Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2009-08-01

Eti Ido Ukpono Ekpep Mme Owo Ndidu Eti Uwem

Eti Ido Ukpono Ekpep Mme Owo Ndidu Eti Uwem

ETI ido ukpono ekpep nnyịn ndikere n̄kpọ nnyụn̄ ndu uwem nte ọfọnde. Enye esịn udọn̄ ọnọ nnyịn in̄wana ndinam se inende inyụn̄ idomo nte ikekeme ndidu eti uwem. Nnyịn isan̄a didie ifiọk ke eti ido ukpono ekeme ndinam emi?

Kere ban̄a se apostle Paul ekewetde ọnọ ẹsọk mme Christian ke Corinth ke n̄kpọ nte tọsịn isua iba emi ẹkebede. Ẹkediọn̄ọ mbon Corinth nte mme oburobụt owo. Paul ọkọdọhọ mmọ ke “mbon-use, ye mme okpono-ndem, ye mme esịn-efịbe, ye mmọ eke ẹbietde iban, ye mmọ eke ẹsabarede idem, ye mme inọ, ye mme esịn esịt ke n̄kpọ owo, ye mme oyụhọ mmịn, ye mbon idiọk inua, ye mme akan owo ubọk ididaha Obio Ubọn̄ Abasi inyene.” Ekem enye adian do ete: “Ndien ndusụk mbufo ẹketie ntem; edi ẹma ẹyet mbufo, ẹma ẹnam mbufo ẹsana, ẹma ẹtebe mbufo ikpe ke enyịn̄ Ọbọn̄ Jesus Christ, ye ke Spirit Abasi nnyịn.” (1 Corinth 6:9-11, Edisana Ŋwed Abasi Ibom) Omokụt do ke eti ido ukpono ama anam ndusụk mbon oro mîkodụhe eti uwem ẹkabade ndisana ikọt Abasi!

Bible etịn̄ n̄ko ke idịghe kpukpru owo edinam emi, ete: “Koro ini ọmọn̄ edi eke mme owo mîdibọhọ eti ukpep-n̄kpọ; ndien sia utọn̄ edebede mmọ ndikop isio ikọ, mmọ ẹyekọ mme andikpep ẹnọ idem nte ekemde ye mme idiọk udọn̄ mmọ.”—2 Timothy 4:3, Edisana Ŋwed Abasi Ibom.

Didie ke ido ukpono emi ọdiọn̄ọde ẹnam n̄kpọ ke afan̄ emi? Ndi mmọ ẹnam nti n̄kpọ oro Bible esịnde udọn̄ ọnọ ẹnyụn̄ ẹfep se Bible akpande? Okûkam edi mmọ ẹsiak mmọn̄ ke Ikọ Abasi, ẹnyụn̄ ẹkpep mme owo “se mmọ ẹmade ndikop”?

Mbọk da ini bọrọ mbụme oro ẹtienede mi, man ọfiọk m̀mê odu ido ukpono oro on̄wụmde nti mfri emi.

ẸYAK INEME IBAN̄A: Ndọ.

SE BIBLE EKPEPDE:

“Yak kpukpru owo ẹbat ndọ ke n̄kpọ eke ẹkponode ẹkûnyụn̄ ẹsabade bed ndọ; koro Abasi eyekpe ikpe ye mbon use ye mme ẹsịn-efịbe.”—Mme Hebrew 13:4, Edisana Ŋwed Abasi Ibom.

MBỤME:

Ndi ido ukpono emi ọdọhọ iren ye iban oro ẹdụn̄ọde ntre ete ẹkedọ ata ndọ nte ibet enyịmede?

ẸYAK INEME IBAN̄A: Usiondọ.

SE BIBLE EKPEPDE:

Ke ini ẹkebụpde Jesus m̀mê ntak ndomokiet odu oro akpanamde owo osio n̄wan esie ndọ, enye ọkọdọhọ ete: “Owo ekededi eke edisiode n̄wan esie ndọ, ke mîtoho ke edidue ye erenowo, onyụn̄ ọdọde efen, esịn efịbe.”—Matthew 19:9, Edisana Ŋwed Abasi Ibom.

MBỤME:

Ndi ido ukpono emi ẹnam se Jesus ọkọdọhọde ẹnyụn̄ ẹnyịme ke efịbe kpọt ọnọ owo isọn̄ ndisio m̀mê ndiwọrọ ndọ nnyụn̄ n̄kọdọ owo en̄wen?

ẸYAK INEME IBAN̄A: Ndidu edisana uwem ke n̄kpọ aban̄ade idan̄.

SE BIBLE EKPEPDE:

“Mbufo ẹfehe ẹbọhọ use. Idiọk-n̄kpọ ekededi eke owo anamde ibehe idụk enye ke ikpọkidem; edi owo eke anamde use edue ikpọkidem esie.”—1 Corinth 6:18, Edisana Ŋwed Abasi Ibom.

“Iban mmọ ẹkpọn̄ se ẹkebotde mmọ ẹnọ, ẹkabade ẹnam se mîkobotke mmọ inọ; kpa ntre n̄ko ke irenowo ẹkpọn̄ se ẹkebotde iban ẹnọ, ẹkabade ẹfiop ke idiọk udọn̄ ye kiet eken, irenowo ẹnam se mîdotke ye irenowo,  ẹnyụn̄ ẹbọ ke idem mmọ utịp eke odotde ndudue mmọ.”—Rome 1:26, 27, Edisana Ŋwed Abasi Ibom.

MBỤME:

Ndi ido ukpono emi ekpep ke akwan̄a eren ye n̄wan oro mîdọhọ ndọ mîdịghe n̄wan ye n̄wan m̀mê eren ye eren ndinam idan̄?

ẸYAK INEME IBAN̄A: Mbon ido ukpono emi ẹnyịmede ndinam se Bible ekpepde, ibakke owo enyịn.

SE BIBLE EKPEPDE:

“Ẹkûdụk ndụk ye owo ekededi emi ẹkotde enye eyen-ete, emi edide owo use, m̀mê esịn esịt ke n̄kpọ owo, m̀mê okpono ndem, m̀mê owo idiọk inua, m̀mê oyụhọ mmịn, m̀mê owo n̄kan-ubọk; ẹkûnyụn̄ ẹdia n̄kpọ ye orụk owo oro.” (1 Corinth 5:11, Edisana Ŋwed Abasi Ibom) Nso ke ẹkpenam ye mbon oro ẹdọhọde ke idi Christian edi mîmaha ndikabade esịt? Ikọ Abasi ọdọhọ ete: “Ẹsio oburobụt owo oro ke otu mbufo ẹfep.”—1 Corinth 5:13, Edisana Ŋwed Abasi Ibom.

MBỤME:

Ndi ido ukpono emi ẹsibịn owo ekededi oro mînamke se Bible etemede, emi mînyụn̄ imaha ndikabade esịt?

Ewe ido ukpono ke ẹdiọn̄ọ nte ẹsọn̄ọde ẹda ẹnam se Bible etemede?