Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-03-01

Ndi Bible Edi Ikọ Abasi?

Ndi Bible Edi Ikọ Abasi?

“Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.”—2 TIMOTHY 3:16, 17.

NSO okopodudu ikọ ke apostle Paul eketịn̄ ntem aban̄a nte Bible enen̄erede enyene ufọn! Edi akpanikọ ke enye ekenen̄ede etịn̄ aban̄a ikpehe Bible oro okodude ke eyo esie—oro edi, ikpehe Bible oro ndusụk owo ẹsikotde Akani Testament. Edi ikọ esie emi aban̄a kpukpru n̄wed 66 oro ẹdude ke Bible, esịnede mbon oro mme anam-akpanikọ mbet Jesus ẹkewetde ke eyo mmọ.

Ndi emenen̄ede okpono Bible nte Paul okokponode? Ndi emenịm ke Abasi ekenen̄ede ọnọ odudu spirit ẹda ẹwet Bible? Mme Christian eyo mme apostle ẹma ẹkpono ẹnyụn̄ ẹnịm ke ẹkeda odudu spirit ẹwet Bible. Se mme Christian ẹsụk ẹnịmde edi oro. Ke uwụtn̄kpọ, John Wycliffe, ọkwọrọ ederi eyen England oro okodude uwem ke n̄kpọ nte isua 700 emi ẹkebede, akada Bible nte “mfọnmma ibet emi edide akpanikọ.” The New Bible Dictionary etịn̄ aban̄a ikọ Paul emi odude ke ntọn̄ọ ibuotikọ emi, ete ke ntak emi Abasi ọkọnọde odudu spirit ẹda “ẹwet Bible anam ẹnịm ke kpukpru se Bible etịn̄de ẹdi akpanikọ.”

Owo Idaha Aba Bible nte Ẹkesidade

Edi ke ndondo emi, mme owo imaha aba ndinịm se Bible etịn̄de. N̄wed oro The World’s Religions ọdọhọ ete: “Kpukpru mme Christian ẹdọdọhọ ke [isụk] inyenyịme Bible ada mmimọ usụn̄ ke se inamde ye se inịmde ke  akpanikọ.” Edi mmọ inyịmeke enye ada mmọ usụn̄. Ediwak owo ẹda Bible idahaemi nte “ekikere owo, emi owo mîkemeke ndiberi edem.” Okposụkedi emi mmọ ẹnyịmede ke mme andiwet Bible ẹma ẹnen̄ede ẹnyene mbuọtidem, mmọ ẹda irenowo emi nte mme anana-mfọnmma owo oro ẹkedomode ndinam ntotụn̄ọ n̄kpọ Abasi an̄wan̄a owo, edi oro mîkenyeneke ifiọk ye mbufiọk oro inyenede mfịn.

Ke nditịn̄ akpanikọ, iwakke mme owo mfịn emi ẹyakde Bible ada mmọ usụn̄ ke se ẹkerede ẹnyụn̄ ẹnamde. Ke uwụtn̄kpọ, ikafan̄ ke esikop mme owo ẹdọhọde ke se Bible etịn̄de aban̄a ido uwem edi ido eset inyụn̄ inyeneke ufọn? Ediwak owo ẹsisiak mmọn̄ ke mme item ye edumbet Bible nte ẹmama—m̀mê ẹfụmi mmọ ofụri ofụri edieke ọsọn̄de mmọ ndinịm. Ndusụk inua-okot Christian ẹsikokoi ẹfụmi se Bible etịn̄de aban̄a use, efịbe, unana edinam akpanikọ, ye ukpammịn.—1 Corinth 6:9, 10.

Ntak emi edide ntre? Ke n̄kpọ nte isua 100 emi ẹkebede, Sir Charles Marston emi ekedide ọdọkisọn̄ nyom n̄kpọeset ama etịn̄ ntak kiet ke n̄wed esie oro The Bible Is True. Enye ọkọdọhọ ke mme owo ẹma ẹsọp ẹkaha “ẹnyịme ekikere mme ewet n̄wed eyomfịn” emi ẹkedọhọde ke Bible inenke. Ndi se mme owo ẹsụk ẹnamde edi oro mfịn? Didie ke afo ekpese ekikere ye ukpepn̄kpọ ntaifiọk emi ẹtịn̄de n̄kpọ ẹbiat Bible? Kop se ibuotikọ oro etienede etịn̄de aban̄a n̄kpọ emi.