ọfọnde ke ubon. Bụp idemfo ete, ‘Ndi enyene mme n̄kpọ oro nsụk nnamde nnọ  nditọ mi, emi mmọ ẹkemede ndinam ke idemmọ?’ Edieke edide ntre, nam n̄kpọ oro ye mmọ tutu okụt ke mmọ ẹkeme ndinam mme n̄kpọ oro ke idemmọ. Nam mmọ ẹdiọn̄ọ ke nte mmọ ẹnamde utom oro edida eti m̀mê idiọk idi. Ndien ẹma ẹnam ẹma, nọ mmọ utịp m̀mê ufen.

Nọ Nnennen Ndausụn̄

Jesus ama ọfiọk ke mfọnn̄kan usụn̄ ndifiọk n̄kpọ edi ndinanam n̄kpọ oro, ukem nte kpukpru nti mme andikpep ẹfiọkde. Ke uwụtn̄kpọ, ke ini Jesus okokụtde ke odot, enye ama ọdọn̄ mme mbet esie “ẹsan̄a iba iba ẹbem enye iso ẹka ẹkedụk ke kpukpru obio ye ebiet eke enye ke idemesie oyomde ndika.” (Luke 10:1) Edi enye ikosioho mmọ idọn̄ ntre, inọhọ ndausụn̄. Enye ama enen̄ede ọnọ mmọ mme akpan ndausụn̄ mbemiso ọdọn̄de mmọ ẹka. (Luke 10:2-12) Ke ini mme mbet ẹkenyọn̄de ẹdi ẹdisian Jesus se mmọ ẹkenamde, enye ama otoro onyụn̄ esịn udọn̄ ọnọ mmọ. (Luke 10:17-24) Enye ama owụt ke imenyene mbuọtidem ke idem mmọ inyụn̄ ima mmọ.

Esinam n̄kpọ didie ke ini anade nditọ fo ẹnam ọkpọsọn̄ utom? Ndi emesiyom ndikpeme mmọ mbiọn̄ọ mme n̄kpọ oro mmọ ẹfehede ndinam, mbak mmọ ẹdikpu ẹnyụn̄ ẹyat esịt? Ekeme ndidi akpa n̄kpọ emi edikerede edidi yak inyan̄a eyen imọ m̀mê ibọ enye n̄kpọ oro inam ke idem imọ.

Edi kere ise: Edieke afo esisọpde ọbọ nditọ fo n̄kpọ anam, nso ke oro ediwụt? Ndi oro oyowụt ke afo emenyene mbuọtidem ke idem mmọ onyụn̄ enịm ke mmọ ẹnyene ukeme ndinam n̄kpọ? Mîdịghe ndi ọdọhọ mmọ ke osụk ada mmọ nte nseknditọ emi mîkemeke ndinam n̄kpọ ndomokiet ke idemmọ, emi anade afo anam kpukpru n̄kpọ ọnọ?

Ke uwụtn̄kpọ, didie ke Emily oro iketịn̄de iban̄a ke ntọn̄ọ akanam n̄kpọ aban̄a mfịna eyen esie? Utu ke enye ndisịn idem ke mfịna oro, enye ama ọdọhọ eyen esie ekenyene nneme ye andikpep. Emily ye Jenny eyen esie ẹma ẹtie ọtọkiet ẹwet ediwak mbụme emi Jenny edidade ika ufọkn̄wed. Ekem, mmọ ẹneme ini emi ọkpọfọnde Jenny ekeneme n̄kpọ oro ye andikpep. Mmọ ẹma ẹkam ẹnam ndomonse nte Jenny edinemede n̄kpọ emi ye andikpep. Emily ọdọhọ ete: “N̄kpọ oro ama anam Jenny enyene uko ndika n̄kenyene nneme ye andikpep, ndien andikpep ama otoro enye ke ntak emi enye ekedide edineme n̄kpọ oro ye imọ. N̄kpọ oro ama enen̄ede enem Jenny, ami nnyụn̄ nnem esịt ye Jenny.”

NAM EMI ISE: Wet mme mfịna oro eyen fo enyenede idahaemi. Wet nte afo ekemede ndin̄wam eyen fo ọkọk mfịna oro, edi ubọhọ n̄kpọ oro unam unọ enye. Tie ye eyen fo neme se enye akpanamde man ọkọk mfịna oro. Nam eyen fo ọfiọk ke imenyene mbuọtidem ke enye ekeme ndikọk mfịna oro.

Edieke afo akade iso ndibọ n̄kpọ nnam nnọ nditọ fo, ekeme ndidi uduyakke mmọ ẹkpep ndikọk mme mfịna oro mmọ ẹnyenede. Se akpakam anamde ekpedi ndikpep nditọ fo ẹma ndinam n̄kpọ ke idemmọ. Edieke anamde ntre, oro edidi kiet ke otu akakan enọ oro afo ọnọde nditọ fo.

^ ikp. eki. 3 Ẹkpụhọ mme enyịn̄.

BỤP IDEMFO ETE . . .

  • Ndi mmọfiọk mme n̄kpọ oro nditọ mi ẹkemede ndinam?

  • Ndi mmesisian mmọ nnyụn̄ n̄wụt mmọ se mmọ ẹkpenamde man ẹkụt unen?

  • Ebịghi didie n̄kesịn udọn̄ nnọ nnyụn̄ ntoro nditọ mi?