Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2009-02-01

 Kpep Nditọ Fo

Josiah Ama Emek Ndinam Se Inende

Josiah Ama Emek Ndinam Se Inende

NDI ekere ke imemke utom ndinam se inende *— Edieke ọbọrọde ih, ata ediwak owo ẹyenyịme ye afo. Esikam ọsọn̄ ikpọ owo n̄ko ndinam se mmọ ẹfiọkde ke enen. Ẹyak ise ntak emi ekenen̄erede ọsọn̄ Josiah ndimek se inende. Ndi ọmọfiọk owo oro enye ekedide?—

Josiah ekedi eyen Amon, edidem Judah, emi ekedide isua 16 kpọt ke ini Josiah akamanade. Amon ama ọdiọk etieti, ukem nte Edidem Manasseh ete esie ọkọdiọkde. Ke nditịm ntịn̄, Manasseh ekedi ata idiọk edidem ke ediwak isua. Edi ekem, mbon Assyria ẹma ẹmụm enye nte mbuotekọn̄ ẹda ẹka anyan usụn̄ ko ke Babylon. Ke ini Manasseh okodude ke ufọk-n̄kpọkọbi, enye ama ekpe Jehovah ubọk ete adahado ọnọ imọ, Jehovah onyụn̄ adahado ọnọ enye.

Ke ini ẹkesiode Manasseh ke ufọk-n̄kpọkọbi, enye ama afiak ọnyọn̄ Jerusalem onyụn̄ ọtọn̄ọ ntak ada ubọn̄ do nte edidem. Enye ama etre ndiọi n̄kpọ oro enye akanamde iwiwa onyụn̄ an̄wam ikọt esie ẹtiene ẹnam n̄kpọ Jehovah. Anaedi enye ikokopke inemesịt ke ini Amon eyen esie mîkekpebeke eti uwụtn̄kpọ esie. Etie nte ini emi ke Josiah akamana. Bible itịn̄ke adan̄a nte Manasseh ekekperede Josiah eyeyen esie idem. Edi ndi afo emekere ke Manasseh ama odomo ndin̄wam Josiah anam n̄kpọ Jehovah?—

Manasseh ama akpa ke ini Josiah ekedide isua itiokiet kpọt, Amon ete Josiah onyụn̄ akabade edi edidem. Amon akakara isua iba kpọt mbemiso ikọt esie ẹkewotde enye. Ntre, Josiah ama akabade edi edidem Judah ke ini ekedide isua itiaita. (2 Chronicles, ibuot 33) Afo ekere ke nso iketịbe ini oro? Ndi Josiah ekemek nditiene idiọk uwụtn̄kpọ Amon ete esie m̀mê eti uwụtn̄kpọ Manasseh ete ete esie oro akakabarede esịt?—

Okposụkedi emi Josiah ekedide eyenọwọn̄, enye ama ebiere ndinam n̄kpọ Jehovah. Ntre, enye ama akpan̄ utọn̄ ọnọ mbon oro ẹkemade Jehovah, utu ke ndikpan̄ nnọ mbon oro ẹkedide ufan ete esie. Josiah ekedi isua  itiaita kpọt, edi enye ama ọfiọk ke ọfọn ẹkpan̄ utọn̄ ẹnọ mbon oro ẹmade Abasi. (2 Chronicles 34:1, 2) Ndi akpama ndifiọk mbon oro ẹkesinọde Josiah item, ẹnyụn̄ ẹdide uwụtn̄kpọ ẹnọ enye?—

Prọfet Zephaniah ama enịm eti uwụtn̄kpọ ọnọ Josiah. Enye ekedi iman Josiah, koro osụk etie nte enye ekedi owo ubon eti Edidem Hezekiah, emi ekedide ete Manasseh. Ke ntọn̄ọ ntọn̄ọ ini oro Josiah ekedide edidem, Zephaniah ama ewet n̄wed Bible oro ekerede Zephaniah. Enye ama odụri mme owo utọn̄ aban̄a mme n̄kpọ oro ẹditịbede ẹnọ mbon oro mîmaha ndinam se inende, ndien Josiah ama anam item oro.

Owo en̄wen ekedi Jeremiah, emi anade edi ọmọfiọk. Jeremiah ye Josiah ẹkedi n̄kparawa emi ẹkedụn̄ọde ẹkpere kiet eken. Jehovah ama ọnọ Jeremiah odudu spirit ada ewet n̄wed Bible oro ekerede Jeremiah. Ke ini Josiah akakpade ke ekọn̄, Jeremiah ama ewet san̄asan̄a ikwọ-eyet ndida nyorode eyet n̄kpa esie. (2 Chronicles 35:25) Imekeme ndida enyịn ikike n̄kụt nte mmọ ẹkesịnde udọn̄ ẹnọ kiet eken ẹsọn̄ọ ẹda ẹnam n̄kpọ Jehovah.

Ana edi didie ke Zephaniah ye Jeremiah ẹken̄wam Josiah anam se inende?

Afo ekere ke imọ ikeme ndikpep nso nto Josiah?— Edieke ete fo mînamke n̄kpọ Jehovah, ukem nte ete esie mîkanamke, ndi odu owo emi ekemede ndin̄wam fi ekpep n̄kpọ aban̄a Abasi? Ekeme ndidi eka fo, ete ete m̀mê eka eka, m̀mê iman en̄wen. Ekeme ndidi owo en̄wen emi anamde n̄kpọ Jehovah, owo emi eka fo ekemede ndiyak ekpep fi Bible.

Ekededi ke otu oro, okposụkedi emi Josiah ekedide eyenọwọn̄, enye ama ọdiọn̄ọ idem ekem ndifiọk ke imọ ikpanam ufan ye mbon oro ẹnamde n̄kpọ Jehovah kpọt. Afo akpakam anam ntre n̄ko onyụn̄ emek ndinam se inende!

^ ikp. eki. 3 Edieke okotde ibuotikọ emi ye eyenọwọn̄, n̄kpri udịm oro ẹdụride ẹwụt ke ana ebet onyụn̄ ọdọhọ eyen oro etịn̄ ekikere esie.