Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-04-01

Ndi Bible Asian Nnyịn Kpukpru N̄kpọ Aban̄a Jesus?

Ndi Bible Asian Nnyịn Kpukpru N̄kpọ Aban̄a Jesus?

Okûdi Jesus ikakpaha ke Golgotha nte Bible ọdọhọde, edi ama ọbọhọ? Okûdi enye ama ọdọ Mary Magdalene onyụn̄ obon nditọ? Mîdịghe okûdi enye ekedi owo ndịbe odudu emi akasuade inem uwem okonyụn̄ esịnde kpukpru n̄kpọ emi ẹkpenọde owo inemesịt ke isọn̄? Okûdi enye ama ekpep mme owo n̄kpọ emi mîdịghe ukem ye se ikotde ke Bible?

MME utọ ekikere emi ẹnen̄ede ẹdi ọsọ n̄kpọ ke mme isua ndondo emi, ndien ẹda mme ọwọrọetop ndise vidio ye mme n̄wed ẹsuan mmọ. Ke ẹsiode mme ndise emi ẹkerede-kere mi ẹfep, odu ediwak n̄wed emi ẹtịn̄de n̄kpọ ẹban̄a mme n̄wed Apocrypha, emi ẹkewetde ọtọn̄ọde ke n̄kpọ nte isua 1,900 ye 1,800 emi ẹkebede. Ndien ẹdọhọ ke mme n̄wed Apocrypha emi ẹtịn̄ mme akpan n̄kpọ oro ẹban̄ade Jesus, emi mme Gospel mîtịn̄ke. Ndi utọ ikọ oro edi akpanikọ? Ndi imekeme ndifiọk m̀mê Bible etịn̄ ofụri akpanikọ aban̄a Jesus ọnọ nnyịn?

Ọfọn ineme akpan n̄kpọ ita man ikeme ndibọrọ mme mbụme emi. Akpa, oyom ifiọk akpan n̄kpọ iban̄a mme owo emi ẹkewetde  mme Gospel ye ini emi mmọ ẹkewetde; ọyọhọ iba, oyom ifiọk mbon emi ẹkemekde n̄wed oro ẹnyịmede nte mme n̄wed Bible ye nte ẹkenamde oro; ye ọyọhọ ita, oyom ifiọk ndusụk n̄kpọ iban̄a mme n̄wed Apocrypha ye nte mmọ ẹkpụhọrede ye mme n̄wed oro ẹnyịmede nte mme n̄wed Bible.

Ini Ewe ke Ẹkewet N̄wed Abasi Christian Usem Greek, Ndien Mmanie Ẹkewet?

Ndusụk n̄wed ẹdọhọ ke ẹkewet Gospel Matthew ke ọyọhọ isua itiaita tọn̄ọ Christ akakpa, oro edi, ke n̄kpọ nte isua 41 E.N. Ediwak nditọ ukpepn̄kpọ ẹdọhọ ke ibịghike ntre, edi ata ediwak owo ẹnyịme ke ẹkewet kpukpru n̄wed emi ẹdọn̄ọde ke N̄wed Abasi Christian Usem Greek ke eyo mme apostle.

Mbon oro ẹkekụtde ini emi Jesus okodude uwem, akpade, onyụn̄ esetde ẹkesụk ẹdodu ini oro; mmọ ẹma ẹkeme ndisọn̄ọ ke mme Gospel ẹdi akpanikọ. Mmọ ẹkpekenyụn̄ ẹtịn̄ se ededi oro mîkedịghe akpanikọ. Prọfesọ F. F. Bruce ọdọhọ ete: “Kiet ke otu akakan nsọn̄ọ ke ukwọrọikọ mme apostle edi emi mmọ ẹkesitịn̄de uko uko ẹban̄a se mme andikpan̄ utọn̄ nnọ mmọ ẹkefiọkde; mmọ ẹkesidọhọ ẹte, ‘Nnyịn ima ida enyịn ikụt mme n̄kpọ emi,’ ẹnyụn̄ ẹdian do ẹte, ‘Kpa nte mbufo ke idem mbufo ẹfiọkde’ (Utom 2:22).”

Apostle Paul ama anam mme utịben̄kpọ, akam anam akpan̄kpa eset, emi ekenen̄erede owụt ke spirit Abasi ama odu ye enye onyụn̄ ada enye usụn̄ ke se enye ekewetde

Mmanie ẹkewet N̄wed Abasi Christian Usem Greek? Ndusụk ke otu mme apostle Jesus 12 ẹma ẹtiene ẹwet. Mmọ ye mbon en̄wen oro ẹketienede ẹwet Bible, utọ nte James, Jude, ye iso-ọfọn Mark, ẹma ẹtiene ẹdu ke usen Pentecost 33 E.N. ke ini ẹketọn̄ọde esop Christian. Kpukpru mme andiwet Bible, esịnede Paul, ẹma ẹnen̄ede ẹdiana kiet ye ata akpa otu ukara esop Christian eyo mme apostle, emi ekesịnede mme apostle ye mbiowo ke Jerusalem.—Utom 15:2, 6, 12-14, 22; Galatia 2:7-10.

Jesus ọkọdọn̄ mme anditiene enye ete ẹka iso ẹkwọrọ ikọ ẹnyụn̄ ẹkpep mme owo n̄kpọ—kpa utom emi enye ọkọtọn̄ọde. (Matthew 28:19, 20) Enye ama akam ọdọhọ ete: “Owo eke akpan̄de utọn̄ ọnọ mbufo, akpan̄ ọnọ mi n̄ko.” (Luke 10:16) Ke adianade do, enye ama ọn̄wọn̄ọ ọnọ mmọ ete ke edisana spirit Abasi, m̀mê anamutom odudu Abasi, ọyọnọ mmọ odudu man ẹnam utom oro. Ke ntre, mme Christian eyo mme apostle ẹma ẹsinyịme n̄wed ekededi oro mme apostle m̀mê nsan̄autom mmọ—oro edi, iren emi ẹkewụtde ke imenyene edisana spirit Abasi—ẹkewetde.

Ndusụk mme andiwet Bible ẹma ẹtịn̄ ke mbon eken oro ẹketienede ẹwet Bible ẹkeda odudu spirit Abasi ẹwet, n̄ko ke se mmọ ẹkewetde ekedi akpanikọ. Ke uwụtn̄kpọ, apostle Peter ama etịn̄ aban̄a mme leta oro Paul ekewetde onyụn̄ ọdọhọ ke mme leta emi ẹdi ukem ye “mme itien̄wed Abasi eken.” (2 Peter 3:15, 16) Paul n̄ko ama enyịme ke mme apostle ye mme Christian eken emi ẹkedide mme prọfet ẹma ẹnyene spirit Abasi.—Ephesus 3:5.

Ntem, Gospel ẹnen̄ede ẹdi akpanikọ ye se ẹkemede ndiberi edem. Mmọ idịghe ikpîkpu mbụk ye ekọn̄-n̄ke. Mmọ ẹdi mbụk emi mme owo oro Abasi ọkọnọde odudu edisana spirit esie ẹketịn̄de enyịn ẹwet se iketịbede ke eset, emi mmọ ẹkedade enyịn mmọ ẹkụt.

Anie Ekemek Mme N̄wed Oro Ẹnyịmede nte Mme N̄wed Bible?

Ndusụk mme ewet n̄wed ẹdọhọ ke Ufọkabasi emi Akwa Edidem Constantine akakarade ẹkemek mme n̄wed oro ẹdọn̄ọde ke N̄wed Abasi Christian Usem Greek ke ata ediwak isua ẹma ẹkebe tọn̄ọ ẹkewet mme n̄wed emi. Edi idịghe ntre ke ekedi.

Ke uwụtn̄kpọ, kop se Oskar Skarsaune, prọfesọ emi esikpepde mbụk ido ukpono ọdọhọde mi: “Idịghe ufọkabasi m̀mê owo ekededi ekemek mme n̄wed emi akanade ẹsịn ke Obufa Testament ye mbon oro mîkanaha ẹsịn . . . Se ẹkedade ẹbiere n̄kpọ emi akana ata in̄wan̄-in̄wan̄ onyụn̄ enen̄ede esịne ifiọk: Ẹkeda mme n̄wed eyo mme apostle, emi ẹkenịmde ke mme apostle m̀mê mme nsan̄autom mmọ ẹkewet, nte mme n̄wed oro ẹkemede ndiberi edem. Owo ikesịnke mme n̄wed, mme leta, m̀mê mme inua-okot gospel eken, emi ẹkewetde ke  eyo mme apostle ama ekebe . . . Ẹma ẹbiere n̄kpọ emi ata anyan ini mbemiso eyo Constantine, ye ata anyan ini mbemiso ẹkesiakde ufọkabasi emi enye akakarade. Ufọkabasi emi ẹkekọbọde ke ntak mbuọtidem mmọ ekemek mme n̄wed oro ẹdọn̄ọde ke Obufa Testament, idịghe ufọkabasi emi Constantine akakarade.”

Ken Berding, udiana prọfesọ emi esikpepde n̄kpọ aban̄a N̄wed Abasi Christian Usem Greek, eketịn̄ ntem aban̄a nte ẹkesan̄ade ẹnyene mme n̄wed oro ẹnyịmede nte mme n̄wed Bible: “Idịghe ufọkabasi ekemek mme n̄wed oro ẹnyịmede nte mme n̄wed Bible; akam enen̄ede enen ndidọhọ ke ufọkabasi ẹma ẹnyịme mme n̄wed emi mme Christian ẹkesidade nte nnennen Ikọ Abasi.”

Edi, ndi mme osụhọde-idem Christian emi ẹkedude ke eyo mme apostle kpọt ẹkemek mme n̄wed emi? Bible asian nnyịn ke ata akpan n̄kpọ—emi onyụn̄ enen̄erede okop odudu—akanam n̄kpọ emi.

Bible ọdọhọ ke “mbufiọk ikọ odudu spirit” ekedi kiet ke otu utịbe utịbe enọ eke spirit oro ẹkenọde mme Christian ke ini ẹketọn̄ọde-tọn̄ọ esop Christian. (1 Corinth 12:4, 10) Ntre, ẹma ẹnọ ndusụk mme Christian oro odudu emi akande ukeme owo man mmọ ẹfiọk ukpụhọde emi odude ke ikọ emi Abasi ọkọnọde odudu spirit ẹda ẹtịn̄ ye enye oro owo mîkadaha spirit Abasi itịn̄. Ke ntem, mme Christian mfịn ẹkeme ndinịm ke ẹma ẹfiọk ke ẹkeda odudu spirit Abasi ẹwet mme n̄wed oro ẹdọn̄ọde ke Bible.

Ana ata in̄wan̄-in̄wan̄ ke ẹkeda edisana spirit ẹmek mme n̄wed oro ẹdọn̄ọde ke Bible toto ke ata eset. Ọtọn̄ọde ke n̄kpọ nte isua 1,900 emi ẹkebede, ndusụk mme ewet n̄wed ẹma ẹtịn̄ n̄kpọ ẹban̄a mme n̄wed oro ẹnyịmede nte mme n̄wed Bible. Edi idịghe mme ewet n̄wed emi ẹkemek mme n̄wed emi ẹnyịmede nte mme n̄wed Bible; mmọ n̄kukụre ẹkesọn̄ọ se Abasi ama akadada mme asan̄autom esie emi enye ọkọnọde spirit esie, enyịme.

Mme ikpan̄wed eset n̄ko ẹnen̄ede ẹsọn̄ọ mme n̄wed oro ẹdade nte mme n̄wed Bible oro ata ediwak owo ẹnyịmede mfịn. Mme ikpan̄wed N̄wed Abasi Christian Usem Greek 5,000 emi ẹkewetde ke usem Greek ẹdu, emi ẹkewetde ndusụk ke n̄kpọ nte isua 1,900 ye 1,800 emi ẹkebede. Mme n̄wed emi ke ẹkeda nte N̄wed Abasi ke eyo mme apostle ye ke oro ebede, ẹnyụn̄ ẹsion̄o mmọ ẹwet ẹnyụn̄ ẹsuan ke ediwak ebiet, ikedịghe mme n̄wed Apocrypha.

Edi uyarade emi odude ke Bible ke idemesie edi akakan. Mme n̄wed emi ẹnyịmede nte mme n̄wed Bible mi ẹdu ke n̄kemuyo ye “nti ikọ” emi ẹdude ke mme n̄wed Bible eken. (2 Timothy 1:13) Mmọ ẹsịn udọn̄ ẹnọ mme andikot ẹte ẹma, ẹtuak ibuot ẹnọ, ẹnyụn̄ ẹnam n̄kpọ Jehovah, mmọ ẹnyụn̄ ẹkpan owo ẹte ẹkûnịm  nsunsu ekikere ke akpanikọ, ẹkûtuak ibuot ẹnọ mme demon ye mme edibotn̄kpọ. Mmọ ẹtịn̄ ata nnennen se iketịbede ke eset ye se iditịbede ke ini iso, ẹnyụn̄ ẹsịn udọn̄ ẹnọ mme andikot ẹma kiet eken. N̄wed Abasi Christian Usem Greek ke ẹtịn̄ kpukpru emi ẹban̄a. Ndi ẹkeme nditịn̄ ntem mban̄a mme n̄wed Apocrypha?

Didie ke Mme N̄wed Apocrypha Ẹkpụhọrede?

Mme n̄wed Apocrypha ẹnen̄ede ẹkpụhọde ye mme n̄wed oro ẹnyịmede nte mme n̄wed Bible. Ẹkewet mme n̄wed Apocrypha emi ọtọn̄ọde ke n̄kpọ nte isua 1,850 emi ẹkebede, ke anyan ini ẹma ẹkebe tọn̄ọ ẹkewet mme n̄wed emi ẹnyịmede nte mme n̄wed Bible. Se mme n̄wed Apocrypha ẹtịn̄de ẹban̄a Jesus ye Ido Ukpono Christ ikemke ye N̄wed Abasi emi ẹkedade odudu spirit Abasi ẹwet.

Ke uwụtn̄kpọ, Gospel Thomas emi odude ke n̄wed Apocrypha etịn̄ isen isen n̄kpọ emi ẹdọhọde ke Jesus eketịn̄, utọ nte ndidọhọ ke Jesus ọkọdọhọ ke imọ iyanam Mary akabade erenowo man enye ekpekeme ndidụk Obio Ubọn̄ heaven. Gospel Thomas Nditọwọn̄ ọdọhọ ke ekpri Jesus edi eyen ibak emi okoide-koi owot ekpri eyen en̄wen. Utom Paul ye Utom Peter emi ẹdude ke Apocrypha ẹsọn̄ọ ẹkpan mme owo ẹte ẹkûfiọk owo, ẹnyụn̄ ẹkam ẹdọhọ ke mme apostle ẹkekpak iban ẹdian̄ade ẹkpọn̄ mme ebe mmọ. Gospel Judas ọdọhọ ke Jesus ama asak mme mbet esie ke ini mmọ ẹkebọn̄de akam ẹnọ Abasi ẹban̄a udia. Utọ ikọ emi ẹnen̄ede ẹkpụhọde ye se idude ke mme n̄wed oro ẹnyịmede nte mme n̄wed Bible.—Mark 14:22; 1 Corinth 7:3-5; Galatia 3:28; Mme Hebrew 7:26.

Ediwak n̄wed Apocrypha ẹdi ukpepn̄kpọ n̄ka Gnostic, emi ẹkekpepde ke Jehovah emi edide Andibot idịghe eti Abasi. Mmọ ẹkenyụn̄ ẹkpep n̄ko ke idịghe ata owo ediset, ke kpukpru n̄kpọ oro ẹkụtde ke enyịn ẹdi idiọkn̄kpọ, ye nte ke Satan ọkọtọn̄ọ ndọ ye unyene nditọ.

Ẹdọhọ ke mme owo emi ẹtịn̄de ẹban̄a ke Bible ẹkewet ediwak n̄wed Apocrypha, edi idịghe akpanikọ. Ndi edi akpanikọ ke ẹma ẹdụk odu ẹsion̄o mme n̄wed Apocrypha ẹfep ke Bible? M. R. James emi enen̄erede ekpep n̄kpọ aban̄a mme n̄wed Apocrypha ọkọdọhọ ete: “Idịghe owo ndomokiet okosion̄o mmọ efep ke Obufa Testament: mmọ ẹsion̄o idemmọ ẹfep.”

Mme Andiwet Bible Ẹma Ẹdụri Owo Utọn̄ Ẹban̄a Mfiakedem

Ẹdụri nnyịn utọn̄ ke ediwak ebiet ke mme n̄wed emi ẹnyịmede nte mme n̄wed Bible ẹban̄a mfiakedem emi ekenyenede ndisabarede esop Christian. Ke nditịm ntịn̄, mfiakedem emi ama ọtọtọn̄ọ ke eyo mme apostle, edi mme apostle ikayakke enye atara. (Utom 20:30; 2 Thessalonica 2:3, 6, 7; 1 Timothy 4:1-3; 2 Peter 2:1; 1 John 2:18, 19; 4:1-3) Utọ ntọt emi ama anam mme Christian ẹfiọk mme n̄wed oro ẹketọn̄ọde ndiwọrọ ndi ke mme apostle ẹma ẹkekpan̄a, kpa mme n̄wed emi ẹketịn̄de se idide isio ye se Jesus ekekpepde.

Edi akpanikọ ke mme n̄wed emi ẹnen̄ede ẹbịghi, ndusụk nditọ ukpepn̄kpọ ye mme ewetmbụk eset ẹnyụn̄ ẹnen̄ede ẹkpono mme n̄wed emi. Edi kere emi ise: Nso ikpetịbe edieke ntaifiọk ẹkpetan̄de mme abian̄a abian̄a n̄wed mfịn ẹtịm ẹbon, emi ekemede ndidi ẹsion̄o ke mme magazine emi ẹsiwetde mme n̄kpọ oro ẹkerede-kere ye mme n̄wed ndedịbe n̄ka ido ukpono, ekem ẹtịm mme babru oro ẹbon ke itie ubon n̄kpọuto? Ndi mme n̄wed oro ndina ke ata anyan ini akpanam se ẹwetde ke esịt ẹdi akpanikọ ye se ẹkemede ndiberi edem? Ndi isua 1,700 ndibe akpanam nsu ye ebiọ oro ẹkewetde ke mme n̄wed oro ẹkabarede akpanikọ ke ntak emi mme n̄wed oro ẹnen̄erede ẹbịghi?

Ikemeke ndinam! Kpasụk ntre ke edi ye mme n̄wed Apocrypha ndidọhọ ke Jesus ama ọdọ Mary Magdalene ye isen isen ikọ eken oro ẹwetde do. Ufọn ndinịm se mme utọ n̄wed abian̄a oro ẹtịn̄de, akpan akpan sia imenyene mme n̄wed emi ẹtịn̄de akpanikọ? Kpukpru se Abasi oyomde ifiọk iban̄a Eyen esie mmọdo ke Bible—kpa n̄wed emi nnyịn ikemede ndiberi edem.