Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2010-02-01

  Ukpọhọde Inemesịt Ubon

Nte Akpanamde N̄kpọ ye Mme Ukot Fo

Nte Akpanamde N̄kpọ ye Mme Ukot Fo

Jenny * ọdọhọ ete: Eka ebe mi ikesimen̄eke ndisio ntịn̄ ini ekededi oro n̄kpọ etịbede ke imọ imaha mi. Ete ye eka mi ẹkesinyụn̄ ẹnam ntre ye ebe mi. Ke nditịm ntịn̄, akananam n̄kwe mmọ ẹdiọkde ye owo en̄wen ntre! Ndika n̄kese ete ye eka nnyịn ekedi afanikọn̄.

Ryan ọdọhọ ete: Akananam eka mi ikereke ke owo ekededi ọfọn ekem se nditọ imọ ẹdọde, ke ntre enye ikamaha n̄wan mi toto ke ntọn̄ọ. Ete ye eka an̄wan mi ẹkenyụn̄ ẹda mi ntre n̄ko—ẹte ke ndotke ye eyen mmimọ. Se ikam idide mfịna edi ke ami ye n̄wan mi imesidomo ndida ye ete ye eka nnyịn; nnyụn̄ ndọhọ ke n̄wan mi edi ntak, n̄wan mi ete ke ami n̄kam ndi ntak.

MME anam idọkọ ẹkeme ndida nsịn̄ede ke ufọt n̄wan ye ebe ye mme ukot mmọ nnam idọkọ, edi n̄kpọ emi idịghe n̄kpọ mbubru. Reena, n̄wanndọ ke India, ọdọhọ ete: “Eka ebe mi ama ọnọhọ ke ndọ nnyịn ke ediwak isua. N̄kesiwak ndiyat esịt ye ebe mi sia mmen̄kekemeke ndiyat esịt ye eka ebe mi. Kpukpru ini etie nte enye ekesikere m̀mê ikpada ye eka imọ m̀mê ikpada ye ami.”

Ntak emi ndusụk ukot ẹsinọhọde ke mbubehe nditọ mmọ oro ẹma ẹkedọ ndọ? Jenny oro iketịn̄de iban̄a ke ntọn̄ọ ibuotikọ emi ọnọ ekikere aban̄a n̄kpọ kiet oro ekemede ndidi ntak. Enye ọdọhọ ete: “Ekeme ndisọn̄ mmọ ndinyịme ke uyen oro mînyeneke mbufiọk ekeme ndise mban̄a eyen mmimọ.” Dilip ebe Reena adian do ete: “Ete ye eka emi ẹkebiatde okụk ye ini ẹbọk eyen mmọ ẹkeme ndikere ke ẹtop mmimọ ẹduọk. Mmọ ẹkeme n̄ko nditịmede esịt ke eyen mmimọ inyeneke mbufiọk ndidọ ndọ.”

Edi, ndusụk ini, ebe ye n̄wan ẹsikot mme ukot mmọ ẹdisịn ke mbubehe ufọk mmọ. Ke uwụtn̄kpọ, kere ban̄a Michael ye Leanne, ebe ye n̄wan ke Australia. Michael ọdọhọ ete: “Ubon mme Leanne ẹnen̄ede ẹdiana kiet, kpukpru owo ẹsinyụn̄ ẹtịn̄ ikọ ifụre ifụre. Ntre, ke ima ikọdọ ndọ, enye ama esibụp ete esie mme n̄kpọ oro nnyịn mbiba ikpebierede. Ete esie enen̄ede enyene mbufiọk, onyụn̄ esinọ enye nti item, edi ama esibiak mi-e ke  enye ekesibụp ete esie n̄kpọ utu ke ndibụp mi!”

Ke akpanikọ, mme n̄kpọ oro ẹban̄ade mme ukot ẹkeme ndisịn̄ede ndọ. Ndi se iwọrọde fi edi oro? Afo odu uwem didie ye ete ye eka nsan̄a fo, nsan̄a fo onyụn̄ odu uwem didie ye ete ye eka fo? Kere ban̄a mfịna iba oro ẹkemede ndidu ye se ekemede ndinam.

AKPA MFỊNA:

Etie fi nte nsan̄a fo imaha ndidian̄ade n̄kpọn̄ ete ye eka. Luis emi edide ebe ke Spain ọdọhọ ete: “N̄wan mi ekekere ke edieke nnyịn mîdụn̄ke ikpere ete ye eka imọ ke ọwọrọ ke imọ imakan̄ mmọ.” Juan adian do ete: “Edi ke ini akpan nnyịn akamanade, ekpere ndidi ete ye eka mi ẹkesidi ufọk nnyịn kpukpru usen, ndien emi ama esinam n̄wan mi akpa mba. Emi ama esinam itọhọ.”

Se idude:

Bible ọdọhọ ke ‘owo ọyọkpọn̄ ete esie ye eka esie, onyụn̄ adiana ye n̄wan esiemmọ; ndien mmọ ẹyekabade obụk kiet.’ (Genesis 2:24) Ndidi “obụk kiet” idịghe ikpîkpu edidụn̄ ọtọkiet. Enen̄ede ọwọrọ ke ebe ye n̄wan emi ẹtọn̄ọ obufa ubon—ndien ubon enye emi edi akpan ubon mmọ. (1 Corinth 11:3) Edi akpanikọ ke ebe ye n̄wan ẹnyene ndisụk n̄kpokpono mme ete ye eka mmọ, ndien ediwak ini, emi esiwọrọ ke ana mmọ ẹse ẹban̄a mmọ. (Ephesus 6:2) Edi nso ke akpanam edieke nte nsan̄a fo esede aban̄a ete ye eka esiemmọ anamde etie nte ke enye isehe aba iban̄a fi?

Se ekemede ndinam:

Da in̄wan̄-in̄wan̄ esịt se n̄kpọ emi. Ndi enen̄ede edi akpanikọ ke nsan̄a fo imaha ndidian̄ade n̄kpọn̄ ete ye eka esie, mîdịghe okûdi sia afo mûkpereke ete ye eka fo nte enye ekperede esiemmọ? Edieke edide ntre, nso ebuana ke nte ẹkebọkde fi enyene ndinam ye nte afo esede n̄kpọ emi? Okûdi ufụp anam fi ese n̄kpọ emi ntre?—Mme N̄ke 14:30; 1 Corinth 13:4; Galatia 5:26.

Edikeme ndibọrọ mme mbụme emi edieke adade in̄wan̄-in̄wan̄ esịt odụn̄ọde idemfo. Edi ọfọn anam ntre. Idem n̄kpọ, edieke mme ukot mbufo ẹsiwakde ndinam mbufo ẹtọhọ, ọwọrọ ke ndọ mbufo enyene mfịna—idịghe mme ukot ẹdi mfịna.

Ediwak mfịna ẹsidu ke ndọ ke ntak emi owo iba mîsehe n̄kpọ ukem ukem. Ndi emekeme ndidomo ndise n̄kpọ nte nsan̄a fo esede? (Philippi 2:4; 4:5) Se ebe emi ekerede Adrián ke Mexico akanamde edi oro. Enye ọdọhọ ete: “N̄wan mi itoho eti ufọk, ntre n̄kenen̄ekede n̄kpere mme ukot mi. Ekem, n̄kenyeneke baba n̄kpọ kiet ndinam ye mmọ—ke ediwak isua. Emi ama esịn mfịna ke ndọ nnyịn sia n̄wan mi okosụk oyoyom ndikpere ubon esie idem, akpan akpan eka esie.”

Nte ini akakade, Adrián ama edida in̄wan̄-in̄wan̄ esịt ese n̄kpọ emi. Enye ọdọhọ ete: “Okposụkedi emi mfiọkde ke an̄wan mi ndikpere ete ye eka esie esifịna enye, ndinyụn̄ ntre ofụri ofụri ndinam n̄kpọ ye mmọ edi mfịna n̄ko. Mmekpere ete ye eka n̄wan mi idem nte n̄kemede.” *

NAM EMI ISE: Afo ye nsan̄a fo ẹwet se ẹkerede ke edi akpan n̄kpọ emi ebehede mme ete ye eka mbufo. Edieke ẹkemede, ẹtọn̄ọ ntem, “Etie nte . . .” Ekem yak okwo nọ nsan̄a fo nyụn̄ bọ esiemmọ. Ẹdiana kiet ẹyom mme usụn̄ oro ẹkemede ndikọk mme mfịna owo enye eken.

UDIANA MFỊNA:

Mme ukot mbufo ẹwak ndinọhọ ke ndọ mbufo ẹnyụn̄ ẹnọ item ke ini mbufo mîdọhọke mmọ ẹnọ. N̄wan kiet ke Kazakhstan emi ekerede Nelya ọdọhọ ete: “Ikodụn̄ ke ufọk mme ebe mi isua itiaba tọn̄ọ ikọdọ ndọ. Utọk ama esisiaha kpukpru ini  kaban̄a nte ibọkde nditọ nnyịn, ọkọrọ ye nte ntemde udia nnyụn̄ n̄kamade ufọk. Mma nsineme n̄kpọ emi ye ebe mi ye eka ebe mi, edi emi akakam ananam utọk ọdọdiọn̄ ọsọn̄!”

Se idude:

Ama ọdọ ndọ udụhe aba ke idak ete ye eka fo. Edi, Bible ọdọhọ ke “Christ edi ibuot ọnọ kpukpru irenowo; erenowo [oro edi, ebe] onyụn̄ edi ibuot ọnọ n̄wan.” (1 Corinth 11:3) Kpa ye oro, nte ima iketetịn̄, ebe ye n̄wan ẹnyene ndisụk n̄kpokpono ete ye eka mmọ. Ke nditịm ntịn̄, Mme N̄ke 23:22 ọdọhọ ete: “Kop uyo usọ emi okobonde fi: kûnyụn̄ usịn uka ke ndek, koro enye ọsọn̄de.” Edi nso ke akpanam edieke ete ye eka fo—m̀mê ete ye eka nsan̄a fo—ẹsidomode ndinyịk mbufo ẹnam ekikere mmimọ?

Se ekemede ndinam:

Domo ndise n̄kpọ emi nte mme ukot fo ẹsede nyụn̄ domo ndikụt se inamde mmọ ẹnam n̄kpọ oro etiede nte ke ẹnọhọ ke mbubehe mbufo. Ryan oro iketịn̄de iban̄a ke ntọn̄ọ ọdọhọ ete: “Ke ndusụk idaha, oyom ete ye eka ẹfiọk ke mmimọ isụk idi akpan owo inọ nditọ mmimọ.” Idịghe nte ke mmọ ẹsikokoi ẹnọhọ ke mbubehe nditọ mmọ, ndien ẹkeme ndikọk mfịna emi ke ndinam item Bible emi ọdọhọde “ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye kiet eken.” (Colossae 3:13) Edi nso ke akpanam edieke mme ukot mbufo ẹnọhọde tutu anam fi ọtọhọ ye nsan̄a fo?

Ndusụk ebe ye n̄wan ẹsian mme ukot mmọ adan̄a nte ẹkpenọhọde ke ndọ mmimọ. Emi iwọrọke ke ana ọnọ mmọ ibet. * Ediwak ini, nte afo anamde n̄kpọ ye nsan̄a fo owụt ke nsan̄a fo edi akpan owo ọnọ fi. Ke uwụtn̄kpọ, ebe kiet emi ekerede Masayuki ke Japan ọdọhọ ete: “Idem edieke ete ye eka fo ẹnọde ekikere, kûnyịme iwiwa. Ẹti ẹte ke ẹmetọn̄ọ obufa ubon. Bụp nsan̄a fo kan̄a m̀mê enye ese item oro didie.”

NAM EMI ISE: Neme mme akpan usụn̄ emi mme ete ye eka mbufo ndinọhọ ke ndọ mbufo anamde mbufo ẹtọhọ. Ẹdiana kiet ẹwet adan̄a nte mme ete ye eka mbufo ẹkpenọhọde ke ndọ mbufo ye nte mbufo ẹdinamde se ẹwetde edi ẹsụk ẹkpono mmọ.

Emekeme ndisụhọde mfịna oro enyenede ye mme ukot edieke odomode ndifiọk ntak emi mmọ ẹnamde se ẹnamde, unyụn̄ uyakke oro anam fi ọtọhọ ye nsan̄a fo. Jenny etịn̄ ntem aban̄a emi: “Ndusụk ini, nneme oro ami ye ebe mi ikesinemede iban̄a ete ye eka nnyịn ekesitie ikọ ikọ, ima inyụn̄ inen̄ede ikụt ke ndisitịn̄ mban̄a ndudue ete ye eka nnyịn esida mfịna edi. Edi nte ini akakade, ima idifiọk ke ifọnke isida ndudue mme ete ye eka nnyịn itop ekọn̄, edi ke oyom ikọk mfịna oro inyenede. Emi amanam ami ye ebe mi inen̄ede idiana kiet.”

^ ikp. eki. 3 Ẹkpụhọ mme enyịn̄

^ ikp. eki. 14 Edieke ete ye eka owo ẹnamde obukpo ido—akpan akpan edieke mmọ mîkabakede esịt itre edinam oro—ekeme ndidot ẹtre ndikpere mmọ idem.—1 Corinth 5:11.

^ ikp. eki. 19 Ke ndusụk idaha, ekeme ndiyom enyene nneme ofụri esịt ye ete ye eka fo m̀mê ete ye eka nsan̄a fo. Edieke edide ntre, nam oro ukpono ukpono ye ke nsụhọdeidem.—Mme N̄ke 15:1; Ephesus 4:2; Colossae 3:12.

BỤP IDEMFO ETE . . .

  • Nso nti edu ke ete ye eka nsan̄a mi ẹnyene?
  • Didie ke n̄keme ndikpono ete ye eka mi edi mfụmike nsan̄a mi?

 

Kpep N̄kpọ En̄wen

Nte Ẹkemede Ndiyọ Akpa Isua Ndọ

Nte afo ọdọ ndọ obufa obufa? Bible ekeme ndin̄wam fi anam ndọ fo ọfọn onyụn̄ enem.