Be ka se isịnede

Be ka udiana n̄kpọ

Mme Ntiense Jehovah

Efịk

Enyọn̄-Ukpeme  |  2009-12-01

 Kpep Nditọ Fo

Jeremiah Iketreke Ndinam N̄kpọ Jehovah

Jeremiah Iketreke Ndinam N̄kpọ Jehovah

NDI akanam amakpa mba onyụn̄ etie fi nte ke akpana etre ndinam n̄kpọ Jehovah?— * Etie ediwak owo ntre. Ama etie ekpri Jeremiah ntre. Edi enye ikayakke se mbon en̄wen ẹketịn̄de m̀mê ẹnamde anam enye etre ndinam n̄kpọ Jehovah. Ẹyak ineme nte Jeremiah ekedide ata edima ufan Abasi, kpa ye oro eketiede enye nte ke akpana etre ndinam n̄kpọ Abasi.

Mbemiso Jeremiah akamanade, ata Abasi, kpa Jehovah, ama emek enye prọfet man odụri mme owo utọn̄ ete ke mmọ ikanamke se inemde Abasi esịt. Ndi ọmọfiọk se Jeremiah ọkọdọhọde Jehovah ke ediwak isua ẹma ẹkebe?— “Mfiọkke nditịn̄ ikọ: koro ami ndide eyen-ọwọn̄.”

Afo ekere ke Jehovah ọkọbọrọ Jeremiah didie?— Enye ọkọdọhọ ke inem inem usụn̄ oro enyenede iwụk ete: ‘Kûdọhọ ete, “Ami ndi eyen-ọwọn̄:” koro afo ayasan̄a kpukpru utom eke ndidọn̄de fi, oyonyụn̄ etịn̄ kpukpru se ndiwụkde fi. Kûfehe iso mmọ.’ Ntak-a? Jehovah ọkọdọhọ ete: “Ami [do] ye afo ndinyan̄a fi.”—Jeremiah 1:4-8.

Kpa ye oro, nte iketịn̄de, ama etie Jeremiah nte ke akpana enye etre ndinam n̄kpọ Abasi. Emi edi koro ẹma ẹsisak enye ke ntak emi enye akanamde n̄kpọ Abasi. Enye ọkọdọhọ ete, ‘Kpukpru owo ẹsak mi ẹnyụn̄ ẹda mi ẹnam mbubru.’ Ntre enye ama ọdọhọ ke imọ idinamke aba. Enye ọkọdọhọ ete: “Ndisiakke aba [Jehovah], ndinyụn̄ ndọhọke aba ke enyịn̄ esie.” Edi ndi enye ama enen̄ede etre?

Jeremiah ọkọdọhọ ete, ‘Ndien ikọ Jehovah odu mi ke esịt nte ikan̄ eke asakde, esịne mi ke ọkpọ, ndien n̄n̄wana ndimụm idemmi n̄kama, tutu akak.’ (Jeremiah 20:7-9) Okposụkedi emi Jeremiah okokopde ndịk ndusụk ini, ima emi enye akamade Jehovah ikayakke enye etre ndinam n̄kpọ Esie. Ẹyak ise nte ẹkekpemede Jeremiah ke ntak emi enye mîketreke ndinam n̄kpọ Abasi.

Jehovah ọkọdọhọ Jeremiah aka akasian mme owo ke ẹyesobo Jerusalem edieke mmọ mîkpọn̄ke idiọkido mmọ. Ke ini Jeremiah akasiande mmọ, mmọ  ẹma ẹyat esịt ẹdọhọ ẹte: “Owo emi emedue isop n̄kpa.” Edi Jeremiah ekpe mmọ ubọk ete “ẹkop uyo Jehovah.” Ekem enye ọdọhọ mmọ ete: ‘Edi mbufo ẹtịm ẹfiọk, ẹte ke edieke mbufo ẹwotde mi, ke mbufo ẹwot owo eke mîduehe, koro Abasi ọdọn̄ mi ete ntịn̄ ikọ emi nnọ mbufo.’ Ndi ọmọfiọk se iketịbede?—

Bible ọdọhọ ete: “Ndien mbọn̄ oro ye kpukpru mbio-obio ẹdọhọ mme oku ye mme prophet, ẹte, Owo emi iduehe isop n̄kpa: koro enye ọdọhọde ye nnyịn ke enyịn̄ Abasi nnyịn.” Ntre, sia Jeremiah mîkayakke ndịk anam enye etre ndinam n̄kpọ Abasi, Jehovah ama ekpeme enye. Edi ẹyak ise se iketịbede inọ Urijah, prọfet Jehovah en̄wen, emi mîkanamke n̄kpọ nte Jeremiah.

Bible ọdọhọ ete: ‘Urijah etịn̄ prophecy aban̄a Jerusalem, asan̄a ke kpukpru ikọ Jeremiah.’ Edi ndi ọmọfiọk se Urijah akanamde ke ini Edidem Jehoiakim akayatde esịt ye enye?— Enye ama okop ndịk, etre ndinam uduak Abasi, onyụn̄ efehe aka Egypt. Ntre edidem ama ọdọn̄ mme owo ẹka ẹkeyom enye do ẹda ẹdi. Ndi ọmọfiọk se idiọk edidem oro akanamde ke ini ẹkedade Urijah ẹnyọn̄ ẹdi?— Enye ama owot Urijah ke ofụt!—Jeremiah 26:8-24.

Afo ekere ke nso ikanam Jehovah ekpeme Jeremiah, edi ikpemeke Urijah?— Ọfọn, ekeme ndidi Jeremiah ama okop ndịk nte emi Urijah okokopde, edi Jeremiah iketreke ndinam n̄kpọ Jehovah inyụn̄ ifehe. Ih, enye iketreke ndinam n̄kpọ Abasi! Afo ekere ke nso ke ikeme ndikpep nto Jeremiah?— Nte ke ekeme ndisọn̄ nnyịn ndusụk ini ndinam se Abasi ọdọhọde, edi ikpenyene ndibuọt idem ye enye inyụn̄ ikop uyo esie.

^ ikp. eki. 3 Edieke okotde ibuotikọ emi ye nditọwọn̄, n̄kpri udịm oro ẹdụride ẹwụt ke ana ebet onyụn̄ obụp mmọ mbụme oro.