Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-02-01

 Mbụme Oro Mme Andikot Ẹbụpde . . .

Ndi Ana Owo Enịm Abasi-Ita-ke-Kiet man Edi Christian?

Ndi Ana Owo Enịm Abasi-Ita-ke-Kiet man Edi Christian?

N̄wed ufọkn̄wed sekọndri oro ẹkesiode ke 2007, emi ẹkotde World Religions in Denmark, ọdọhọ ke Mme Ntiense Jehovah ẹdi ekpri otu mme Christian emi ẹtienede Bible ketket. Ke nditịm ntịn̄, Mme Ntiense Jehovah ẹdi ọyọhọ ita ke otu Ido Ukpono Christ oro ẹwakde ẹkan ke Denmark.

Edi bishop Ufọkabasi Ofụri Idụt Denmark ama enen̄ede asua ọnọ ewet n̄wed emi ke ntak emi eketienede asiak Mme Ntiense ke n̄wed oro. Ntak-a? Bishop oro ọkọdọhọ ete: “N̄kwe kan̄a ekpep ukpepn̄kpọ ido ukpono emi adade [Mme Ntiense Jehovah] nte mme Christian. Mmọ inịmke Abasi-Ita-ke-Kiet, emi edide akpan ukpepn̄kpọ Ido Ukpono Christ.”

Annika Hvithamar, andiwet n̄wed oro, emi esikpepde n̄kpọ aban̄a ido ukpono, ọkọdọhọ ke ini ẹbụpde mme owo ntak emi mmọ ẹdọhọde ke mmimọ idi Christian, ke akananam mmọ idọhọke ke edi ke ntak emi mmimọ inịmde ke Abasi edi Ita-ke-Kiet. Akan oro, ikpehe kiet ke n̄wed oro, emi ibuotikọ edide, “Ndi Afo Edi Christian?” ọdọhọ ete: “Ukpepn̄kpọ Abasi-Ita-ke-Kiet edi kiet ke otu ukpepn̄kpọ Ido Ukpono Christ oro ẹsọn̄de ẹkan.” Enye adian do ete: “Ọsọsọn̄ kpukpru ini ndinam an̄wan̄a owo oro mîkaha ufọkn̄wed ukpepn̄kpọ ido ukpono ntak emi Abasi mme Christian osụk edide abasi kiet idịghe abasi ita.”

“Ukpepn̄kpọ Abasi-Ita-ke-Kiet edi kiet ke otu ukpepn̄kpọ Ido Ukpono Christ oro ẹsọn̄de ẹkan”

Se Bible ekpepde aban̄a Abasi ye Jesus emem onyụn̄ an̄wan̄a owo. Enye isọn̄ke ndifiọk. Ikọ oro “Abasi-Ita-ke-Kiet” m̀mê ukpepn̄kpọ oro idụhe ke Ikọ Abasi. Bible etịn̄ in̄wan̄-in̄wan̄ ke Jesus Christ edi akpan Abasi. (Colossae 1:15) Onyụn̄ ọdọhọ ke Jesus edi ‘esịne-ufọt ke ufọt Abasi ye mme owo.’ (1 Timothy 2:5) Amaedi Ete, Bible ọdọhọ ete: “Afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”—Psalm 83:18.

Mme Ntiense Jehovah ẹnịm ke ana owo ọbuọt idem ye Jesus. (John 3:16) Ntak edi oro mmọ ẹdade ewụhọ Jesus emi ke akpan n̄kpọ: “Ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’” (Matthew 4:10) Ke akpanikọ, ẹkeme ndikot owo oro odomode ndinam mme ewụhọ Jesus, Christian.