Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  2010-03-01

Ndikwọrọ Ikọ Nnyụn̄ N̄kpep Mme Owo Bible ke Africa

Ndikwọrọ Ikọ Nnyụn̄ N̄kpep Mme Owo Bible ke Africa

 Ndikwọrọ Ikọ Nnyụn̄ N̄kpep Mme Owo Bible ke Africa

IDỤT: 57

IBATOWO: 878,000,158

MME NTIENSE JEHOVAH: 1,171,674

UKPEPN̄KPỌ BIBLE: 2,382,709

JEHOVAH ọnọ mme owo ke kpukpru ebiet ọsọn̄urua enọ—oro edi, eti mbụk Obio Ubọn̄. Nnyịn emi ikọbọde enọ oro inyụn̄ imade Jehovah imenyene ifet ndinọ mbon en̄wen. Ima itiene inọ mbon en̄wen, emi anam nnyịn inyene idatesịt ke ntak emi inemde Andinọ enọ emi esịt ye mbon oro ẹbọde enọ emi. Ke akpanikọ, nnyịn iwụt ke imama Abasi ye mbọhọidụn̄ ke ini ikwọrọde eti mbụk. (Matthew 22:37-40) Kot ban̄a nte ikọt Jehovah ẹwụtde ima emi ke ndisịn ifịk n̄kwọrọ eti mbụk ke Africa.

Benin Claude ye Marie-Claire n̄wan esie ẹmenam utom isụn̄utom ifịk ifịk ke isua 27. Ke February, Marie-Claire ama ọfiọnọde ọduọ obụn̄ ukot. Ke urua iba ẹma ẹkebe, Claude ebe esie ama ọduọ obụn̄ ukot ke ini akanamde n̄kpọ ke ufọkidụn̄ isụn̄utom. Ẹma ẹbọp Marie-Claire n̄kpọ ke ukot nnasia ẹnyụn̄ ẹbọp Claude ke ukot ufien. Claude ama anam mbubru ete: “Nnyịn isima ndinam n̄kpọ ntre!”

N̄kpọ oro ẹkebọpde Claude ke ukot ama ayak enye an̄wana asan̄a esịt, edi eke Marie-Claire ikayakke enye ọkpọn̄ ufọk ke ediwak urua. Enye ama anam ndutịm man ekpep owo 4 Bible ke ufọkidụn̄ isụn̄utom mmọ ke otu owo 12 oro enye esikpepde Bible, edi enye ikekemeke ndiwọrọ n̄kọkwọrọ ikọ. Ntre, enye ama esitie ke iso ufọkidụn̄ isụn̄utom mmọ, odori ediwak n̄wed ke okpokoro, onyụn̄ ọkwọrọ ikọ ọnọ mbon oro ẹsan̄ade ẹbe. Enye ama etie do ọkwọrọ ikọ hour 83 ke March. Ndi Jehovah ama ọdiọn̄ utom esie? Mme owo ẹma ẹbọ enye n̄wed 14, ndiye uduot n̄kpri n̄wed 452, magazine 290, ye se ibede tract 500.

Ethiopia Arega, emi odụn̄de ke nsannsan obio kiet ke Ethiopia okoyom ndida babru mbana ibibene ufọk esie. Okposụkedi emi ndusụk owo ke idụt oro ẹsidade n̄wedmbụk n̄kpọntịbe ẹbana ibibene ufọk mmọ, enye okoyom n̄wed oro enyenede ndiye ndise. Arega ama okụt eren kiet nte ọnọde mme owo ediye uduot ekpri n̄wed Dara Uwem ke Isọn̄ ke Nsinsi! ke urua. Enye ama ọbọ kiet ekịbi adian ke ibibene ufọk esie edi ikotke. Ke isua iba ẹma ẹkebe, enye ama okụt ikọ emi “Jesus ekedi Eyen Abasi” ke n̄wed oro enye akadiande ke ibibene. Emi ama okpụhọde ye esen esen Abasi-Ita-ke-Kiet oro ẹkekpepde enye. Arega ama enen̄ede oyom ndifiọk n̄kpọ emi, anam enye ama asan̄a ofụri hour usụkkiet aka akwa obio oro ekperede akan man okokụt mbon oro ẹdọhọde ke Abasi enyene Eyen. Enye ikekwe mmọ ke akpa ini oro enye akakade, ntre ama afiak ọnyọn̄ mfụhọ mfụhọ. Ekem, enye ama afiak aka, edi isan̄ enye emi mme owo ẹma ẹteme enye ufọk Ntiense oro ọkọnọde enye ediye uduot ekpri n̄wed oro. Akana enye aka iso enyene ime, koro enye ekenyene nditie ediwak hour mbet Ntiense oro ọnyọn̄ edi. Mmọ  ẹma ẹneme nneme tutu ada ekesịm nditọn̄ọ ukpepn̄kpọ Bible. Arega ama esisan̄a aka akwa obio man ekekpep n̄kpọ aban̄a Abasi ke ediwak ọfiọn̄. Ke ini enye ekenemede se enye ekekpepde ye mbon en̄wen ke obio mmọ, ekese owo ikamaha, ediwak owo ẹnyụn̄ ẹsọn enye. Edi enye iketreke ndisian mmọ, ndien ndusụk owo ẹma ẹnyene udọn̄. Ke ini mbon oro ẹnyenede udọn̄ ẹkesịmde owo 13, ẹma ẹnọ Mme Ntiense iba, emi ẹdade utom ukwọrọikọ nte ubọkọkọ, ẹka obio oro. Ikebịghike, mmọ mbiba ẹma ẹsinịm se ibede ukpepn̄kpọ Bible 40, ndien n̄kpọ nte owo 40 en̄wen ẹma ẹsitiene ẹdụk mbono esop Mme Ntiense Jehovah. Mme Ntiense itiaita ẹdu idahaemi ke obio oro. Amaedi Arega emi edide obufa Ntiense idahaemi, ndise oro ke ibibene ufọk esie idịghe aba ikpîkpu n̄kpọ mbana.

Ghana Ẹdọhọ ke ntak emi urụk ukopikọ oro ẹkamade-kama ẹsan̄a edide ọsọ n̄kpọ idahaemi ke ofụri Africa, ke ‘ndutịm usuanetop ke okpụhọrede.’ Ndusụk ufọkutom urụk ukopikọ ẹyak mme owo ẹsikot owo ke mfọn ke ndusụk hour ke okoneyo man ẹnyene mbonurua. Ntiense kiet emi ekerede Grace ama ada ini emi ọkwọrọ ikọ. Enye ikesikemeke ndikpep Monica eyen ukpepn̄kpọ Bible esie n̄kpọ ke ntak emi n̄wan oro mîkenyeneke ini. Grace ama anam ofụri se enye ekekemede man ekpep enye n̄kpọ, onyụn̄ akam odiomi ndika ufọk Monica ke n̄kanika ition usenubọk. Edi Monica ikosụk inyeneke ifet ndikpep n̄kpọ, idem ke ini oro. Grace ama ọdọhọ ke iyokot enye okoneyo ke ini oro ẹsikotde owo ke mfọn. Monica ama enyịme, ndien mmọ ẹma ẹdiomi ndisida urụk ukopikọ n̄kpep n̄kpọ ke n̄kanika inan̄ usenubọk. Idotenyịn mmọ ama akpa mfụhọ ke ini mmọ ẹkefiọkde ke mmimọ ikemeke ndikot kiet eken sia ata ediwak owo ẹsikot owo ini oro n̄ko. Ntem, mmọ ẹma ẹdiomi ndidemede ke n̄kanika ita usenubọk man ẹkpep Bible, okposụkedi emi mîkememke inọ mmọ mbiba, sia mmọ ẹdide eka nditọ, ẹsinyụn̄ ẹnamde utom. Grace ọdọhọ ete: “Mma mbọn̄ akam mben̄e Jehovah ọnọ mi odudu ye udọn̄ man n̄ka iso nnam eyen ukpepn̄kpọ mi emi aka iso ama ndikpep Bible. Mma nnam urụk ukopikọ mi esidemede mi ini oro, nsinyụn̄ nsịn ofụri ukeme ndemede. Okposụkedi emi n̄kesinen̄erede n̄kpa mba, n̄kayakke oro akpan mi.” Enye okokop inemesịt didie ntem ke ima isịn ukeme emi, ke ini enye okokụtde nte Monica anade baptism ke Mbono District “Ndausụn̄ Spirit Abasi” eke Mme Ntiense Jehovah ke 2008! Ke ndondo emi, Grace ama ada ini ukot owo ke mfọn emi enịm ukpepn̄kpọ Bible ye mma kiet, ndien enye ọtọn̄ọ ndidụk mme mbono esop idahaemi.

Mozambique Ke August 2008, ofụm ama osio jaket ke ubomisọn̄ oro ekebede ke usụn̄ ọkọduọk ekpere ekpri ufọk ubuene ebeakpa emi edide Ntiense. Eyenete emi ama emen jaket oro onyụn̄ okụt babru, n̄kpri ekpat oro ẹdọn̄ọde mme n̄kpọmbana, ye se ikperede ndisịm tọsịn dollar kiet [n̄kpọ nte ₦142,000]. Enye ama eyịre ete owo ke obio oro okot nọmba urụk ukopikọ oro enye okokụtde ke mme babru oro man asian andinyene ke ẹkụt n̄kpọ esie oro okosopde. Irenowo inan̄ ẹma ẹwat ke ubomisọn̄ ẹdisịm obio-in̄wan̄ oro mbubreyo oro. Ntiense oro ama ayak jaket ye kpukpru se ikọdọn̄ọde ke esịt ọnọ andinyene ke iso n̄kpisọn̄. Andinyene ama ọdọhọ ke edieke mîkpedịghe kiet ke otu Mme Ntiense Jehovah okokụt jaket oro, ke imọ isehe ite ikpafiak ikụt enye. Okposụkedi emi Ntiense oro edide ubuene, enye ama ọnọ ikọ ntiense ke obio oro, ndien emi ama enen̄ede anam ẹtoro enyịn̄ Abasi esie, kpa Jehovah.