Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2009-08-01

 Kpep Nditọ Fo

Rahab Ama Okop Eti Mbụk

Rahab Ama Okop Eti Mbụk

ẸYAK idọhọ ke idu uwem n̄kpọ nte isua 3,500 emi ẹkebede. Ke idụn̄ ke Jericho ke Canaan. Ekpri eyenan̄wan emi ekerede Rahab onyụn̄ odụn̄ ke obio emi n̄ko. Enye akamana ke Moses ama akada nditọ Israel ọwọrọ ke ufụn Egypt onyụn̄ abahade Ididuot Inyan̄ man nditọ Israel ẹsan̄a ke nsat isọn̄ ẹbe. Kpa ye oro n̄kpọ emi eketịbede ke ebiet emi mîkpereke-kpere Jericho emi Rahab odụn̄de, n̄ko ekebe ndise, ekebe ukopikọ, m̀mê Intanet ikodụhe ini oro, edi Rahab ama okop utịben̄kpọ emi. Ndi ọmọfiọk nte enye akasan̄ade okop mbụk emi?— *

Mme akaisan̄ ẹma ẹsitịn̄ ẹban̄a utịben̄kpọ oro. Nte Rahab okokponde, enye okosụk eteti se Jehovah akanamde ọnọ ikọt esie. Enye esikop mme utịbe utịbe mbụk aban̄a nditọ Israel. Ke ẹma ẹkesan̄a ke wilderness ke isua 40, nditọ Israel ẹdisịm Canaan. Ndien Abasi esinam nditọ Israel ẹkan mme asua ke ekọn̄. Idahaemi Rahab okop ke nditọ Israel ẹdisịm Akpa Jordan emi ekperede Jericho.

Mbubreyo kiet, isenowo iba ẹwaha ufọk Rahab, sia ẹfiọkde ke isenowo ẹsidụn̄ ke ufọk esie. Enye ama adara onyụn̄ ọnọ mmọ itie. Ke eyo ama okokụt, mme owo ẹketịn̄ ẹnọ edidem Jericho ke nditọ Israel ẹdi ndiyep Jericho, ndien ke mmọ ẹdu ke ufọk Rahab. Ntem, edidem osio mme isụn̄utom ọdọn̄ ete ẹkedọhọ Rahab osio mbon uyep oro edi. Ndi ọmọfiọk ke Rahab ama ọdiọn̄ọ orụk owo emi isenowo imọ ẹdide, ntre nso ke enye akanam?—

Mbemiso mme isụn̄utom edidem ẹsịmde ufọk Rahab, enye ama ọfiọk ke isenowo oro ẹkedi mbon uyep emi ẹtode Israel. Ntem, enye edịp mmọ ke ọkọm, onyụn̄ ọdọhọ mme isụn̄utom edidem ete: “Edi ntre, mmọ oro ẹkedi ke ebiet mi . . . ndien mmọ ẹwọrọ adan̄aemi ẹyomde ndisịn usụn̄ obio, ke ini eyo ebrede.” Rahab ọdọhọ mmọ ete: “Mbufo ẹsọp ẹbịne mmọ.”

Afo ekere ke nso ikanam Rahab edịp mbon uyep oro?— Se enye eketịn̄de ọnọ mbon uyep emi anam ifiọk ntak emi enye ekedịpde mmọ, enye ọkọdọhọ mmọ nte: “Mmọfiọk nte Jehovah ada isọn̄ emi ọnọ mbufo . . . Koro nnyịn imokop nte Jehovah akanamde mmọn̄ Ididuot Inyan̄ asat ke iso mbufo, ke ini mbufo ẹketode  ke Egypt ẹwọn̄ọ.” Enye ama esikop n̄ko aban̄a nte Abasi ekesinamde nditọ Israel ẹkan mme asua ke ekọn̄.

Mme Hebrew 11:31 owụt ke Jehovah ama enen̄ede okop inemesịt ke Rahab ndikedịp mbon uyep oro. Jehovah ama enem esịt n̄ko ke ini Rahab ekeben̄ede mbon uyep oro ete: ‘Sia mfọnde mfọn ye mbufo, mbọk ẹn̄wọn̄ọ ẹnọ mi ẹte, ke ẹyenịm ete mi, ye eka mi, ye nditọeka mi iban, ye nditọeka mi iren uwem ke ini ẹdidide ẹdisobo Jericho.’ Mmọ ẹdọhọ ke iyanam oro edieke Rahab edinamde se mmimọ idọhọde. Ndi ọmọfiọk se mmọ ẹkedọhọde enye anam?—

Mmọ ẹkedọhọ enye ete: ‘Da ididuot urụk emi tebe ke window fo, nyụn̄ nam kpukpru mbonubon mbufo ẹbono ye afo ke ufọk emi. Edieke afo anamde emi, kpukpru mbufo ẹyebọhọ.’ Rahab ama anam kpukpru se mbon uyep oro ẹkedọhọde enye. Ndi ọmọfiọk se iketịbede?—

Nditọ Israel ẹdisịm ibibene Jericho. Mmọ ẹdodop uyo ẹsan̄a ẹkanade ibibene oro ini kiet ke usen, ke usen itiokiet. Ke ọyọhọ usen itiaba mmọ ẹsan̄a ẹkanade ibibene oro utịm ikatiaba ẹnyụn̄ ẹfiori n̄kpo. Ibibene ọduọ—ke mîbọhọke ebiet emi ẹketebede ididuot urụk oro. Ẹma ẹnyan̄a Rahab ye mbonubon esie.—Joshua 2:1-24; 6:1-5, 14, 15, 20-25.

Nso ke nnyịn ikpep ito Rahab?— Enye ama okop se Abasi akanamde ọnọ ikọt esie, onyụn̄ an̄wam mmọ ke ini mmọ ẹkeyomde un̄wam. Enye ama ebiere ndidiana kiet ye ikọt Jehovah nnam n̄kpọ Jehovah. Ndi afo ayanam oro?— Abasi akpakam an̄wam fi anam ntre.

^ ikp. eki. 3 Edieke okotde ibuotikọ emi ye nditọwọn̄, n̄kpri udịm oro ẹdụride ẹwụt ke ana ebet onyụn̄ obụp mmọ mbụme oro.