Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2009-04-01

 Kpep Nditọ Fo

Jehoash Ama Ọkpọn̄ Jehovah ke Ntak Idiọk Nsan̄a

Jehoash Ama Ọkpọn̄ Jehovah ke Ntak Idiọk Nsan̄a

EKEDI enyene-ndịk ini ke Jerusalem, obio emi temple Abasi okodude. Ndondo oro ke ẹkewot Edidem Ahaziah. Ama ọsọn̄ mme owo ndinịm se Athaliah eka Ahaziah akanamde ke ẹma ẹkewot Ahaziah. Enye ama owot nditọ Ahaziah—nditọ eyen esiemmọ! Ndi ọmọfiọk ntak?— * Man enye ke idem esiemmọ akpakara utu ke owo mmọ ekededi.

Edi ẹma ẹnyan̄a ekpri Jehoash, kiet ke otu nditọ eyen Athaliah, ndien eka ete esie ikọfiọkke emi. Ndi akpama ndifiọk nte ẹkesan̄ade ẹnyan̄a enye?— Ọfọn, ekpri Jehoash ama enyene eyeneka ete emi ekekerede Jehosheba, ndien enye ekedịp Jehoash ke temple Abasi. Enye ekekeme ndinam emi sia Jehoiada ebe esie ekedide akwa oku. Ke ntre, enye ye ebe esie ẹma ẹkụt ẹte ke n̄kpọ inamke Jehoash.

Ẹma ẹdịp Jehoash isua itiokiet ke temple. Ẹma ẹkpep enye do kpukpru n̄kpọ ẹban̄a Jehovah Abasi ye mbet esie. Ke akpatre, ke ini Jehoash ekedide isua itiaba, Jehoiada ama anam Jehoash edidem. Ndi akpama ndikop nte Jehoiada akanamde emi ye se ikọwọrọde idiọk Ọbọn̄ An̄wan Athaliah eka ete Jehoash?—

Ọfọn, Jehoiada ke ndịbe ama osop kpukpru san̄asan̄a mbon ukpeme oro ndidem ke Jerusalem ẹkenyenede ini oro. Enye ama asian mmọ nte imọ ye n̄wan imọ ikanyan̄ade nsekeyen Edidem Ahaziah. Ekem, Jehoiada ama emen Jehoash owụt mbon ukpeme oro, mmọ ẹnyụn̄ ẹfiọk ke enye edi enye emi odotde ndikara. Ẹma ẹdiomi se ẹdinamde.

Jehoiada ama ada Jehoash ọwọrọ edi onyụn̄ ayara enye anyanya. Oro ama anam mme owo “ẹkwak ubọk, ẹte, Yak edidem odu uwem”! Mbon ukpeme ẹma ẹkan Jehoash ẹkụk man ẹkpeme enye. Edi ke ini Athaliah okopde n̄kpoyo idatesịt emi, enye efehe ọwọrọ ọkọdọhọ ke ẹdụk odu. Edi Jehoiada owụk mbon ukpeme ete ẹwot enye.—2 Ndidem 11:1-16.

Ndi afo ekere ke Jehoash ama aka iso okop uyo ọnọ Jehoiada onyụn̄ anam se inende?— Ama okop ọnọ onyụn̄ anam se inende ke ini oro Jehoiada okodude  uwem. Jehoash ama akam owụk mme owo ete ẹtịp okụk ẹda ẹdiọn̄ temple Abasi, emi Ahaziah ete esie ye Jehoram ete ete esie mîkọdọn̄ke enyịn. Edi yak ise se iketịbede ke ini Jehoiada emi ekedide akwa oku akakpade.—2 Ndidem 12:1-16.

Jehoash ekedi n̄kpọ nte isua 40 ini oro. Utu ke ndika iso ndụk nsan̄a ye mbon oro ẹnamde n̄kpọ Jehovah, Jehoash akanam ufan ye mbon oro ẹketuakde ibuot ẹnọ ndem. Zechariah eyen Jehoiada ekedi oku Jehovah ini oro. Afo ekere ke Zechariah akanam nso aban̄a ndiọi n̄kpọ oro Jehoash akanamde mi?—

Zechariah ọkọdọhọ Jehoash ye mbon eken ete: “Koro mbufo ẹkpọn̄de Jehovah, enye omonyụn̄ ọkpọn̄ mbufo.” Ikọ oro ama ayat Jehoash tutu enye ọdọhọ ẹtọn̄ọ Zechariah ke itiat ẹwot. Kere ise—ẹma ẹnyan̄a Jehoash ẹsio owotowo ke ubọk, edi idahaemi enye ke idem esiemmọ ọdọhọ ẹwot Zechariah!—2 Chronicles 24:1-3, 15-22.

Ndi omokụt n̄kpọ emi ikemede ndikpep nto mbụk emi?— Ọfọn, nnyịn ikpedehedei ibiet Athaliah, emi ekedide owo usua ye ibak. Utu ke oro, ikpenyene ndima mbon oro ẹtienede nnyịn ẹtuak ibuot ẹnọ Abasi ye idem mme asua nnyịn, kpa nte Jesus ekekpepde nnyịn. (Matthew 5:44; John 13:34, 35) Edi ti ete ke edieke itọn̄ọde ndinam nti n̄kpọ, nte Jehoash akanamde, oyom ika iso idụk nsan̄a ye mbon oro ẹmade Jehovah ẹnyụn̄ ẹsịnde udọn̄ ẹnọ nnyịn inam n̄kpọ esie.

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke ana ebet onyụn̄ ọdọhọ eyen oro etịn̄ ekikere esie.