Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2009-08-01

Ndi Kpukpru Ido Ukpono Ẹfọn?

Ndi Kpukpru Ido Ukpono Ẹfọn?

IDO ukpono ẹbiet ntan ke ererimbot emi. Ndụn̄ọde oro ẹkenamde ndondo emi owụt ke ikpọ ido ukpono 19 ye n̄kpọ nte n̄kpri ido ukpono 10,000 ẹdu ke ofụri ererimbot. Oro anam ido ukpono edidi sat eke ama. Sia edide ntre, ndi akpana aka eke onyụn̄ amade-ma?

Ndusụk owo ẹdọhọ ke nsio nsio ido ukpono emi onyụn̄ etie nte nsio nsio usụn̄ oro adade owo aka ebiet kiet. Mmọ ẹkere ke owo ekeme ndisan̄a ebiet enye amade-ma sia kpukpru usụn̄ emi adade owo aka ebiet kiet. Mmọ n̄ko ẹkere ke sia edide Ata Ọkpọsọn̄ Abasi kiet kpọt odu, ntre ke anaedi kpukpru ido ukpono ẹtuak ibuot ẹnọ enye.

Ndi Kpukpru Ido Ukpono Ẹtuak Ibuot Ẹnọ Abasi?

Nso ke Jesus Christ, emi edide n̄wọrọnda adaiso ido ukpono oro ẹnen̄erede ẹkpono eketịn̄ aban̄a emi? Enye ọkọdọhọ mme mbet esie ete: “Ẹbe ke mfafaha inua-otop ẹdụk: koro inua-otop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.”—Matthew 7:13, 14, Edisana Ŋwed Abasi Ibom.

Ndi ikọ Jesus ọkọwọrọ ke ndusụk ido ukpono ẹda owo ‘ẹka nsobo’? Mîdịghe, ndi enye ọkọdọhọ ke mbon oro mînịmke Abasi ke akpanikọ kpọt ẹdu ke ntatara usụn̄, ke ini kpukpru mbon oro ẹnịmde Abasi ke akpanikọ ẹdude ke mfafaha usụn̄—inamke n̄kpọ m̀mê ewe ido ukpono ke mmọ ẹka?

Ke Jesus ama ọkọdọhọ ke usụn̄ iba kpọt ẹdu, enye ama ọdọhọ n̄ko ete: “Ẹkpeme idem ẹbak prophet abian̄a emi ẹfọrọde ikpa erọn̄ ẹdi ke ọtọ mbufo, kpa ke ini mmọ ẹdide anawụri-ekpe ke esịt mmọ.” (Matthew 7:15, Edisana Ŋwed Abasi Ibom) Ekem enye ama adian do ete: “Idịghe kpukpru owo emi ẹkotde Mi ete, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven.” (Matthew 7:21, Edisana Ŋwed Abasi Ibom) Edieke owo ọdọhọde ke idi prọfet, m̀mê edieke enye ọdọhọde ke Jesus edi “Ọbọn̄”  imọ, imekeme ndidọhọ ke enye enịm Abasi ke akpanikọ, onyụn̄ enyene ido ukpono emi enye esikade. Edi Jesus ọkọdọhọ ke idịghe kpukpru ido ukpono ẹfọn, inyụn̄ idịghe kpukpru mme andikpep ke ido ukpono ẹkpep akpanikọ.

Ndi Owo Ekeme Ndifiọk Mfafaha Usụn̄ Emi?

Bible etie nte n̄wed usụn̄isan̄ oro ẹkemede ndiberi edem emi ekemede ndin̄wam owo ọfiọk nnennen ido ukpono

Sia mîdịghe kpukpru ido ukpono ẹtuak ibuot ẹnọ Abasi, idinam didie ifiọk mfafaha usụn̄ oro adade owo esịm uwem ke otu ediwak tọsịn ido ukpono oro ẹdude mfịn? Ke uwụtn̄kpọ, yak idọhọ ke omosop usụn̄ ke akamba obio, onyụn̄ obụp owo usụn̄ oro okpodụkde. Akpa owo oro ekerede ke imọdiọn̄ọ usụn̄ ọdọhọ fi aka ufien. Ọyọhọ owo iba ọdọhọ aka nnasia. Ekem owo en̄wen ọdọhọ odụk ekededi oro amade akan ke otu usụn̄ iba oro. Edi owo emi asan̄ade ye afo osio n̄wed usụn̄isan̄ oro ẹkemede ndiberi edem edi onyụn̄ owụt fi nnennen usụn̄ oro okpodụkde. Ekem enye ayak n̄wed oro ọnọ fi ete akama ese nte osụk akade ke usụn̄. Ndi ukereke ke eyesịm ebiet oro akade?

Ukem ntre, man ifiọk nnennen ido ukpono oro ikpodụkde, oyom inyene n̄wed usụn̄isan̄ oro ẹkemede ndiberi edem. Nte utọ n̄wed oro odu? Ih, mmọdo! Enye edi Bible. Bible ke idemesie ọdọhọ ete: “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido.”—2 Timothy 3:16, Edisana Ŋwed Abasi Ibom.

Ekeme ndidi emenyene Bible ke usem mbufo, emi ekemede ndida nte n̄wed usụn̄isan̄ oro edin̄wamde fi okpono Abasi ke nnennen usụn̄. Mme Ntiense Jehovah oro ẹwetde magazine emi osụk okotde mi, ẹkabade Bible oro ẹkemede ndiberi edem. Ẹkot enye New World Translation of the Holy Scriptures. Edi edieke afo mûdịghe kiet ke otu Mme Ntiense Jehovah, da Bible kiet ekededi oro amade kpep man ọfiọk ido ukpono oro Abasi amade ye enye oro enye mîmaha. Mmọdo, ọtọn̄ọde ke akpa tutu esịm ọyọhọ ibuot inan̄ ke magazine, oyokụt ke iwak ndikot nto Edisana Ŋwed Abasi Ibom emi mme aka nsio nsio ufọkabasi ẹnen̄erede ẹma.

Nte osụk okotde mme ibuotikọ oro ẹtienede mi, men se ọfiọkde domo ye se Bible ekpepde. Ti ikọ Jesus oro aban̄ade nte ikemede ndifiọk ido ukpono oro Abasi enyịmede ye enye oro enye mînyịmeke. Enye ọkọdọhọ ete: “Eti eto ẹn̄wụm eti mfri; edi mbiara eto on̄wụm idiọk mfri. Eti eto ikemede ndin̄wụm idiọk mfri, mbiara eto inyụn̄ ikemeke ndin̄wụm eti mfri.” (Matthew 7:17, 18, Edisana Ŋwed Abasi Ibom) Ẹyak ikere iban̄a ita ke otu nti mfri oro Bible ọdọhọde ke ẹkeme ndida mfiọk “eti eto.”