Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2010-03-01

Edikon̄ Obot ke Ufụmenyọn̄

Edikon̄ Obot ke Ufụmenyọn̄

 Leta Papua New Guinea

Edikon̄ Obot ke Ufụmenyọn̄

AMIA n̄kanika ition usenubọk ke usen Tuesday emi ofiopde etieti ke Lae ke Papua New Guinea. Ami ye n̄wan mi ke iben̄e idem ndika Lengbati ke Obot Rawlinson ke Stet Morobe man ikese otu Mme Ntiense Jehovah do.

Ekpri ubomofụm oro idụkde esimen owo inan̄, ndien edida minit 30 kpọt. Nsiwak nditie andiwat ke n̄kan̄ ke isan̄ emi, isida n̄kpọ utịn̄ikọ inyene nneme ke ntak uyom engine ubomofụm oro. Andiwat ama anyan ubọk owụt mi mme n̄kpọ oro ẹdade ẹwat ubomofụm ke iso ubomofụm oro onyụn̄ anam mbubru ete ke edieke enyenede se inamde imọ ke ami ndiwat ubomofụm oro. Ke ebe oro, mma nti se iketịbede inọ asan̄autom Mme Ntiense Jehovah kiet ke idụt emi. Ke ini awat ubomofụm okosụhọde ke ufụmenyọn̄, asan̄autom oro ye n̄wan esie ẹma ẹsịne do, ubomofụm oro onyụn̄ oyo ikpọn̄ tutu andiwat afiak eset onyụn̄ awat ubomofụm oro ekebehe. Edi eke nnyịn inyeneke mfịna.

Nnyịn ife ke mben akwa obot oro, ndien inikiet inikiet isịbe ntọn̄enyọn̄ ibe inyụn̄ ibe ke enyọn̄ etịn̄e obot oro, ida n̄kpọ nte mita 100 ikon̄ ikan enye. Nnyịn ida ikụt obio Lengbati, emi ẹdade eto ye ndak ẹbọp ufọk ẹnyụn̄ ẹda nnyanyan̄a ẹfụk ọkọm. Awat ubomofụm osụk enyịn ese itiembehe ubomofụm ke adan̄aemi ifede ke enyọn̄, onyụn̄ etịm ese man okụt nte ebiet oro etiede n̄ko m̀mê nditọwọn̄ ke ẹbre bọl do. Enye onyụn̄ ese m̀mê edi ẹtịbi ndudu do toto ke akpatre ini oro enye ekedide mi. Ke ini enye afiakde ese unaisọn̄, enye ọdọhọ ete: “Ọfọn, imọn̄ ibehe.” Nnyịn ima iwọn̄ọrede inyụn̄ isụhọde man ibehe ke ekpri itiembehe oro, emi mbio obio oro ẹkesịbede ẹsio ke mben obot oro. Ndien ibịghike mmọ ẹkebom itiat ke obot mbọhọ oro ẹda ẹdisịn isọn̄ oro.

Ke ini n̄kedide mi ke ini edem, mma nse n̄kpri itiat oro nnyụn̄ n̄kere m̀mê obot emi ebịghi adan̄a didie. Kere ọkpọsọn̄ odudu emi okonụkde itiat emi ọniọn̄de ata ediwak kilomita osio ke inyan̄ibom tutu enye ọwọrọ okon̄ kilomita inan̄! Ke ima ikọwọrọ ke ubomofụm, ikọtọ ikpat ke ebiet emi n̄kotde edikon̄ obot ke ufụmenyọn̄.

Nte ido edide, mbio obio ẹma ẹfen̄e ẹto kpukpru ebiet ẹdi ke ini mmọ ẹkopde uyom ubomofụm oro edide ndibehe. Ke ini awat ubomofụm eketrede engine ubomofụm oro, ete kiet ama ọwọrọ ke otuowo asan̄a edi. Enye ekere Zung. Mme Ntiense Jehovah ẹnyene ndutịm unọ ukpep emi ẹsinịmde kpukpru urua ke ofụri ererimbot, ndien Zung edi kiet ke otu iren oro ẹdọhọde ẹse ẹban̄a ndutịm unọ ukpep emi do. Ikọt mmọ ẹfiọk enye  nte owo emi odude edisana uwem, anamde akpanikọ, ẹnyụn̄ ẹkemede ndiberi edem. Enye ọdọhọ ke imọ ikpep ndidu uwem ntre ke ntak emi idade mme edumbet Bible isịn ke edinam. Ke ima ikọkọm kiet eken inyụn̄ ikọm ubọk, ima isan̄a esisịt ke obot oro ye Zung ye Mme Ntiense eken. Nditọwọn̄ ẹtiene nnyịn ke edem, ẹnyụn̄ ẹnyan̄a ndimen ekpat nnyịn.

Imedi idisịm ekpri ufọk emi Mme Ntiense edem oro ẹdade obukpọk ẹbọp ẹnịm ẹnọ asan̄autom mmọ emi esidide kpukpru ọfiọn̄ itiokiet. Okposụkedi emi idụt emi esifiopde etieti, n̄kan̄ emi ebịt etieti ke ntak emi odude ke enyọn̄ obot. Ke ini idomode utuenikan̄ okoneyo, mmesikụt ntụhube—emi otode unaisọn̄ ọdọk obot oro sụn̄sụn̄ ke uwemeyo—nte otode mme ufan̄ obukpọk isọn̄ufọk oro ebe odụk ufọk. Enyene nte etiede ndisịne ọfọn̄ etuep man ikop ufiop ke ini n̄kpọ nte hour ifan̄ emi ẹbede, ibibiak akasiaha nnyịn ke ntak ọkpọsọn̄ ufiop ke mbenesụk.

Ke ufọt ufọt iduọk isua 1980, owo emi otode mi ama ekpep Bible oto Mme Ntiense Jehovah ke ini enye okodude ke Lae. Ke ini enye akafiakde ọnyọn̄ edi mi, enye ye ọkpọ owo ifan̄ en̄wen ẹma ẹbọp ekpri itie usopidem, emi ekenen̄erede anam mmọ ẹdat esịt. Ekem pastọ ufọkabasi Lutheran do ye ikọt esie ẹma ẹfọp ufọkmbono oro ofụri ofụri. Mme ọfọp ufọk oro ẹma ẹkpọ inua ẹte ke obio oro ekedi obio Ufọkabasi Lutheran. Toto ke ini oro, Mme Ntiense ẹmebọp ufọkmbono en̄wen kpa ye oro ẹsụk ẹbiọn̄ọde mmọ, ndien ibat mmọ aka iso ndikọkọri tutu esịm owo 50 oro ẹsịnde ifịk ẹtan̄a eti mbụk. Ndusụk mbon oro ẹkebiọn̄ọde utom Mme Ntiense, mmọ ke idemmọ ẹdidi mbon oro ẹsịnde ifịk ẹnam utom oro.

Idahaemi, mbio obio oro ẹsiwak ndidara Mme Ntiense Jehovah, emi ẹsidade Bible ẹkpep mmọ n̄kpọ. Okposụkedi emi ibat ibat owo ke obio oro ẹkemede ndikot n̄wed, ata ediwak Mme Ntiense ẹmekpep ndikot n̄wed man ẹkpekeme nditan̄a etop Bible nnọ mme owo. Mme owo oro ẹsidụkde mbono esop ke Ufọkmbono Obio Ubọn̄ kpukpru urua ẹsiyọhọ owo 200.

Ikan̄ ilektrik idụhe. Kpukpru nnyịn imesitie ikanade ikan̄ ke ufọk utemudia ke mbubreyo. Imesitie ọtọkiet idia udia, ineme nneme, inyụn̄ isak imam. Inua imam nditọete nnyịn oro ayamade ke un̄wana ikan̄ oro owụt idatesịt oro mmọ ẹkopde ndinam n̄kpọ Abasi. Ekem, nte eyo ọtọn̄ọde ndisọn̄, ndusụk mmọ ẹsio ndak ikan̄, emi mmọ ẹyomde asak sụn̄sụn̄ nte mmọ ẹfehede ke afan̄ikọt ẹnyọn̄ọ ufọk mmọ.

Imokụt nte edem emi odobode nte isan̄ade inyọn̄ ufọk. N̄kpọ-obot ẹyọyọhọ mi. Mbemiso idede okoneyo emi, nnyịn ifiak ise nnyayama ikpaenyọn̄, idem onyụn̄ akpa nnyịn aban̄a adan̄a ediwak ntantaọfiọn̄ oro ikemede ndida ke obot emi n̄kụt.

Urua kiet ebe iwiwa nnyịn inyụn̄ ibet ubomofụm oro afiak edi n̄kpọn̄. Iyafiak ina okoneyo kiet en̄wen ke mbịtmbịt edikon̄ obot ke Lengbati, ndien ekem ifiak inyọn̄ ufiop ufiop mbeninyan̄.